حمدوصلوۃ اورتبلیغ دعوات کے بعد واضح ہو کہ آپ کا مکتوب شريف جو جناب مولانا مہدی علی کے ہمراہ ارسال کیا تھا،پہنچا اور بڑی خوشی کا موجب ہوا۔ الله تعالیٰ کی حمد اور احسان ہے کہ فقراء کی محبت جو دنیا و آخرت کی سعادت کا سرمایہ ہے۔ آپ کو کامل طور پر حاصل ہے اور مفارقت کی دراز مدت نے اس میں کچھ اثر نہیں کیا۔ دو چیزوں کی محافظت ضروری ہے۔ ایک صاحب شريعت ﷺکی متابعت دوسرا شیخ مقتداء کی محبت واخلاص۔ ان دو چیزوں کے ساتھ اور جو کچھ دے دیں سب نعمت ہی نعمت ہے اور اگر کچھ بھی نہ دیں لیکن یہ دو چیزیں راسخ اور مضبوط ہوں تو غم نہیں۔ آخر ایک دن دے دیں گے اور اگر ‌نَعُوذُ ‌بِاللَّهِ ان دو چیزوں میں سے کسی ایک میں خلل پڑ جائے اور احوال و اذواق  بدستور اپنے حال پر رہیں تو ان کو استدراج جاننا چاہیئے اور اپنی خرابی اور بربادی خیال کرنی چاہیئے۔ استقامت کا طریق یہی ہے۔ وَالله سُبْحَانَهُ الْمُوَفِّقُ (اللہ تعالیٰ ہی توفیق دینے والا ہے) والسلام۔ 

مکتوبات حضرت مجدد الف ثانی دفتر اول صفحہ343 ناشر ادارہ مجددیہ کراچی

وہ مکتوب جو محبت کے نشان والے مولانا قاسم علی نے بھیجا تھا، پہنچا اور خط کا مضمون واضح ہوا۔ اللہ تعالیٰ  فرماتا ہے۔ مَنْ عَمِلَ صَالِحًا ‌فَلِنَفْسِهِ وَمَنْ أَسَاءَ فَعَلَيْهَاجس نے کوئی نیک کام کیا تو وہ اس کے اپنے نفس کے لئے ہے اور جس نے کوئی برائی کی وہ اسی کے لئے وبال ہے۔ 

خواجہ عبدالله انصاری رحمتہ الله علیہ فرماتے ہیں کہ الہٰی جس کو  تو تباہ کرنا چاہتا ہے اس کو تو  ہمارا دشمن بنا دیتا ہے

ترسم آں قوم که بردرد کشاں می خندند بر سرکار خرابات کنند ایمان را

 ترجمہ: طعن کیوں کرتے ہو  ان پر جو پئے ہیں تلچھٹ  میکدے پر ایمان نہ کھو بیٹھو تم 

حق تعالیٰ  سید البشر ﷺ کے طفیل تمام مسلمانوں کوفقراء کے انکار اور درویشوں کے طعن سے نگاہ رکھے۔ 

مکتوبات حضرت مجدد الف ثانی دفتر اول صفحہ304ناشر ادارہ مجددیہ کراچی