مکتوب شريف جوطبعی استعداد کی خوبی سے بڑی عاجزی کے ساتھ ان بے سامان فقراء کی طرف ارسال کیا تھا پہنچا ۔ حق تعالیٰ آپ کو اپنے حبیب علیہ وآلہ الصلوة والسلام کے صدقے جزائے خیر عطا کرے۔ 

ا ے فرزند! دنیا دار اور دولت مند بڑی بلا میں گرفتار (مشغول)ہیں اور ابتلائے عظیم میں مبتلا ہیں کیونکہ دنیا کو جوحق تعالیٰ کی مبغوضہ ہے اور تمام نجاستوں سے زیادہ مردار ہے۔ ان کی نظروں میں آراستہ اور پیراستہ ظاہر کیا ہے، جس طرح کہ نجاست کو سونے سے ملمع کریں اور زہر کوشکر میں ملا دیں حالانکہ عقل دور اندیش کو اس کمینی کی برائی سے آگاہ کردیا ہے اور اس ناپسندیدہ کی قباحت پر ہدایت و دلالت فرمائی ہے۔ اسی واسطے علماء نے فرمایا ہے کہ اگر کوئی شخص وصیت کرے کہ میرا مال زمانہ کےعقلمند کو دیں تو زاہد کو دینا چاہیئے، جو دنیا سے بے رغبت ہے اور اس کی وہ بے رغبتی اس کی کمال عقل سے ہے۔ اس کے علاوہ صرف عقل کے ایک گواہ پر کفایت نہیں کی نقل کا دوسرا گواہ بھی اس کے ساتھ شامل کردیا ہے اور انبیاء علیہم الصلوۃ والسلام کی زبان سے جو اہل جہان کے لئے سراسر رحمت ہیں۔ اس کھوٹے اسباب کی حقیقت پر اطلاع بخشی ہے اور اس فاحشہ مکار(دنیا) کی محبت وتعلق سے بہت منع فرمایا ہے۔ ان دو عادل گواہوں کے موجود ہوتے بھی اگر کوئی شکر موہوم کی طمع پر زہر کھالے اور خیالی سونے کی امید پر نجاست اختیار کر لے تو وہ شخص بڑا ہی بیوقوف اور احمق بالطبع ہے بلکہ انبیاء علیہم الصلوة والسلام کی اخبار کا منکر ہے۔ ایسا شخص منافق کاحکم رکھتا ہے کہ اس کا ظاہری ایمان آخرت میں اس کو کچھ فائدہ نہ دے گا اور اس کا نتیجہ دنیاوی خون اور مال کے بچاؤ کے سوا اور کچھ نہ ہوگا۔ آج غفلت کی روئی کانوں سے نکالنی چاہیئے ورنہ کل حسرت و ندامت کے سوا کچھ سرمایہ حاصل نہ ہوگا۔ خبر کرنا ضروری ہے۔   

ہمہ اندر زن بتوابن است       که توطفلی و خانه رنگین است

 تر جمہ نصیحت میری تجھ سے ساری یہی ہے کہ گھر ہے منقش تو بچہ ابھی ہے

  والسلام 

مکتوبات حضرت مجدد الف ثانی دفتر اول(حصہ دوم) صفحہ95ناشر ادارہ مجددیہ کراچی

اَلْحَمْدُ لِلّٰهِ وَسَلَامٌ عَلٰی عِبَادِہِ الَّذِیْنَ اصْطَفٰی  ( اللہ تعالیٰ  کی حمد ہے اور اس کے برگزیدہ بندوں پر سلام ہو ) برادرم میاں ممریز خاں فقر کے تنگ کوچہ سے بھاگ کر دولت مندوں کی طرف التجالے گئے ہیں اور ان کی لذتوں اور نعمتوں پر راضی ہو گئے ہیں ۔ إِنَّا لِلَّهِ وَإِنَّا إِلَيْهِ رَاجِعُونَ آپ نے اچھا نہیں کیا۔ اگر آپ دولت مندوں کی صحبت میں دنیا کی بہت ترقی کریں گے تو ہزاری ہو جائیں گے اور مان سنگھ نے پنج  ہزاری  یاہفت ہزاری تھا۔ اس سے زیادہ تر تی نہ کریں گے اور اگر بالفرض مان سنگھی مرتبہ پر بھی پہنچ جائیں تو سوچنا چاہیئے کہ آپ کو کیا مل گیا اور کون سی بزرگی آپ نے حاصل کی ۔ لقمہ نان فقر میں بھی مل جاتا تھا۔ اب اس سے زیادہ چرب لقمہ کھاتے ہوں گے اس طرح بھی گزر رہی تھی۔ اس طرح بھی گزر جائے گی ، لیکن آپ کو خیال کرنا چاہیئے کہ آپ کے ہاتھ سے کیا کچھ نکل گیا اور جب تک ہیں نکل رہا ہے اور دن بدن مفلس ہورہے ہیں۔ الراضى بالضرر لا يستحق الشفقة یعنی جوشخص اپنے ضرر پر راضی ہو وہ شفقت کا مستحق نہیں ہے جب آپ اس امر میں مبتلا ہو گئے ہیں تو اتنی کوشش ضرور کریں کہ استقامت کے طریق اور شریعت کے التزام کو نہ چھوڑیں اور باطنی شغل میں بھی فتورنہ پڑے اگر چہ دنیا کے ساتھ اس کا جمع کرنا مشکل ہے، کیونکہ دوضدوں کا جمع ہونا محال ہے مگر اس قدرتو ضرور ہونا چاہیئے کہ اس وضع میں جو آپ نے اختیار کیا ہے اور اس خدمت میں جو آپ کررہے ہیں اگر نیت درست کی جائے تو عزیمت اور غزاو جہاد میں داخل ہے اور نیک عمل ہے مگر نیت کا درست ہونا مشکل ہے کیونکہ آج جو خدمت ہے شاید وہ نیک ہومگرکل ایسی خدمت فرمائیں جوعین وبال ہو۔ غرض بڑا مشکل کام ہے اس میں بہت ہوشیار رہیں۔ اطلاع دینا ضروری تھا۔ والسلام 

مکتوبات حضرت مجدد الف ثانی دفتر سوم صفحہ165ناشر ادارہ مجددیہ کراچی

دنیا ظاہر میں میٹھی ہے اور صورت میں تازگی رکھتی ہے۔ لیکن حقیقت میں زہر قاتل اور جھوٹا اسباب اور بیہودہ گرفتاری ہے اس کا مقبول خوار اور اس کا عاشق مجنون ہے۔ اس کا حکم اس نجاست کا سا ہے جو سونے میں منڈھی(چڑھی) ہو اور اس کی مثال اس زہر کی کیا ہے جو شکر میں ملا ہوا ہوعقلمند وہی ہے جو ایسے کھوٹے متاع پر فریفتہ نہ ہو اور ایسے خراب اسباب کا گرفتار نہ ہو اور داناؤں نے کہا ہے کہ اگر کوئی شخص وصیت کرے کہ میرا مال زمانہ میں سے کسی عقلمند کو دیں تو زاہد کو دینا چاہیئے۔ جو دنیا سے بے رغبت ہے اور اس کی وہ بے رغبتی بڑی دانائی کے سبب سے ہے۔ زیادہ لکھنا طول کلامی ہے۔

باقی تکلیف یہ دی جاتی ہے کہ فضائل مآب شیخ زکریا اس سال میں کروڑی گری یعنی تحصیلداری میں گرفتار ہے۔ باوجود اس گرفتاری کے دنیاوی محاسبہ سے جو عاقبت کے محاسبہ کی نسبت بہت آسان ہے۔ بہت ڈرتا ہے اور عالم اسباب میں بڑاذریعہ اور وسیلہ آپ ہی کی توجہ شریف کو جانتا ہے امید ہے کہ نئے دفتر سے بھی ظاہر ہو جائے گا کہ یہ آپ کی عالی درگاہ کے خادموں میں سے ہے۔

تو مرا دل ره و دلیری بیں رو بہ خویش خوان و شیری بیں

ترجمہ : مجھ کو دل دیکے پھر دلیری دیکھ اپنا لومڑ بنا کے شیری دیکھ ۔

نبی ﷺاور ان کی آل بزرگوار رضوان الله تعالی علیھم اجمعین کے طفیل آپ کو ظاہری باطنی دولت حاصل ہو۔

مکتوبات حضرت مجدد الف ثانی دفتر اول صفحہ177 ناشر ادارہ مجددیہ کراچی