کچھ مدت تک میں حضرت خیر البشر علیہ الصلوة والسلام کی صلوت میں مشغول رہا اورقسم قسم کے درود و صلوة بھیجتا رہا اور بہت سے دنیاوی فائدے اور نتیجے پاتا رہا اور ولایت خاصہ محمد علی صاحبہا الصلوة والسلام کے اسرار ودقائق کا مجھ پر فیضان ہوتا رہا۔ کچھ مدت تک اسی طرح کرتا رہا۔ اتفاقا اس التزام میں فرق آ گیا اور اس اشتغال کی تو فیق نہ رہی۔ صرف صلوة موقتہ پر کفایت کی۔ اس وقت بھی یہی اچھا معلوم ہوتا تھا کہ صلوة کی بجائے   تسبیح و تہلیل تقدیس میں مشغول رہوں۔ میں نے اپنے دل میں سوچا کہ شاید اس میں کوئی حکمت ہوگی۔ دیکھیں کیا ظاہر ہوتا ہے۔ 

پس اللہ تعالیٰ  کی عنایت سے معلوم ہوا کہ اس وقت ذکرکرنا صلوۃ و درود بھیجنے سے بہتر ہے۔ درود بھیجنے والے کے لیے بھی اور جس کی طرف درود بھیجا جاتا ہے اس کے لیے بھی دو وجہ سے۔

 وجہ اول: یہ ہے کہ حدیث قدسی میں آیا ہے مَنْ ‌شَغَلَهُ ‌ذِكْرِي عَنْ مَسْأَلَتِي أَعْطَيْتُهُ فَوْقَ مَا أُعْطِي السَّائِلِينَ جس کو میرے ذکر نے مجھ سے سوال کرنے سے روک رکھا تو میں اس کو تمام سائلین سے بڑھ کر دیتا ہوں۔

دوسری وجہ یہ ہے کہ جب ذکر پیغمبر علیہ الصلوۃ والسلام سے ماخوذ ہے تو اس کا ثواب جس قدر ذاکر کو پہنچتا ہے اسی قد رثواب آنحضرت کو بھی پہنچتا ہے۔ رسول الله ﷺنے فرمایا ہے۔مَنْ سَنَّ فِي الْإِسْلَامِ سُنَّةً حَسَنَةً، فَعُمِلَ بِهَا بَعْدَهُ، كُتِبَ لَهُ مِثْلُ أَجْرِ مَنْ عَمِلَ بِهَاجس شخص نے کسی نیک سنت کو جاری کیا، اس کو اس کا اپنا اجر بھی ملے گا اور اس شخص کا بھی جو اس پر عمل کرے گا۔ 

اسی طرح جو نیک عمل امتوں سے وجود میں آتا ہے، اس عمل کا اجر جس طرح عامل کو پہنچتا ہے، اسی طرح پیغمبرکوبھی جو اس عمل کا واضع ہے، پہنچتا ہے۔ بغیر اس کے کہ عامل کے اجرکو کچھ کم کریں۔ اس بات کی ضرورت نہیں کہ عمل کرنے والا پیمبر علیہ السلام کی نیت پر عمل کرے کیونکہ وہ حق تعالیٰ  کا عطیہ ہے۔ عامل کا اس میں کچھ دخل نہیں۔ ہاں اگر عامل سے پیغمبر علیہ السلام کی نیت بھی ظاہر ہو جائے توعامل کے لیے زیادہ اجر کا باعث ہے اور یہ زیادتی بھی پیغمبر کی طرف عائد ہوگی۔ ۔ ذَلِكَ فَضْلُ اللَّهِ يُؤْتِيهِ مَنْ يَشَاءُ وَاللَّهُ ذُو الْفَضْلِ الْعَظِيمِ ( یہ الله تعالیٰ  کا فضل ہے جس کو چاہتا ہے دیتا ہے اور الله تعالیٰ  بڑے فضل والا ہے۔)

کچھ شک نہیں کہ ذکر سے اصلی مقصودحق تعالیٰ  کی یاد ہے اور اس پراجر کا طلب کرنا اس کا طفیلی اور تابع ہے اور درود میں اصلی مقصد طلب حاجت ہے۔ شَتَّانِ مَا بَيْنَهُمَا ان دونوں کے درمیان بہت فرق ہے۔ ) پس وہ فیض جو ذکرقلبی کی راہ سے پیغمبر علیہ الصلوة والسلام کوپہنچتے ہیں۔ ان برکات سے کئی گنا زیادہ ہیں۔ جو درود کی راہ سے پیغمبر علیہ الصلوۃ والسلام کوپہنچتے ہیں۔ .

جاننا چاہے کہ ہرذکر مرتبہ نہیں رکھتا۔ وہ ذکر جوقبولیت کے لائق ہے، وہی اس زیادتی کے ساتھ مخصوص ہے لیکن جوذ کر ایسانہیں درود کو اس پر زیادتی اور فضیلت ہے اور درودے  زیادہ برکتیں حاصل ہونے کی امید ہے۔ ہاں وہ ذکر جو طالب کسی  شیخ کا مل  مکمل سے اخذ کرتا ہے اور طریقت کے آداب و شرائط کو مدنظر رکھ کر اس پر مداومت کرتا ہے، درود پڑھنے سےا فضل ہے کیونکہ یہ ذ کر اس ذکر کا وسیلہ ہے جب تک یہ ذکر نہ ہو، اس ذکر تک نہیں پہنچ سکتے۔ 

یہی باعث ہے کہ مشائخ طریقت قدس سرہم مبتدی کے لیے سوائے ذکر کرنے کے اور کچھ جائز نہیں سمجھتے اور اس کے حق میں صرف فرضوں اور سنتوں پر کفایت کرتے ہیں اور امور نافلہ سے منع کرتے ہیں۔ اس بیان سے ظاہر ہوا کہ امت میں سے کوئی شخص خواہ وہ کمالات میں کتنا ہی بلند درجہ حاصل کر لے۔ اپنے پیغمبر علیہ السلام کے ساتھ برابری نہیں کر سکتا کیونکہ یہ سب کمالات اس کو اس پیغمبر کی شریعت کی متابعت کے باعث حاصل ہوئے ہیں۔ پس اس پیغمبر کو یہ سب کمالات بھی اور دوسرے تابعداروں کے کمالات بھی اور اپنے مخصوصہ کمالات بھی ثابت و حاصل ہوں گے۔ اسی طرح وہ شخص کامل اپنے پیغمبر کے سوا کسی دوسرے پیغمبر کے مرتبہ کو بھی نہیں پہنچ سکتا۔ اگر چہ کسی نے اس پیغمبر کی متابعت نہ کی ہو اور اس کی دعوت کو کسی نے قبول نہ کیا ہو کیونکہ ہر ایک پیغمبرا صلی اور مستقل طور پر صاحب دعوت دشریعت کی تبلیغ پر مامور ہے۔ امتوں کا انکار اس کی دعوت وتبلیغ میں قصور پیدا نہیں کرتا اور ظاہر ہے کہ کوئی کمال دعوت وتبلیغ کے مرتبہ تک نہیں پہنچتا۔فان أحب عباد الله إلى الله من حبب الله إلى عباده و حبب عباد الله إلى الله وهو الداعى والمبلغ ( کیونکہ اللہ تعالیٰ  کے بندوں میں سے اللہ تعالیٰ  کے نزدیک پیارا وہ شخص ہے جو الله تعالیٰ  کو اپنے بندوں کے نزدیک اور بندوں کو الله تعالیٰ  کےنزدیک پیارا اور محبوب بنائے اور وہ شخص دعوت وتبلیغ کرنے والا ہے۔ 

آپ نے سنا ہوگا کہ خبر میں آیا ہے کہ قیامت کے دن علماء کی سیاہی کو فی سبیل اللہ شہیدوں کے خون کے ساتھ وزن کریں گے اور اس سیاسی والا پلہ اس خون والے پلے پر راجح اور غالب آجائے گا۔ باقی امت کے لوگوں کو یہ دولت میسر نہیں ہوئی جو کچھ رکھتے ہیں ۔ طفیلی اور ضمنی ہے۔ اصل اصل سے ہے اور فرع اصل سے مستنبط ہے۔ اس بیان سے اس امت کے داعیان اور مبلغین کی فضیلت معلوم کرنی چاہیئے۔ اگرچہ دعوت وتبلیغ میں بہت سے درجات ہیں اور داعيان مبلغین اپنے اپنے درجات میں متفاوت ہیں۔ علماء تبلیغ ظاہری کے ساتھ مخصوص ہیں اور صوفیاء باطن کے ساتھ اہتمام کرتے ہیں اور جو کوئی عالم صوفی ہے، وہ کبریت احمریعنی اکسیر ہے اور ظاہری و باطنی دعوت وتبلیغ کے لائق ہے اور پیغمبر علیہ الصلوة والسلام کانائب و وارث ہے اور بعض لوگ اس امت کے محدثین کو جو احادیث نبوی ﷺ کی تبلیغ کرتے ہیں، تمام امت سے افضل جانتے ہیں۔ اگر مطلق اور عام طور پر افضل جاتے ہیں تو محل خدشہ ہے اور اگر ظاہری مبلغین کی نسبت کہا ہے تو ہوسکتا ہے کیونکہ مطلق فضیلت اس جامع مبلغ کے لیے ہے جو ظاہری باطنی تبلیغ کرتا ہے لیکن ظاہر میں بھی دعوت کرتا ہے اور باطن میں بھی۔ لان في الاقتصار قصور ينا في إطلاق الفضل فافهم فلا تكن من القاصرين ( کیونکہ اقتصار میں قصور ہے جو فضل کے اطلاق کرنے کے منافی ہے۔ پس سمجھ اور کوتاہ نظروں میں سے نہ ہو) ہاں ظاہر يقينا عمدہ اور نجات کا مدار اور بڑی برکت والا اور عام نفع والا ہے لیکن اس کا کمال باطن پر موقوف ہے۔ ظاہر بغیر باطن کے ناتمام ہے اور باطن بغیر ظاہر کے نافرجام اور وہ شخص جو باطن کو ظاہر کے ساتھ جمع کرے، کبریت احمریعنی سرخ گندھک ( کیمیا و اکسیر ہے۔ رَبَّنَا أَتْمِمْ لَنَا نُورَنَا وَاغْفِرْ لَنَا  إِنَّكَ عَلَىٰ كُلِّ شَيْءٍ قَدِيرٌ يا الله تو ہمارے نور کو کامل کر اور ہمیں بخش۔ تو ہر چیز پر قادر ہے) وَالسَّلَامُ عَلَى مَنِ اتَّبَعَ الْهُدَى (سلام ہو اس شخص پر جس نے ہدایت اختیار کی )

مکتوبات حضرت مجدد الف ثانی دفتر دوم صفحہ207ناشر ادارہ مجددیہ کراچی

پنج وقتی نماز کو جماعت کے ساتھ ادا کرنے اور سنت موکدہ کو بجالانے کے بعد اپنے اوقات کو ذکر الہی میں صرف کرنا چاہیئے اور اس کے سوا کسی چیز میں مشغول نہ ہونا چاہے ۔ یعنی کھانے، سونے اور آنے جانے میں غافل نہ ہونا چاہیئے۔ ذکر کا طریق آپ کو سکھلایا ہوا ہے۔ اسی طریق پر استعمال کریں اور اگر جمعیت (دل کو طمینان حاصل ہونا) میں فتور معلوم کریں تو پہلے فتور کا باعث دریافت کرنا چاہیئے اور پھر اس کوتاہی کا تدارک کرنا چاہیئے اور بڑی عاجزی اور زاری سے حق تعالی کی جناب کی طرف متوجہ ہو کر اس ظلمت کے دور ہونے کی دعا مانگنی چاہیئے اور جس شیخ سے ذکر سیکھا ہے اسی کو وسیلہ بنانا چاہیئے۔ والله سبحانہ الميسر كل عسير حق تعالی ہر مشکل کو آسان کرنے والا ہے۔ والسلام

مکتوبات حضرت مجدد الف ثانی دفتر اول صفحہ257ناشر ادارہ مجددیہ کراچی

(1) اپنے عقائد کو فرقہ ناجیہ یعنی علماء اہل سنت و جماعت کے عقائد کے موافق درست کریں۔ 

(2) عقائد کے درست کرنے کے بعد احکام فقہیہ کے مطابق عمل بجالا ئیں، کیونکہ جس چیز کا امر ہو چکا ہے اس کا بجا لانا ضروری ہے اور جس چیز سے منع کیا گیا ہے اس سے ہٹ جانا لازم ہے۔

(3)  پنج وقتی نماز کو سستی اور کاہلی کے بغیر شرائط اور تعدیل ارکان کے ساتھ ادا کریں۔ 

(4) نصاب کے حاصل ہونے پر زکوة ادا کریں۔ امام اعظم رضی اللہ تعالی نے عورتوں کے زیور میں بھی زکوة کا ادا کرنا فرمایا ہے۔ 

(5) اپنے اوقات کو کھیل کود میں صرف نہ کریں اور قیمتی عمرکو بیہودہ امور میں ضائع نہ کریں پھر امور منہیہ اور مخطورات شرعیہ کے بارے میں کیا تاکید کی جائے۔ 

(6) سرود ونغمہ یعنی گانے بجانے کی خواہش نہ کریں اوراس کی لذت پر فریفتہ نہ ہوں۔ یہ ایک قسم کازہر ہے جو شہد میں ملا ہوا ہے اور سم قاتل ہے۔ جوشکر سے آلودہ ہے۔ 

(7) لوگوں کی غیبت اور نکتہ چینی سے اپنے آپ کو بچائیں۔ شریعت میں ان دونوں بری خصلتوں کے بارے میں بڑی وعید آئی ہے۔ 

(8) جہاں تک ہو سکے جھوٹ بولنے اور بہتان لگانے سے پرہیز کریں، کیونکہ یہ دونوں بری عادتیں تمام مذہبوں میں حرام ہیں اور ان کے کرنے والے پر بڑی وعید آئی ہے۔ 

(9) خلقت کے عیبوں اور گناہوں کو ڈھانپنا اور ان کے قصوروں سے درگزر اور معاف کرنا بڑے عالی حوصلہ والے لوگوں کا کام ہے۔ 

(10) غلاموں اور ماتحتوں پرمشفق و مہربان رہنا چاہیئے اوران کے قصوروں پرمؤاخذه نہ کرناچاہیئے اور موقع اور بے موقع ان نامرادوں کو مارنا، پیٹنا، گالی دین اور ایذا پہچانا  نامناسب ہے۔ 

(11) اپنی تقصیروں کو نظر کے سامنے رکھنا چاہئے۔ جو ہر ساعت حق  تعالی کی پاک بارگاہ کی نسبت وقوع میں آرہی ہیں اور حق تعالی ان کے مواخذہ میں جلدی نہیں کرتا اور روزی کو نہیں روکتا۔ 

(12) عقائد کے درست کرنے اور احکام فقہیہ کے بجالانے کے بعد اپنے اوقات کوذکر الہی میں بسر کریں اور جس طرح ذکر طریق سیکھا ہوا ہے۔ اسی طرح عمل میں لائیں اور جو اس کے منافی ہو اس کو اپنا دشمن جان کر اس سے اجتناب کریں۔ 

ہر چہ جزذ کر خداے احسن است گرشکر خوردن بودجا نکندن است 

ترجمہ بیت: عشق حق کے ماسوا جو کچھ کہ ہے ہر چند احسن ہے  شکر کھانا بھی گر ہوگا عذاب جان کندن ہے 

آپ کو روبرو بھی کئی دفعہ یہی کہا گیا ہے کہ امورشرعیہ میں جس قدر احتیاط کی جائے اسی قدر مشغولی اور مراقبہ میں زیادتی ہوتی ہے اوراگرا حکام شرعیہ میں سستی کی جائے تو مشغولی اور مراقبہ کی لذت وحلاوت برباد ہو جاتی ہے۔ اس سے زیادہ کیا لکھا جائے ۔ والله سبحانه أعلم 

مکتوبات حضرت مجدد الف ثانی دفتر سوم صفحہ119ناشر ادارہ مجددیہ کراچی

لغوی معنی

خنس کے معنی چھپنے یا پیچھے ہٹ جانےکے ہیں خناس مبالغے کا صیغہ ہے،  جس کو ہم چور کے نقب لگانے سے تشبیہ دے سکتے ہیں۔

اصطلاحی معنی

 خناس شیطان کی صفت ہے کیونکہ یہ دل میں وسواس پیدا کرتا ہے حدیث کے مطابق شیطان  اس وقت پیچھے ہٹ جاتا اور دور چلا جاتا ہے جب اللہ کا ذکر ہوتا ہے اوردل میں شبہات اور شہوات ڈالنے سے باز رہتا ہے ۔

شیطانی حملہ

شیطان کی یہ عادت ہے کہ شیطان ایسے لوگوں پر بے خبری کے عالم میں اچانک حملے کیا کرتا ہے جو بندےاللہ کے ذکر کو بھول جاتے ہیں اور اس سے غفلت برتتے ہیں تو وہ ان کے دل میں وسوسے پیدا کرتا ہےاور جب اللہ کا ذکر کیا جاتا ہے تو سمٹ کر پیچھے ہٹ جاتا ہے اور اس سے باز رہتا ہے اور دور ہٹ کر چھوٹا ہوجاتا ہے یہاں تک کہ مکھی کی مانند ہوجاتا ہے۔

شیطانی حملے سے بچاؤ

تمام شیطانی وَساوِس کی علاج ذِکر اِلٰہی ہے،اور ان وساوس سے وہی محفوظ رہتے ہیں جن کی رَگ رَگ میں  ذکرِ خدارَچ بس گیا ہو ، فرمانِ الٰہی ہے:

اِنَّ الَّذِیۡنَ اتَّقَوۡا اِذَا مَسَّہُمْ طٰٓئِفٌ مِّنَ الشَّیۡطٰنِ تَذَکَّرُوۡا فَاِذَا ہُمۡ مُّبْصِرُوۡنَ(الاعراف آیت نمبر201)

بیشک جو لوگ متقی ہیں جب ان کو کوئی شیطانی وسوسہ لاحق ہونے لگتاہے وہ اللہ کا ذکر کرتے ہیں اور دفعتاً ان کے دل روشن ہوجاتے ہیں۔ 

  مجاہد  رضی اللہ عنہ  اس فرمانِ الٰہی:مِنۡ شَرِّ الْوَسْوَاسِ  الْخَنَّاسِ(سورۃ الناس آیت 4) خناس کے وسوسوں کے شر سے۔

کی تفسیر میں کہتے ہیں کہ خناس دل پر پھیلا ہوا ہوتا ہے، جب انسان ذکر خدا کرتا ہے تو وہ پیچھے ہٹ جاتا ہے اور سکڑ جاتا ہے اور جب انسان ذکر سے غافل ہوتا ہے تو وہ حسبِ سابق دل پر تَسَلُّط جمالیتا ہے۔     ذکرِ الٰہی اور شیطان کے وَساوِس کا مقابلہ ایسے ہے جیسے نور اور ظلمت، رات اور دن اور جس طرح یہ ایک دوسرے کی ضد ہیں ۔ چنانچہ فرمانِ الٰہی ہے:

اِسْتَحْوَذَ عَلَیۡہِمُ الشَّیۡطٰنُ فَاَنۡسٰىہُمْ ذِکْرَ اللہِ  (سورۃ المجادلۃ آیت 19) ان پر شیطان غالب آیا اور انہیں یادِ الہی سے غافل کردیا۔

                حضرتِ اَنس رضی اللہ عنہ  سے مروی ہے: حضور ﷺ  نے فرمایا کہ شیطان اِنسان کے دل پر اپنی ناک لگائے ہوئے ہے، جب انسان اللہ تعالیٰ کو یاد کرتا ہے تو وہ پیچھے ہٹ جاتا ہے اور جب وہ یادِ الٰہی سے غافل ہو جاتا ہے تو شیطان اس کے دل کو نگل لیتا ہے۔

ام المومنین حضرت حفصہ رضی اللہ تعالٰی عنہا سے راوی، رسول اللہ ﷺفرماتے ہیں : ان الشیطن یجری من الانسان مجری الدم

۔ بے شک شیطان انسان (آدمی) کی رگ رگ میں خون کی طرح ساری وجاری ہے۔ (صحیح البخاری باب الاعتکاف   

صحیحین وغیرہما میں حضرت ابوہریرہ رضی اللہ عنہ  سے ہےکہ رسول اللہ ﷺ فرماتے ہیں : ”جب اذان ہوتی ہے شیطان گوز  مارتا ہوابھاگ جاتاہے کہ اذان کی آواز نہ سنے، جب اذان ہوچکتی ہے پھر آتاہے۔ جب تکبیر ہوتی ہے پھر بھاگ جاتاہے ، جب تکبیر ہوچکتی ہے پھر آتاہے حتی یخطرا بین المراء ونفسہ یقول اذکر کذا اذکر کذا لما لم یکن یذکرہ، حتی یظل الرجل مایدری کم صلٰی

یہاں تک کہ آدمی اور اس کے دل کے اندر حائل ہوکر خطرے ڈالتاہے کہتاہے کہ یہ بات یاد کروہ بات یاد کر ان باتوں کے لئے جو آدمی کے خیال میں بھی نہ تھیں، یہاں تک کہ انسان کو یہ بھی خبر نہیں رہتی کہ کتنی پڑھی”

صحیح البخاری     کتاب الاذان     باب فضل التاذین     )

امام ابوبکر ابی الدنیا کتاب مکائد الشیطان ، اور امام اجل ترمذی نوادر الاصول میں بسند حسن، اور ابویعلٰی مسند، اور ابن شاہین کتاب الترغیب، اور بہیقی شعب الایمان میں حضرت انس رضی اللہ تعالٰی عنہ سے راوی : ان الشیطان واضع خطمہ علی قلب ابن اٰدم فان ذکر اﷲ خنس وان نسی التقم قلبہ فذٰلک الوسواس الخناس ۔ بیشک شیطان اپنی چونچ آدمی کے دل پر رکھے ہوئے ہے، جب آدمی خدا تعالٰی کو یاد کرتاہے شیطان دبک جاتاہے اور جب آدمی (ذکرسے) غفلت کرتاہے (بھول جاتاہے) تو شیطان اس کا دل اپنے منہ میں لے لیتاہے تویہ ہے (شیطان خناس) وسوسہ ڈالنے والا دبک جانیوالا۔ ( شعب الایمان  حدیث 540   دارالمکتب العلمیہ بیروت    1 /403)

لمہ شیطان ولمہ ملکہ دونوں مشہور اور حدیثوں میں مذکور ہیں پھر اولیاء کرام کو قلوب میں تصرف کی قدرت عطا ہونی کیا محل انکار ہے۔حضرت علامہ سلجماسی رحمۃاللہ تعالٰی علیہ کتاب ابریز میں اپنے شیخ حضرت سیدی عبدالعزیز رضی اللہ تعالٰی عنہ سے روایت کرتے ہیں کہ عوام جو اپنے حاجات میں اولیاء کرام مثل حضور سیدنا غوث اعظم رضی اللہ تعالٰی عنہ سے استعانت کرتے ہیں نہ کہ اللہ عزوجل سے، حضرات اولیاء نے ان کو قصدا ادھر لگا لیا ہے کہ دعا میں مرا دملنی نہ ملنی دونوں پہلو ہیں، عوام (مراد) نہ ملنے کی حکمتوں پر مطلع نہیں کئے جاتے، تو اگر بالکلیہ خالص اللہ عزوجل ہی سے مانگتے پھر مراد ملتی نہ دیکھتے تو احتمال تھا کہ خدا کے وجود ہی سے منکر ہوجاتے،اس لئے اولیاء نے ان کے دلوں کو اپنی طرف پھیر لیا کہ اب اگر (مراد) نہ ملنے پر بے اعتقادی کا وسوسہ آیا بھی تو اس ولی کی نسبت آئے گا جس سے مدد چاہی تھ، اس میں ایمان تو سلامت رہے گا۔

کیونکہ ” وسواس ” ان ہی فاسد خطرات کا نام ہے جو ظاہر ہو کر نہیں، بلکہ اندرونی طور پر ایمان کی قوت میں رخنہ ڈالتے ہیں

 ان الشیطان یدخل الصدر الذی ھو بمنزلۃ الدھلیز فیلقی منہ ما یرید القاءہ الی القلب ویوصلہ الیہ۔ بلاشبہ شیطان انسان کے سینہ میں داخل ہوجاتا ہے اور سینہ دل کی دہلیز کی مانند ہے پھر اس میں جو کچھ وہ ڈالنا چاہتا ہے اس میں سے قلب کی طرف ڈالتا ہے اور اسے دل کے ساتھ ملا دیتا ہے یا پہنچا دیتا ہے۔(تفسیر الحسنات)

حضرت عبداللہ بن شقیق (رض) شعری روایت ہے کہ رسول اللہ نے فرمایا ہر آدمی کے دل میں دو گھر (دو مقامات) ہیں ایک میں فرشتہ ہوتا ہے اور دوسرے میں شیطان ۔ جب بندہ اللہ کا ذکر کرے (یعنی اس کی یاد اور اطاعت میں مگن ہو) تو شیطان تھک جاتا ہے اب جب وہ اللہ کے ذکر سے غافل ہو تو شیطان اپنی (خنزیر جیسی) تھوتھنی اس کے دل میں اتار دیتا ہے اور اس کے لئے وسوسہ پیدا کرتا ہے (مظہری بروایت مسند ابی یعلی) ۔

شکایت ہے کہ کسی ولی اللہ نے اللہ تعالیٰ سے سوال کیا کہ شیطان آدمی کے دل میں کیسے وسوسہ ڈالتا ہے وہ یہ دیکھنا چاہتا ہے ؟ اللہ تعالیٰ نے اسے دکھایا کہ ایک انسانی صورت ہے جس کے دونوں کندھوں کے درمیان پشت پر کالے تل کا نشان ہے تو خناس نامی شیطان آیا اور اسے چاروں طرف سے دیکھا بھالا اس کی شکل خنزیر جیسی تھی اس نے اپنی تھوتھنی کو اس تل کے نشان پر رکھا اور اس کے دل تک اندر اتار دیا اور اس میں وسوسہ ڈالنے لگا پھر جب اس انسان نے اللہ کا ذکر شروع کیا تو شیطان پیچھے ہٹ گیا (روح البیان) ۔

خناس شیطان کا لقب ہے، اس کے معنی چھپنے والے کے ہیں، جب اللہ کا ذکر ہوتا ہے تو وہ چھپ جاتا ہے پھر موقع ملتا ہے تو وسوسے ڈالتا ہے۔

 حضرت ابن عباس سے ایک روایت میں ہے کہ شیطان بنی آدم کے دل میں بیٹھ جاتا ہے اور وسوسہ اندازی کرتا رہتا ہے جب انسان اللہ کو یاد کرتا ہے تو پیچھےہٹ جاتا ہے اور جب غافل ہوتا ہے تو پھر وسوسہ ڈالنا شروع کردیتا ہے۔ (رواہ الحاکم)

شیطان کی ان پر فریب باتوں سے صوفی نے ذکر کرنا چھوڑ دیا۔ شکستہ دل اور افسردہ ہو کر 

سوگیا۔ آنکھ سوگئی اورقسمت جاگ گئی۔ 

عالم خواب میں دیکھا کہ حضرت خضر علیہ السلام  تشریف لائے اور انہوں نے دریافت کیا کہ ذکر الہی سے غفلت کیوں کی۔ اے نیک بخت! تو نے ذکر کیوں چھوڑ دیا۔ آخر اس ذکر پاک سے پشیمان کیوں ہو گیا ہے ؟ اس نے کہا بارگاه الہی سے مجھے کوئی جواب ہی نہیں ملتا۔ اس سے دل میں خیال آیا کہ میراذ کر قبول ہی نہیں ہورہا…. 

حضرت خضر علیہ السلام  نے فرمایا تمہارے لئے اللہ عزوجل نے پیغام بھیجا ہے کہ تمہارا اللہ تعالی کے ذکر میں مشغول ہونا اور دوسرا تمہارا پہلی دفعہ اللہ کہنا قبول ہوتا ہے تب دوسری بار تجھے اللہ کہنے کی توفیق ملتی ہے اور تمہارے دل میں یہ جوسوز و گداز ہے اور میری چاہت محبت اور تڑپ ہے یہی تمہارے ذکر کی قبولیت کی نشانی ہے۔ اے بندے! میری محبت میں تیری یہ تدبیریں اور محنتیں سب ہماری طرف سے جذب وکشش کا ہی عکس ہیں۔ اے بندے ! تیرا خوف اور میری ذات سے تیرا عشق میرا ہی انعام ہے، اور میری ہی مہربانی  و محبت کی کشش ہے کہ تیری ہر بار یا اللہ کی پکار میں میرا لبیک شامل ہوتا ہے۔ 

تمہارے ذکر کی قبولیت کی نشانی یہی ہے کہ تمہیں ذکرحق میں مشغول کردیا ہے۔ 

جان جاهل زیں دعا جز دور نیست     زانکه يارب گفتش دستور نیست

 ایک جاہل اور غافل ذکر اور دعا مانگنے کی توفیق سے محروم رہتا ہے۔ 

اللہ عزوجل کے ذکر کا اجر خوداس ذکر میں ہی پوشیدہ ہوتا ہے۔ الله تعالی اپنے ذکر کی اور یاد کی توفیق اسی کو عطا کرتے ہیں جس سے خوش ہوتے ہیں اور یہی اس کی قبولیت کی دلیل ہے۔ 

ثمرات:   نیکی کرنے کی توفیق بھی اللہ ہی دیتا ہے۔

 شیطان ہر دم اس کوشش میں رہتا ہے کہ کسی طرح انسان الله تعالی کے ذکرسے باز آ جائے۔ 

اُدْعُوْا رَبَّکُمْ تَضَرُّعًا وَّخُفْیَۃً اِنَّہ لَا یُحِبُّ الْمُعْتَدِیْنَ (الاعراف:55)

 اپنے رب کو گڑ گڑا کر اور خفیہ طور پر پکارو، بے شک وہ حد سے بڑھنے والوں سے محبت نہیں کرتا۔

زبانی کلمہ ہر کوئی پڑھدا دل دا پڑھدا کوئی ہو

جتھے کلمہ دل دا پڑھئے اتھے ملے زبان نہ ڈھوئی ہو

دل دا کلمہ عاشق پڑھدے کی جانن یار گلوئی ہو

ایہہ کلمہ سانوں پیر پڑھایا باہو میں سدا سہاگن ہوئی ہو

ذاکر اﷲ فی الغافلین کالمقاتل خلف الفارین، وذاکر اﷲ فی الغافلین، کغصن أخضر فی شجر یابس، وذاکر اﷲ فی الغافلین، مثل مصباح فی بیت مظلم(جامع الاصول فی احادیث الرسول )

رسول اﷲ ﷺ نے فرمایا اﷲ کا ذکر کرنے والا غافلوں میں ایسے ہے جیسے میدان جنگ میں سب لوگ بھاگ گئے ہوں ایک شخص دشمن کے مقابلے میں کھڑا ہوذکر والا غافلوں میں ایساہے جیسے سارا درخت سوکھ گیا ہو ایک شاخ ہری ہویا جیسے اندھیرے گھر میں چراغ ہو۔

قَالَ النَّبِیُّ صَلَّی اﷲُ عَلَیْہِ وَسَلَّمَ: مَثَلُ الَّذِی یَذْکُرُ رَبَّہُ وَالَّذِی لاَ یَذْکُرُ رَبَّہُ، مَثَلُ الحَیِّ وَالمَیِّتِ(بخاری)

 آنحضرت صلی اﷲ علیہ وآلہ وسلم نے فرمایا جو شخص اپنے رب کو یاد کرتا ہے، اور جو نہیں کرتا ہے، ان کی مثال زندہ اور مردہ کی سی ہے (یعنی یاد کرنے والا زندہ اور نہ یاد کرنے والا مردہ ہے) ۔

اس کی مثال جو ذکر کرے زندہ کی ہے نہ کرے مردہ کی جسم میں روح ہو تو زندہ نہ ہو تو مردہ

مَا مِنْ قَوْمٍ اجْتَمَعُوا یَذْکُرُونَ اللَّہَ لَا یُرِیدُونَ بِذَلِکَ إِلَّا وَجْہَہُ إِلَّا نَادَاہُمْ مُنَادٍ مِنْ السَّمَاء أَنْ قُومُوا مَغْفُورًا لَکُمْ قَدْ بُدِّلَتْ سَیِّئَاتُکُمْ حَسَنَاتٍ(مسند احمد حنبل)

نبی صلی اﷲ علیہ وسلم نے ارشاد فرمایا جب کوئی جماعت اکٹھی ہو کر اﷲ کا ذکر کرتی ہے اور اس سے اس کا مقصد صرف اﷲ کی رضا ہوتی ہے تو آسمان سے ایک منادی آواز لگاتا ہے کہ تم اس حال میں کھڑے ہو کہ تمہارے گناہ معاف ہوچکے، اور میں نے تمہارے گناہوں کو نیکیوں سے بدل دیا۔

عَنْ عَائِشَۃَ، قَالَتْ: کَانَ رَسُولُ اللَّہِ صَلَّی اﷲُ عَلَیْہِ وَسَلَّمَ یَذْکُرُ اللَّہَ عَزَّ وَجَلَّ عَلَی کُلِّ أَحْیَانِہِ(ابو داؤد)

 حضرت عائشہ رضی اﷲ عنہا سے روایت ہے کہ رسول اﷲ صلی اﷲ علیہ وآلہ وسلم تمام اوقات میں اﷲ کا ذکر کرتے تھے۔

قاضی ثناء اﷲ پانی پتی فرماتے ہیں

’’اور اذکار میں اصل خفا ہے اور جہر بدعت ہے پس جب جہر میں تعارض پایا گیا تو اخفاء ترجیح یافتہ ہوجائیگا یہ چیز دلالت کرتی ہے کہ سری ذکر کرنے والاافضل ہے اور اس پر صحابہ کرام کا اجماع ہے اور ان کی اتباع میں حضرت الحسن کا قول بھی ہے سری دعا اوراعلانیہ دعا میں ستر گنا فرق ہے‘‘(تفسیر مظہری زیر آیت سورۃ الاعراف آیت نمبر55)

د ل وہی آباد ہے جس میں تمہاری یاد ہے جو یاد سے غافل ہو ا ویران ہے برباد ہے

اقم الصلوۃ لذکری دسیا راز انوکھا سب عبادتاں نالوں درجہ ذکر اﷲ دا چوکھا

حضرت قتادہ کا قول ہے ان اﷲ یحب الصوت الخفی وقلب النقی (الدر المنثور)اﷲ تعالیٰ خفی آواز اور صاف دل کو پسند فرماتا ہے۔

ذکر خفی کی دولت

حضرت شیخ بہاء الدین نقشبند رحمۃ اﷲ علیہ کو یہ ذکر خفی کی دولت حضرت عبد الخالق غجدوانی سے بعد از وصال مقبرہ شریفہ سے حاصل ہوئی۔جو خواجہ عبد الخالق کے وصال کے بعد 143سال بعد پیدا ہوئے اور دونوں حضرات کے درمیان پانچ اکابرین(خواجہ عارف :خواجہ محمود فغنوی:خواجہ علی رامتینی :خواجہ بابا سماسی: سید امیر کلال ) سلسلہ موجود ہیں۔

. وأخذ طریقۃ الذکر الخفی من الغجدوانی المیت فی المقبرۃ (المواہب السرمدیہ از محمد امین الکردی)

ذکر خفی کا طریقہ حضرت غجدوانی سے بعد از ظاہری پردہ فرمانے کے روضہ انور سے سے عطا ہوا ۔

ذکر خفی دراصل خواجہ عبد الخالق غجدوانی رحمۃ اﷲ علیہ کو خواجہ خضر علیہ السلام کے ذریعے سے حاصل ہوا جنہوں نے کہا کہ پانی کے حوض میں غوطہ لگا ئیں اور کلمہ طیبہ کا ذکر کریں خواجہ خضر ہی ان کے سبق کے پیر ہیں جبکہ خواجہ یوسف پیر صحبت و خرقہ ہیں(نفحات الاُنس ص409از عبد الرحمن جامی)

ایک نوجوان آپ کی محفل میں آیا اور سوال کیا اتقوا فراسۃ المومن فانہ ینظر بنور اﷲکا مفہوم کیا ہے فرمایا کہ اسکا بھید یہ ہے اپنی زنارکاٹ پھینکواور ایمان لے آؤاس نے کہا میں تو ایسا نہی آپ نے خادم کو اشارہ کیا تو خرقہ کے نیچے زنار تھی وہ ایمان لے آیا تو آپ نے اہل مجلس سے کہا کہ ہمیں بھی اپنی باطنی زنار اتاردینی چاہیئے تو سب پر ایک عجیب کیفیت طاری ہوگئی(نفحات الانس ص409)

سلطان العارفین حضرت بایزید بسطامی رحمۃ اﷲسے لوگوں نے پوچھا کیا بات ہے کہ کہ ہم آپ کی زبان سے ذکر نہیں سنتے تو آپ نے فرمایا زبان بھی بے گانہ ہے درمیان میں اس کی گنجائش ہی نہیں ہے ( ذکر و فکر ص19)

حضرت شیخ علاء الدین غجدوانی فرماتے ہیں

’’جب سے میں نے ہوش سنبھالا ہے میں ذکر الٰہی سے اتنی دیر کیلئے غافل نہیں ہوا جتنی دیر کیلئے پرندہ اپنی چونچ پانی میں ڈبو لے نہ حالت خواب نہ حالت بیداری میں‘‘(ذکر اﷲ ص146 بحوالہ رشحات از کاشفی)

حضرت خواجہ نقشبند قدس سرہ فرماتے ہیں کہ میں نے ایک شخص کو منی کے بازار میں تجارت کرتے ہوئے دیکھا کہ اس نے 50ہزار کی خرید وفروخت کی لیکن ایک لحظہ کیلئے بھی اس کے دل کو اﷲ کی یاد سے غافل نہ پایا( مکتوب نمبر 33جلد اول)

جب تک ذکر قلبی معصیتوں سے اجتناب کا ذریعہ نہ بن جائے اس وقت تک ذکر قلبی نہ کہلائے گا جیسا کہ رسول اﷲ ﷺ نے اس دعامیں فرمایا

اللَّہُمَّ اجْعَل وساوس قلبِی خشیتک وذکرک(الفردوس بماثور الخطاب)

اے اﷲ میرے دل کے وسوسوں کو بھی اپنی خشیت اور یاد بنا دے ۔

ایک اور حدیث مبارکہ میں یہ دعا منقول ہے۔

اللَّہُمَّ اقْسِمْ لَنَا مِنْ خَشْیَتِکَ مَا یَحُولُ بَیْنَنَا وَبَیْنَ مَعَاصِیکَ(سنن الترمذی)

اے اﷲ ہم میں اپنے خوف کو اتنا تقسیم کر دے کہ ہمارے اور ہمارے گناہوں کے درمیان حائل ہو جائے۔

الذکر الخفی : ہو رزق الأسرار(جلاء الخاطر من کلام شیخ عبد القادر جیلانی)

ذکر خفی یہ رازوں کا رزق ہے۔

الشیخ عبد الرحمن بن أبی بکر القادری

یقول : الذکر الخفی : ہو الخلاص من القیود ، والبقاء مع الشہود(مخطوطۃ تحفۃ العبّاد وأدلۃ الورّاد)

 شیخ عبد الرحمن بن ابی بکر القادری فرماتے ہیں ذکر خفی تمام قیدوں سے نجات دیتا ہے اور اس شہود (اﷲ تعالیٰ) کے ساتھ بقا عطا کرتا ہے۔

قَالَ رَسُولُ اللَّہِ صَلَّی اﷲُ عَلَیْہِ وَسَلَّمَ: اذْکُرُوا اللَّہَ تَعَالَی ذِکْرًا خَامِلًا قَالَ: فَقِیلَ: وَمَا الذِّکْرُ الْخَامِلُ؟ قَالَ: الذِّکْرُ الْخَفِیُّ

(الزھد والرقائق لابن مبارک)

 رسول اﷲ ﷺ نے فرمایا ذکر خامل(ذکر یا آواز کا کمزور یا پوشیدہ ہونا ) کے ساتھ یاد کیا کرو عرض کی گئی یا رسول اﷲ یہ ذکر خامل کیا ہے تو فرمایا ’’الذکر الخفی‘‘

اسی طرح اکثر حدیث کی کتابوں میں یہ الفاظ ملتے ہیں

خَیْرُ الرِّزْقِ مَا یَکْفِی، وَخَیْرُ الذِّکْرِ الْخَفِیُّ(الدعا للطبرانی)

 بہترین رزق وہ ہے جو کفایت کرے اور بہترین ذکر ذکر خفی ہے۔

اسی طرح رسول اﷲ ﷺ کا ارشاد گرامی ہے

فَضْلُ الذِّکْرِ الْخَفِیِّ عَلَی الَّذِی تَسْمَعُہُ الْمَلَائِکَۃُ کَفَضْلِ الْفَرِیضَۃِ عَلَی التَّطَوُّعِ(الترغیب فی فضائل الأعمال وثواب ذلک)

 ذکر خفی کی فضیلت اس ذکر کے اوپر جسے فرشتے سنتے ہیں اس طرح ہے جیسے فرائض کی فضیلت نوافل پر ہے۔

 عَنِ ابْنِ عَبَّاسٍ رَضِیَ اللَّہُ عَنْہُمَا فِی قَوْلِہِ تَعَالَی: إن اﷲ تعالی لَمْ یَفْرِضْ عَلَی عِبَادِہِ فَرِیضَۃً إِلَّا جَعَلَ لَہَا حَدًّا مَعْلُومًا، ثُمَّ عَذَرَ أَہْلَہَا فِی حال العذر غیر الذکر، فإن اﷲ تعالی لَمْ یَجْعَلْ لَہُ حَدًّا یَنْتَہِی إِلَیْہِ، وَلَمْ یَعْذُرْ أَحَدًا فِی تَرْکِہِ إِلَّا مَغْلُوبًا عَلَی تَرْکِہِ، فَقَالَ: فَاذْکُرُوا اللَّہَ قِیاماً وَقُعُوداً وَعَلی جُنُوبِکُمْ بِاللَّیْلِ وَالنَّہَارِ فِی الْبَرِّ وَالْبَحْرِ، وفی السفر والحضر، والغنی والفقر، والسقم والصحۃ، والسر والعلانیۃ، وعلی کل حال. (تفسیر ابن کثیر)

حضرت عبداﷲ بن عباس رضی اﷲ تعالیٰ عنہما فرماتے ہیں ہر فرض کام کی کوئی حد ہے ۔ پھر عذر کی حالت میں وہ معاف بھی ہے لیکن ذکر اﷲ کی کوئی حد نہیں نہ وہ کسی وقت ٹلتا ہے ۔ ہاں کوئی دیوانہ ہو تو اور بات ہے ۔ کھڑے بیٹھے لیٹے رات کو دن کو خشکی میں تری میں سفر میں حضر میں غنا میں فقر میں صحت میں بیماری پوشیدگی میں ظاہر میں غرض ہر حال میں ذکر اﷲ کرنا چاہیے ۔ صبح شام اﷲ کی تسبیح بیان کرنی چاہیے۔

وَقَالَ رَسُولُ اللَّہِ صَلَّی اللَّہُ عَلَیْہِ وَسَلَّمَ: ” لَفَضْلُ الذِّکْرِ الْخَفِیِّ الَّذِی لا یَسْمَعُہُ الْحَفَظَۃُ سَبْعُونَ ضِعْفًا فَیَقُولُ: إِذَا کَانَ یَوْمُ الْقِیَامَۃِ وَجَمَعَ اللَّہُ الْخَلائِقَ لِحِسَابِہِمْ وَجَاء َتِ الْحَفَظَۃُ بِمَا حَفِظُوا وَکَتَبُوا.قَالَ اللَّہُ لَہُمُ: انْظُرُوا ہَلْ بَقِیَ لَہُ مِنْ شَیْء ٍ؟ فَیَقُولُونَ: رَبَّنَا مَا تَرَکْنَا شَیْئًا مِمَّا عَلِمْنَاہُ وَحَفِظْنَاہُ إِلا وَقَدْ أَحْصَیْنَاہُ وَکَتَبْنَاہُ.فَیَقُولُ اللَّہُ عَزَّ وَجَلَّ وَتَبَارَکَ وَتَعَالَی: إِنَّ لَہُ عِنْدِی خَبْئًا لا تَعْلَمُہُ وَأَنَا أَجْزِیکَ بِہِ وَہُوَ الذِّکْرُ الْخَفِیُّ(مسند ابی یعلی)

رسول اکرم ﷺ نے فرمایا کہ وہ ذکر خفی ستر درجہ افضل ہے جسے حفظہ (یعنی اعمال لکھنے والے فرشتے) بھی نہیں سنتے چنانچہ قیامت کے دن جب اﷲ تعالیٰ تمام مخلوق کو حساب کتاب کے لئے جمع کرے گا تو حفظہ (اعمال لکھنے والے فرشتے) وہ تمام ریکارڈ لے کر حاضر ہوں گے جنہیں انہوں نے اپنی نوشت اور یادداشت میں محفوظ کر رکھا ہو گا وہ تمام ریکارڈ دیکھ کر اﷲ تعالیٰ ان سے فرمائے گا کہ دیکھو میرے بندوں کے اعمال میں اور کیا چیز باقی رہ گئی ہے (جو تمہارے اس ریکارڈ میں نہیں ہے) وہ عرض کریں گے! پروردگار!بندوں کے اعمال کے سلسلہ میں جو کچھ بھی ہمیں معلوم ہو اور جو کچھ بھی ہم نے یاد رکھا ہم نے اسے اس ریکارڈ میں جمع کر دیا ہے، اس ریکارڈ میں ہم نے ایسی کوئی چیز محفوظ کرنے سے نہیں چھوڑی جس کی ہمیں خبر ہوئی ہو تب اﷲ تعالیٰ بندہ کو مخاطب کر کے فرمائے گا کہ میرے پاس تیری ایسی نیکی محفوظ ہے جسے کوئی نہیں جانتا اور وہ ذکر خفی ہے میں تجھے اس نیکی کا اجر عطا کروں گا۔

أَنَّ عَائِشَۃَ قَالَتْ: “اَلذِّکْرُ اَلَّذِی لَا تَسْمَعُہُ اَلْحَفَظَۃُ یُضَاعَفُ عَلَی اَلَّذِی تَسْمَعُہُ اَلْحَفَظَۃُ بِسَبْعِینَ ضِعْفًا، فَإِذَا کَانَ یَوْمُ اَلْقِیَامَۃِ قَالَ اَللَّہُ لِلْعَبْدِ: لَکَ عِنْدِی کَنْزٌ لَمْ یَطَّلِعْ عَلَیْہِ أَحَدٌ غَیْرِی وَہُوَ اَلذِّکْرُ اَلْخَفِیُّ(مصنف ابن ابی شیبہ)

حضرت عائشہ سے مروی حدیث ہے اس ذکر کی فضیلت جسے حفظہ (یعنی اعمال لکھنے والے فرشتے) بھی نہیں سنتے اس ذکر پر جسے حفظہ سنتے ہیں ستر گنا زیادہ ہے ۔ جب قیامت کادن آئیگا تو اﷲ تعالیٰ اپنے بندے سے فرمائے گا تیرے لئے میرے پاس ایک خزانہ ہے جسے سوا میرے دوسرا کوئی نہیں جانتا اور وہ ذکر خفی ہے۔

قطب نما کی سوئی کے ایک سرے پر مقناطیس لگا ہوتا ہے وہ کہیں بھی ہو اپنا رخ شمال کی طرف کر لیتا ہے اسی طرح ذکر قلبی کے ساتھ اﷲ کے نور کو جب مرشد شامل کرتا ہے تو دل گناہ کے قریب جاتے ہی کانپنے لگتا ہے۔