صفات ذاتی سے مراد یہ ھے کہ جن سے باری تعالیٰ کی حمد بیان کی جائے نہ کہ اُن کی اَضداد سے، جیسے: طاقت (شانِ الٰہی) اور قَدر ومَنزِلت وغیرہ(کہ عجز وغیرہ سے ذاتِ باری کو -العیاذ باللہ- متصف نہیں کیا جاتا)۔

صفات ذاتیہ کی تفصیل

یہ وہ صفات ہیں، جن سے اللہ تعالیٰ ہمیشہ سے متصف ہے اور ہمیشہ متصف رہے گا،مثلاً علم،قدرت،حیات، ارداہ سمع ،بصر، کلام، بقا چہرہ،ہاتھ، قیومیت وجوب غنا قدوسیت صمدیت وغیرہ۔صفاتِ ذاتیہ سے مراد کان، آنکھ، زبان سے اُس کا سننا، دیکھنا، کلام کرنا نہیں ، کہ یہ سب اَجسام ہیں اور اَجسام سے وہ پاک۔ ہر پست سے پست آواز کو سنتا ہے، ہر باریک سے باریک کو کہ خُوردبین سے محسوس نہ ہو وہ دیکھتا ہے، بلکہ اُس کا دیکھنا اور سننا انہیں چیزوں پر منحصر نہیں ، ہر موجود کو دیکھتا ہے اور ہر موجود کو سنتا ہے ان کو صفات ثمانیہ حقیقیہ (آٹھ حقیقی صفات) بھی کہتے ہیں۔

خدا کی ذات کے ماوراء کسی شےٴ کا تصور کئے بغیران صفات کو خدا سے متصف کیا جائے۔ دوسرے الفاظ میں، ان صفات کو خدا سے متصف یا مرتبط کرنے کے لئے صرف خدا کی ذات ھی کافی ھے یعنی کسی خارجی امر کو مدنظر رکھنے یا ذات خدا کا ان سے تقابل کرنے کی کوئی ضرورت نھیں ھے۔ حیات وقدرت جیسی صفات اس زمرے میں آتی ھیں۔ اگر اس کائنات اور عالم ھستی میں ذات خدا کے ماسوا کوئی بھی موجود نہ ھو یعنی فقط اور فقط خدا تنھا ھو تو بھی خدا کو حی اور قادر کہا جاسکتا ھے۔

صفات ذاتیہ میں صفات خبریہ بھی شامل ہو سکتی ہیں جن کے اثبات کا انحصار صرف اللہ اور اس کے رسول سے منقول خبر پر ہے۔انہیں صفات ِسمعیہ یا نقلیہ بھی کہا جاتا ہے۔ یہ کبھی صفات ذاتیہ جیسے چہرہ اور دوہاتھ ہیں اورکبھی فعلیہ جیسے فرح و ضحک وغیرہ ۔ہوتی ہیں 

ملحوظہ: اللہ تعالیٰ کی صفاتِ ذاتیہ کے بارے میں متکلمین کا اختلاف ہے، ابومنصور ماتریدیؒ فرماتے ہیں کہ صفات ذاتیہ آٹھ ہیں : حیات، علم، قدرت، سماعت، بصارت، ارادہ، کلام اور تکوین؛ جب امام ابوالحسن اشعریؒ کے نزدیک سات ہیں ، انھوں نے تکوین کو صفاتِ ذاتیہ میں سے شمار نہیں کرایا ہے۔

عارف کامل تام المعرفت کو بقا ء ذات کے بعد جب صفات و اخلاق کا ملہ عطا فرماتے ہیں تو ان صفات میں سے ہر ایک  صفت  اس کی ذات کی کلیت کے طور پر متصف ہوکر ظہور کرتی ہے۔ یہ نہیں کہ اس کی ذات کا کچھ حصہ کسی  صفت  سے متصف ہو اور کچھ حصہ کسی  صفت  سے یعنی اس کی ذات بتمامہ علم اور بتما مہ سمع اور بتمامہ بصر ہوتی ہے۔ جیسے کہ محققین صوفیہ نے حق تعالیٰ  کی صفات کے بارے میں کہا ہے کہ اللہ تعالیٰ  کی ذات کلہ علم ہے اور کلہ قدرت اور کلہ سمع  اور کلہ بصر ہے یہی وجہ ہے کہ مومن لوگ بہشت میں اللہ تعالیٰ  کو بے جہت دیکھیں گے کیونکہ بالکل بصرہی بصر ہو جائیں گے اور جب ہمہ تن بصر ہوں گے تو پھر جہت کی کیا گنجائش ہوگی ۔ صوفیہ نے کہا ہے کہ جو کچھ عام مومنوں کو چنیں و چناں(بحث و تکرار) کے بعد آخرت میں میسر ہوگا وہ خاص مومنوں یعنی اولیاء کو دنیاہی میں میسر ہوجاتا ہے۔ کیونکہ ان کا ادھار ان کا نقد ہے۔ پھر قیاس کرنا چاہیئے کہ ان کا ادھار کیا کچھ ہوگا ۔ ع 

قياس کن گلستان من بہار مرا ترجمہ: اس گلستان سے میری بہار کو قیاس کرلے 

۔ ذَلِكَ فَضْلُ اللَّهِ يُؤْتِيهِ مَنْ يَشَاءُ وَاللَّهُ ذُو الْفَضْلِ الْعَظِيمِ ( یہ الله تعالیٰ  کا فضل ہے جس کو چاہتا ہے دیتا ہے اور الله تعالیٰ  بڑے فضل والا ہے۔)

) اسی طرح اس عارف کے لطائف میں سے ہر ایک لطیفہ اس وقت اس کی کلیت کے رنگ میں ظہور کرتا ہے یعنی عارف بتمامہ لطیفہ روح اور بتمامہ لطیفہ قلب ہو جاتا ہے۔ باقی انسانی لطائف یعنی نفس ناطقہ اور سر اور خفی اور اخفیٰ بھی اسی قیاس پر ہیں ۔ اسی طرح اس کے اجزاء میں سے ہر ایک جزو اور اس کے عناصر میں سے ہر ایک عنصرکل کا حکم پیدا کر لیتا ہے۔ یعنی عارف اپنے آپ کو ہمہ تن عنصرخاک معلوم کرتا ہے اور ہمہ تن عنصرآب تصور کرتا ہے۔ جب لطیفہ قلب جو حقیقت جامع ہے کل کے رنگ میں رنگا جاتا ہے تو وہ تعلق جو اس کی مضغہ قلبیہ سے ہوتا ہے دور ہو جاتا ہے اور یہ مضغہ اس وقت خالی رہ جاتا ہے اور جسد بے روح کی طرح دکھائی دیتا ہے اور ایسا متخیل ہوتا ہے کہ اس آمد و رفت(فنا و بقاء) میں اس کو اس راستہ کی گرد بھی نہیں لگی اور وہ اپنی اصلی صرافت(خالصیت) پر ہے جس طرح دیگ پختہ میں کوئی دانہ کچا اصلی صرافت پر رہ جائے نہ آگ کی گرمی اس میں تاثر کرے اور نہ پانی کی رطوبت اس کو پہنچے۔ حاصل کلام یہ کہ قلب اس تعلق کے رفع ہونے اور خالی ہو جانے کے بعد تمام اجزاء کے رنگ میں رنگا جاتا ہے اور دوسرے اجزاء کی طرح کل کاحکم پیدا کرلیتا ہے۔ 

مکتوبات حضرت مجدد الف ثانی دفتر سوم صفحہ189ناشر ادارہ مجددیہ کراچی