مولانا محمد طاہر(خط کا جواب دینے میں مجھے ) معذور سمجھیں ۔ مولانا یار محمدہماری نقل و حرکت کی وجہ(عذر) بیان کریں گے جب آپ ہندوستان کے سفر کا ارادہ مصمم رکھتے ہیں جائیں اور اہل عیال کی خبر لیں۔ الباقی عند التلاقی  (باقی بوقت ملاقات)کی مشہور خبر ہے ۔ دوام حضور اور غیروں کی صحبت سے بچنا ضروری ہے۔ ہمت کو بلند رکھنا چاہیئے اور جو کچھ ہاتھ میں آجائے اسی میں مشغول نہ ہونا چاہیئے۔

مااز پے نورے کہ بودمشرق انوار از مغربی و کوکب و مشکوة گزشتیم

ترجمہ: ہمیں اس نور کی خاطر جو ہے انوار کا مشرق نہ حاجت ہے ستارے کی نہ سورج چاند ومشعل کی

 اس زمانہ کے اکثر فقرا ءمقام سیراب اور اکتفا (یعنی سیراب ہونے اور کفایت کرنے) پراقامات رکھتے ہیں یعنی آگے ترقی نہیں کرتے ۔ ان کی صحبت زہر قاتل ہے ان سے ایسابھا گو جیسا شیر سے اور واقعات کا کچھ اعتبار نہ کریں کیونکہ تاویل کا میدان بہت وسیع ہے اور ہرگز خواب و خیال پر فریفتہ نہ ہو جائیں۔ 

كَيْفَ الْوُصُوْلُ إِلىٰ سُعَادَ وَدُوْنَهَا قُلَلْ الْجِبَالِ وَ دُوْنَھُنَّ خُيُوْفُ

میں سعاد تک کعب کیسے پہنچوں  کس قدر خوفناک راستے ہیں  والسلام۔ 

مکتوبات حضرت مجدد الف ثانی دفتر اول صفحہ308ناشر ادارہ مجددیہ کراچی

میر صاحب بہت دعوات مطالعہ  فرمائیں، مدت ہوئی کہ آپ نے اپنے احوال سے اطلاع نہیں دی اور یہاں کے فقراء کی خبر نہیں لی۔ اللہ کی حمد اور اس کا احسان ہے کہ فقراء خوشحال ہیں فقیرمختصر طو پر تھوڑا سا حال بیان کرتا ہے۔ 

اے محبت کے نشان والے یہ راستہ(طریقت) سات قدم پرقرار پایا ہے۔ بعض یاروں نے اپنا کام چھ قدموں تک پہنچایا ہے اور بعض نے پانچ قدم تک اور ایک گروہ نے چار قدم تک اور ایک گروہ نے تین قدم تک اپنے اپنے درجوں کے اختلاف کے بموجب اور جب تین قدم والا بھی لوگوں کو فائدہ پہنچا سکتا ہے تو وہ لوگ جو ان سے آگے قدم رکھتے ہیں کیسے فائدہ نہ پہنچا سکیں گے(بدرجہ اولیٰ فائدہ پہنچا سکتے ہیں)۔ بلند ہمتی درکار ہے تاکہ ہیچ و پوچ(کسی کام کا نہ ہونا) پر کفایت نہ ہو اس سے زیادہ لکھنا وقت کے مناسب نہ تھا۔ والسلام۔ 

مکتوبات حضرت مجدد الف ثانی دفتر اول صفحہ308ناشر ادارہ مجددیہ کراچی