بِسْمِ اللہِ الرَّحْمٰنِ الرَّحِیْمِ  اَلْحَمْدُ لِلّٰہِ رَبِّ الْعٰلَمِیْنَ  وَالصَّلٰوۃُ وَالسَّلَامُ عَلٰی سَیِّدِ الْمُرْسَلِیْنَ اَمَّا بَعْدُ فقراء کے گھرویران ہو گئے ہیں اوران کے شہروں کی بنیادیں ہل گئی ہیں۔ فقراء رحلت کرگئے ۔ا وربھلائے جا چکے ہیں اب تونقال اور بہروپئے  بہت پیدا ہو گئے ہیں جوغیبت اور جھوٹ، دنیا کی طلب  اور فریب  ونفاق ، بغض و کدورت  اور خیانت و کینہ ،حسد و تکبراور غصہ وحرص ریاکاری اوردشمنی وعداوت مال و دولت کی خواہش اورسلاطین و امراء کی صحبت اورحرام خوری  میں مشغول ہیں اور یہ  وہ مشاغل ہیں کہ جن سے دل حقیقی مردہ ہوجاتا ہے۔

 ایسے اشخاص کی تو شہادت بھی قابل قبول نہیں ہوتی توپھران کی پیروی کرنا اوران سے خلف(خلافت) و تبلیغ  کی سند حاصل کر ناکس طرح جائز اور روا ہو سکتے ہیں؟ ۔

لہذا میں نے چاہا کہ ایک کتاب  میں سالکین اور فقراء اور عارفین کے علم کی باتیں تحریرکردوں  (تاکہ لوگ اس سے رشد و ہدایت پا سکیں  اور صحیح تعلیمات زیاد سے زیادہ اشخاص  تک پہنچ  سکیں) پس اس خواہش کے تحت میں نے یہ کتاب تصنیف کرنے کا عزم کرلیا اورقلم کوجننش دی ۔

میں اس کتاب کا نام اسرار العارفین وسیرالطالبین رکھتا ہوں اور خداوندکریم سے اس کتاب کو مکمل کرنے کی توفیق کا سوالی ہوں  جس طرح  کہ اس سے اپنے فضل کرم اس کتاب کا موضوع اور نام عطا کیا ہےاورمدد نہیں ملتی  مگر صرف اللہ تعالی کی طرف سے  اور وہی کل باتوں پرقادر ہے اور اس بات پربھی کہ وہ اس کتاب کو حسب پسند بناکرقبول فرمائے ۔

(شیخ الشیوخ )ابو حفص  شہاب الدین عمر  سہروردی   

 سیر ۃ نمبر1:۔ قرب خدا کا راستہ

بندے کو اس وقت تک حق تعالی کا قرب اور تقدس (اخلاص)حاصل نہیں ہوتا جب تک  وہ مخلوق سے دوری اختیارنہیں  کرتاکیونکہ لوگوں کا قرب بندے کواللہ  تعالی کے ذکر و عبادت اور اطاعت سے نیزکل کائنات پر اللہ جل جلالہ کی بادشاہت  واختیار اور قدرت اورملکوت کے بارے میں غورو فکر سے باز رکھتا ہے۔

 پس خداوندکریم کاقرب حاصل کرنے کیلئے بجزاس کے اورکوئی  صورت نہیں ہے  کہ مخلوق سے دوری اختیار کی جائے جس طرح کہ سلطان کا قرب غیر سلطان سے الگ ہوئے بغیر حاصل نہیں کیا جا سکتا اسی طرح بندے کو مولی کا قرب غیرمولی سے دوری اور علیحدگی اختیار کئے بغیر صحیح طور پر  ممکن نہیں ہے۔

سیر ۃ نمبر2:۔صفات شیخ

 شیخ وہ ہوتا ہے جس کی ذات تقدس(اخلاص) حاصل کر چکی ہوجسکی غیر پسندیدہ  صفات فناوصفات حمیدہ بقا پا چکی ہوں ۔

 کسی  شخص کوا گربعض کرا متیں  میسر آبھی جائیں  تو بھی  وہ اس وقت تک مسندمشیخت (بزرگی)پر متمکن ہونے کا اہل نہیں جب تک  اس میں  وہ صلاحیت نہ  پیدا ہوجا ئے جس سے کہ کاملین دوسروں کی رہنمائی کرتے ہیں ایسا شخص تو خوداس بات کا محتاج ہے کہ اسکی اصلاح و تربیت کی جائے اور مرشد کامل اس کو معرفت و طریقت سکھائے ۔

حضرت  شیخ  ابوالغیث یمنی رحمۃ اللہ علیہ نے ایساہی ارشاد فرمایا ہے ۔

سیر ۃ نمبر3:۔طریق فقراء

 جس نےصوف اورجبہ پہنا اس نے لذیذ اور مرغن غذا  نہ کھائی۔ وہ بادشاہوں سے اور اہل دنیا سے میل جول نہیں رکھتا جس نے ایسا نہیں کیا اس نےنبیوں اوراہل سلوک کے لباس کا حق ادا نہیں کیا بلکہ اس میں خیانت اختیار کی ۔

سیر ۃ نمبر4:۔تاثیر صحبت

 فقیرکے لئے بادشاہوں اور سلاطین سے میل جول حلال نہیں ہے کیونکہ ان کی صحبت سے فقیر کا دل مردہ ہوجاتا ہے۔ حضرت علی کرم اللہ وجہ سے  روایت ہے  کہ بادشاہوں کی صحبت فتنہ ہوتی ہے اور ان کا کھانا فقیروں کے لئے ایک ایسازہرقاتل ہوتا ہے جس کا کوئی تریاق نہیں۔

آنحضرت ﷺ کا ہی ارشادگرامی ہے کہ علم سے معرفت میسر آتی ہے اور ظالم کا چہرہ دیکھنے سے قلب سیاہ ہو جاتا ہے اورمعرفت حاصل نہیں ہوتی۔

 روایت ہے کہ  حضرت ابوالحسن نوری رحمۃ اللہ علیہ  نے ارشاد فرمایا کہ جس طرح ایک بدکارتاثیر  صحبت سے نیکو کاربن جاتا ہے اسی طرح  نیکو کار بھی بد کاروں  کی  صحبت سے بدکار بن جاتا ہے اور جو بھی اس مسئلے کا انکار کرتا ہے وہ جھوٹا گمراہ اور بے ایمان ہے کہ حدیث شریف کا انکار کرتا ہے ۔ کیونکہ حضرت رسول اللہ ﷺ کا ارشاد گرامی  ہے-   الصُّحبة مؤثّرة (صحبت اثر کرتی ہے)

 حضرت علی کرم اللہ وجہہ نے ارشادفرمایا ہے کہ صالحین کی صحبت اہل عالم کے لئےنو راور رحمت ہے۔

سیر ۃ نمبر5:۔دائمی ذکر اللہ

سالک کوچا ہے کہ وہ ذکراللہ میں کثرت سے مشغول رہے تا آنکہ اس کے جسم کے بالوں میں سے ہر ایک بال زبان بن جائے (یعنی ہرایک بال بھی ذکر اللہ میں مشغول ہوجائے)

سیر ۃ نمبر6:۔ثمرہ بیعت و ریاضت

 ارادت کاثمرہ ہے کہ ایک طالب ہدایت بیعت کے بعد ریاضت نفس اور راہ سلوک پر گامزن ہوکر خود کو اہل دنیا،امیروں، بادشاہوں اورہوائے نفس سے دور رکھتا ہے ۔

سیر ۃ نمبر7:۔ فضولیات سے پرہیز

  مبتدی مرید کو چاہئیے کہ وہ تمام فضول باتوں مثلا فضول نظر فضول کام فضول کھانے پینے اور جملہ صغیرہ وکبیرہ گناہوں سےبچتار ہے۔

سیر ۃ نمبر8:۔قلت کلام

روایت ہے کہ حضرت ابو بکرشبلی رحمۃ اللہ علیہ نے ارشاد فرمایا ۔ طالب مولا اورخصوصا مرید کوچا ہئیے کہ وہ بغیرحاحبت کلام نہ کرے۔

سیر ۃ نمبر9:۔ شکر و منت شیخ

جب مر یدخلوت اور عزلت سے فارغ ہوکرباہر نکلے تو اپنے شیخ محترم کےقدم مبارک پرشکرومنت کے طریق پر اپنا سر رکھ دے (کیونکہ حضرت شیخ کے قدموں کی برکت سے ہی اس کویہ سعادت ملی کہ اس نے وہ خلوت وعزلت مکمل کر لی اورفیوض و برکات عالیہ سے بہرہ ور ہوا)

بعض فقہا نے کہا ہے کہ ایسے فعل سے کافر ہو جاتا ہے لیکن ان فقہا میں سے اکثر  اس  تکفیر کے بعد اس بات کے قائل ہو گئے کہ یہ فعل یعنی( سجدہ شکر) تحیت یعنی دعا وسلام ہے نہ کہ عبادت کیوں کہ شیخ مرید کو گمراہ کرنے والا نہیں ہوتا ۔

نوٹ:۔ اس نکتہ کی وضاحت کے لئے کہ شیخ کامل کی توجہ اگرشامل حال نہ ہو تومنتہی مرید بھی فیوض و برکات عالیہ سے بے بہرہ رہتا ہے۔ ایک مستند اقتباس ملاحظہ ہوحضرت عبد الرحمن جامی رحمۃ اللہ علیہ نفحات الانس میں ناقل ہیں شیخ نجم الدین کبری ولی تراش رحمۃ اللہ علیہ اپنی کتاب فاتح الجمال میں رقم طراز ہیں جب میں شیخ عماریاسر رحمۃ اللہ علیہ  کی خدمت میں پہنچا اوران کے حکم سے خلوت میں بیٹھا تومیری طبعیت میں یہ گمان گذراکہ میں نے علوم ظاہری  بھی پڑھے  ہیں  لہذا جب مجھے غیبی فتوحات  حاصل ہوں گی تو میں منبر پر چڑھ کر ان کو طالبان حق کو سناؤں گا۔ چنانچہ جب میں اس نیت  سے خلوت میں آیا تو خلوت کا پورا ہونا میسر نہ  ہوا تب میں باہرنکل آیا حضرت شیخ نے مجھ  سے ارشاد فرمایا پہلے دل کی نیت درست کرپھر خلوت کر نیز آپنے اپنے نورباطن کا پرتومیرے دل پرچمکا تو میں نے اپنی کتابوں کو وقف کر دیا اور کپڑے فقرا کو دیدیئے ۔ صرف ایک  جبہ  جوکہ پہنا ہوا تھا وہ رہنے دیا اور دل میں کہا کہ  یہ خلوت  خانہ میری قبر ہے اور کفن  کے اس جبہ  کو دوبارہ باہرآ ناممکن نہیں ہوگا نیز میں نے قصد کیا کہ اگر باہر نکلنے کی خو اہش غالب ہونےلگی تومیں اس جبہ  کو ہی پھاڑدوں گا  تاکہ ستر باقی نہ رہے اورحیا باہر نکلنے سے مانع ہوجائے اسی لمحہ  حضرت شیخ نے میری جانب دیکھا اور ارشاد فرمایا  اب آکے تو نے اپنی نیت درست کر لی ہے پس جب  میں  خلوت میں بیٹھا تو وہ پوری ہوگئی اور حضرت شیخ کی توجہ کی برکت سے فتوحات کے دروازے مجھ  پر کھل گئے۔ )

سیر ۃ نمبر10:۔ اصل طریقت

 درویشی در اصل  دنیا سے پرہیز کر نے کا ہی نام ہے جیساکہ حضرت رسول اللہ ﷺنے ارشاد فرمایا ہے۔ حُبُّ ‌الدُّنْيَا ‌رَأْسُ ‌كُلِّ ‌خَطِيئَةٍوفتنة وبلية   دنیا کی محبت تمام خطاؤں اور فتنوں اور  بلاؤں کی جڑ ہے)

سیر ۃ نمبر11:۔ذکر ومراقبہ

جو مرید کہ درویش طبع ہوتا ہے وہ بقدر حاجت حصول روزی کر کے ذکر الہی میں مشغول ہوجاتا ہے۔ وہ لوگوں میں بیٹھنا پسند نہیں کرتا اور مراقب ہوجاتا ہے۔ مراقبہ کے معنی مغیبات  جیسے عالم ملکوت وغیرہ میں نظرکرنا ہے اور بعض حضرات کا قول ہے کہ مراقبہ ہرلمحہ و ہرلحظہ غیب  کے ملاحظہ کے لئے روحانی سیر ہے۔

سیر ۃ نمبر12:۔خلوت کا ثمرہ

خلوت لوگوں سے میل جول کا ترک کرنا ہے خواہ درویش بظاہران کے درمیان ہی رہے ۔ بعض نے کہا ہے کہ خلوت اس بات کا نام ہے کہ دل ذکراللہ کے سوا باقی تمام اذکار سے خالی ہوجائے اوربعض نے اس بارے میں فرمایا ہے کہ ذکر سے انس پیدا ہو جائے تویہی مراقبہ ہے۔

 خلوت کی مدت چالیس یوم  ہے جیساکہ حضرت رسول اللہ ﷺکا ارشادگرامی ہے۔

‌مَنْ ‌أَخْلَصَ لِلَّهِ الْعِبَادَةَ أَرْبَعِينَ يَوْمًا، ظَهَرَتْ يَنَابِيعُ الْحِكْمَةِ مِنْ قَلْبِهِ عَلَى لِسَانِهِ

جوکوئی چالیس دن تک اللہ کی طرف خلوص دل سے متوجہ رہے توحکمت کے چشمے اس کے دل سے پھوٹ کر اس کی زبان پر آجاتے ہیں ۔

سیر ۃ نمبر 13:۔عزلت

عزلت یہ ہے کہ تو اہل زمانہ سے دور ہوجائے ، طمع و نفس کی برائیوں اور اس کی شہوتوں کو ترک کر کے پرہیزگاری اختیارکرلے۔

سیر ۃ نمبر 14:۔قلب مرده

اہل دنیا اور مالدارلوگوں کی صحبت سے قلب مردہ ہوجاتا ہے نعوذ باللہ منہا( اللہ پاک اس سے اپنی پناہ میں رکھے) اور جب مومن کا قلب مر جاتا ہے تو وہ سنگ وخشت بن جاتا ہے پس پھردہ جو چاہتا ہے کہنے لگ جاتا ہے (یعنی فضول اور لایعنی باتیں کہنے لگتا ہے )

سیر ۃ نمبر 15:۔طلب د نیاوطلب حق برعکس فعل ہیں

 حضرت حسن بصری رحمۃ اللہ علیہ  امیرالمومنین حضرت علی کرم اللہ کرم اللہ  وجہ سےروایت  کرتے ہیں کہ انہوں نے فرمایا  جب  تم کسی کو دیکھو کہ و ہ  لوگوں میں   میل جول رکھتا ہے اور دنیا کا طالب ہے اور خدا کی طلب بھی کرتا ہے تو جان لو کہ وہ زندیق اور مردود ہے اور دنیا کےچوروں  میں سے ایک چور ہے۔

سیر ۃ نمبر 16:۔طالب خدا

حضرت ابویزید بسطامی رحمۃ اللہ علیہ سے روایت ہے کہ آپنے ارشادفرمایا:۔ طالب دنیا طالب خدانہیں ہوتا اور اہل سلوک اس طریق طلب خدامیں سالکوں سے پیار و محبت   رکھتے ہیں نہ  کہ ا  ہل دنیا سے۔

سیر ۃ نمبر 17:۔اتباع سنت

جو شیخ کہ مذہب اہل سنت و جماعت کے قانون پر نہ ہو اور اسکی حرکات و سکنات  کتاب اللہ اورسنت رسول اللہ ﷺ کے موافق نہ ہوں تو وہ دین کے چوروں اور ڈاکوؤں میں سے ہے۔

سیر ۃ نمبر 18:۔ فقراء کا مالداری کا معیار

 حضرت علی کرم اللہ وجہ سے روایت  ہےکہ آپنے ارشاد فرمایا کہ لوگوں میں بدترین اور دوسروں کو گمراہ کرنے والا وہ شخص ہوتا ہے جو دنیا کا غم کھاتا ہو۔ پوچھا گیا کہ دنیا دارکون ہوتا ہے؟

اپنے ارشاد فرمایا :۔جوبھی ایک شبانہ روز کی قوت (خوراک) سے زیادہ طلب کرے وہ مالدار ہے  نہ کہ فقیر یہی وجہ ہے کہ حضرت ام شافعی رحمۃ اللہ علیہ  نے ہر اس شخص پر صدقہ فطر واجب قراردیا ہے جس کے پاس ایک دن رات کی قوت (خوراک) سے زیادہ ہو۔

سیر ۃ نمبر 19:۔ اقسام قلب

حضرت علی کرم اللہ وجہ سے روایت ہے کہ اپنے ارشاد فرمایا ۔ قل تین قسم  کے ہوتے ہیں۔ قلب سلیم ،قلب  منیب اورقلب شہید

قلب سلیم  وہ ہے کہ اس میں معرفت خدا کے سوا کچھ اور نہ ہو۔

 قلب منیب  وہ ہے جو مخلوق کو دیکھ کر خالق کی طرف راجع ہوتا ہے ۔

قلب شہید وہ ہے کہ اللہ  تعالی وتقدس کوہر چیز میں مشاہدہ کرتا ہے ۔

سیر ۃ نمبر 20:۔شیخ عارف و دانا ہوتا ہے ۔

شیخ کو لازم ہے کہ مرید کے احوال سے عارف ودانا ہو تاکہ وہ حسب حال مرید کونصیحت اوراس کی رہنمائی کر سکے اور جو ایسا نہیں ہے تو وہ گمراہ ہے اور دوسروں کو بھی گمراہ کرنیوالا ہے۔  

سیر ۃ نمبر 21:۔ دنیا مردار ہے

 مرید کو یہ امر زیب نہیں دیتا کہ اس کے قلب میں ذرہ بھر بھی حب دنیا باقی ہوکیوں کہ دنیا مردار ہے پس اس کا ایک ذرہ بھی خون کے قطر کی مانند ہے کہ جب وہ پانی میں گرجائے تو تمام پانی فاسد و نا پاک ہو جاتا ہے ۔

سیر ۃ نمبر 22:۔زہر قاتل

 مشائخ طریقت نے ارشادفرمایا ہے کہ دولتمندوں کی صحبت فقیر کے لئے ایسا زہرقاتل ہے کہ جس کی کوئی دوانہیں حاصل  کلام یہ ہے کہ اہل دنیا سے  ہر ممکن طریقے پر پرہیز  لازم ہے کیونکہ دنیاکی محبت نے لوگوں کے دلوں میں گھر بنا لیا ہے (پس ان کی صحبت سے ضررعظیم پہنچے گا)

سیر ۃ نمبر 23:۔مشائخ کرام کا معیار

 حضرت ذوالنون مصری رحمتہ اللہ علیہ سے روایت ہے  کہ آپنے ارشاد فرمایا:۔

 جس نے بھی ایک رات اس طرح گزار لی کہ اس کے دل میں کسی مسلمان کی طرف سے کینہ و کدورت قائم رہا تو اس کا نام فقراء  کے دیوان سے مٹادیاجاتا ہے بعض محققین کا ارشادہے کہ ان کے مذہب میں کدورت اس بات کا نام ہے کہ بے احترام کسی مسلمان  بھائی  کا نام لیا جائے ۔

سیر ۃ نمبر 24:۔ خاص نکتہ

 اے طالب صادق جان لوکہ جب تم  خودکو دنیا میں پڑا ہوا دیکھو اورتم دنیاوی جاه ورفعت اور قدرومنزلت کے دلداہ ہوجاؤ اور لوگوں کے لطف وکرم کے اسیر ہوجاؤ تو تم کو اپنے نفس کی اس حالت پر روناچا ہیئے کیو نکہ فقر تو در حقیقت حب  دنیا سے کنارہ کشی اختیار کرنے کا نام ہے ۔

سیر ۃ نمبر 25:۔ فقیر اور مالدار

 تمام مذاہب میں در ویش کے لئے اہل دنیا سے اختلاط کرنا اور بادشاہوں اور سلطانوں کے دروازے پر جانا حلال نہیں ہے حضرت علی ابن ابی طالب رضی اللہ عنہ نے ایسا ہی ارشاد فرمایا ہے۔

وہ بدترین در ویش ہے کہ جو کہ مالدار کے دروازے پر آتا ہے اورنیک ترین دولتمند وہ ہے جو درویش کی خدمت میں حاضر ہوتا ہے ۔

روایت ہے کہ عراق کا بادشاہ تین سال تک مریض رہا۔ اس نے حضرت شیخ سہل بن عبد اللہ تستری رحمتہ اللہ علیہ کو بہ عجز وانکسارطلب کیا تاکہ وہ اس کے لئے دعا کریں اور اس پر اپنی شفقت اور شفاء کی نظرمبذول فرمائیں چنانچہ ان کی شفقت کی نظر اور دعا کی برکت سے بادشاہ نے شفا پائی حضرت شیخ سہل بن عبداللہ تستری رحمتہ اللہ علیہ جب اپنی قیام گاہ پر واپس تشریف لائے تو تین سال تک عزلت نشین رہے۔(گو یا آپنے بادشاہ سے صرف ایک ملاقات کرنے کا یہ کفار اداکیا۔ حالانکہ یہ ملاقات بھی اپنے کسی مقصد کے لئے نہیں  کی تھی بلکہ صرف بادشاہ کی شفا یابی کی دعا اور اور نظر کرم کے لئے تھی)

سیر ۃ نمبر 26:۔ نجات کا راستہ

  جو شخص کہ ہمیشہ دنیا     میں مشغول رہتا ہے وہ  ہمیشہ ہی حق سبحانہ وتعالی سے دور رہتا ہے کیونکہ دنیا میں مشغول ہوجانا ایک بہت بڑا حجاب ہے اور اہل دنیا سے نجات پانے کا راستہ یہی ہے کہ اللہ تعالے کے ذکر وعبارت کو اختیار کیا جائے ۔

سیر ۃ نمبر 27:۔ سالکین  و عارفین  کا پہلا قدم

سالکون  اور عارفوں کی راہ میں پہلا قدم ہی یہ ہے کہ علائق دنیا سے بالکل قطع تعلق کرلیا جائے جبسیاکہ حضرت رسول اللہ ﷺ نے ارشادفرمایا ہے :۔

 طالب الدنيا لا يكون طالب المولى طالب دنیامولا کریم کاطالب نہیں ہوسکتا۔

اکثر اہل سلوک سے منقول ہے کہ اگر انہیں کس کو کبھی کوئی مہم یا کوئی اور  عظیم  پیش آتا تووہ گدڑی یا کملی پہن لیتے اور گردن یا پاؤں میں یا سر پرزنجیرڈ ال کر حق سبحانہ و تعالی کے حضور مناجبات کرتے جو فورا قبول ہوتی اور یہ امرجان لو کہ زنجیر یارسی گلے یا پاؤں  میں ڈالنا  ایک مستحسن  فعل ہے اور حضرت داؤدعلی نبینا وعلیہ الصلواۃ والسلام کی سنت ہے   مراد انتہائی درجہ تواضع و انکسار، محتاجی انتہائی تنظیم اور رقت قلب کے سوا اور کچھ نہیں

 مندرجہ بالا بیان کی تائید میں یہ ہے کہ بعض تابعین رضوان اللہ تعالی  علیہم اجمعین سے کسی نے روایت کی ہے کہ میں نے امیرالمومنین حضرت عمر بن الخطاب رضی  تعالی عنہ کو دیکھا کہ ان کی پشت مبارک پر دُرّوں کے نشانات تھے۔ میں  حضرت عبداللہ بن عمر رضی اللہ عنہ کی خدمت میں گیا اور بیان کیا کہ میں نے حضرت امیر المومنین  کو دیکھا کہ ان کی پشت مبارک پر دُرّوں کے نشانات ہیں ۔ حضرت عبداللہ بن عمر رضی اللہ عنہ نے جواب میں ارشاد فرمایا:۔

 سبحان اللہ! وہ کون ہے  جو حضرت امیرالمومنین درہ مار سکے ۔ حضرت  روزانہ خلوت میں جاتے ہیں اور اس وقت اپنے نفس کا محاسبہ کرتے ہیں اورجمعہ  کی رات کو حضرت دُرّہ لے کر اپنے نفس مارتے اور فرماتے کہ تو نے ایسا کیا اور تو نے ویسا کیا۔

والحمد للہ على الاختتام وعلى رسولہ الصلوة والسلام

بِسْمِ اللَّهِ الرَّحْمَنِ الرَّحِيمِ

مرید کو شیخ کی خدمت میں جانا ، اور اس کی خدمت میں بیٹھنے کے آداب اور اطوارسے واقف ہونا اور ان پر عمل کرنا نہایت ضروری ہے ۔ کیونکہ جب مرید شیخ کی خدمت میں مودب رہے گا تو شیخ کے دل میں اس کی محبت پیداہوجائے گی ، اور جب شیخ کے دل میں اس کی محبت اثر کر گئی تو اس وسیلہ جمیلہ سے مرید کا وجود رحمت الہی اور برکات وفیوض لامتناہی میں شامل ہوجائے مرید کا شیخ کے حضور میں مقبول ہونا ، اس بات کی کھلی دلیل ہے کہ وہ خدا وندکریم اور رسول علیہ الصلوۃ والسلام اور سب مشائخ کے حضور میں جو اس کے شیخ اور رسول علیہ السلام کے درمیان واسطہ ہیں مقبول ہوچکا مقبول اہل دل مقبو ل خداست یعنی جو شخص اہل دل حضرات کے نزدیک مقبول ہے ، وہ خدا کے  نزدیک  بھی مقبول ہے

شیخ کے بعض حقوق تربیت کا بدلہ سواحسن آداب کے اور کچھ نہیں ۔ چوں کہ مرید کو علماء اور مشائخ کے ساتھ ابوت معنوی(ایک معنی سے باپ کی جگہ) کی نسبت ہے اس واسطے ان کی  تعظیم و توقیر  بھی  نہایت ضروری ہے ، اور اس امرمیں کوتاہی کرنا بے معنی بزرگوں کی خدمت اور بڑوں  کی قدر

شناسی   بہت ضروری امرہے حدیث شریف میں وارد ہے کہ مَنْ ‌لَمْ ‌يَرحَم ‌صَغِيرَنَا، وَلَم ‌يُوَقر ‌كَبِيرَنَا – فَلَيسَ مِنَّا

یعنی جوشخص چھوٹوں پر رحم نہ کرے اور بڑوں کی تعظیم نہ کرے وہ ہم میں سے نہیں ہے ، خاص کر شیخ جو خدا وند کریم کی حضوری کا نہایت ہی نزدیک وسیلہ ہے۔اگر کوئی شخص اس کے حقوق میں کوتاہی کرے گا تو وہ خداوند کریم کے حقوق ادا کر نے میں قاصر کہلائیگا من ضیع رب الأدنى لم یصل رب الأعلى یعنی جس نے چھوٹے مربی کے حقوق کو ضائع کیا ، وہ بڑے مربی یعنی پروردگار تک نہیں پہنچ سکتا۔ مریدوں میں شیخ کا وجود گو یانبی علیہ السلام کے وجود کا نمونہ ہے صحابہ رضی اللہ عنہم میں چونکہ شیخ مخلوق کو خدا کی طرف دعوت دینے والا ہے اور رسول اللہ ﷺ کی پیروی کی رو سے پیغمبرعلیہ الصلوۃ والسلام کا نائب ہے کیونکہ الشیخ فی قومہ  کالنبی فی امتہ کے معنی میں شیخ اپنے مریدوں میں ایسا ہے جیسے نبی اپنی امت میں کلی اورجز ئی آداب جن کی نگاہ داشت اور لحاظ مرید کو شیخ کے حضور میں لازم ہیں وہ پندرہ ہیں ۔

پہلاادب:۔مرید کو لازم ہے کہ اپنے شیخ کو مریدوں کی تربیت و ارشاد اور تادیب و تہذیب میں اس زمانے کے مشائخ سے اعلی اور اکمل جانے بلکہ یہی اعتقاد رکھے کیونکہ اگر کسی دوسرے کو اس کا ہم پلہ یا اس سے زیادہ سمجھے گا تومحبت والفت کا تعلق ضعیف اور سست ہوجائے گا ۔

بنا بریں مشائخ کرام کے اقوال اور احوال کی سرایت کا رابطہ شیخ کے ساتھ محبت رکھنے سے ہوتا ہے مرید کو اپنے شیخ کے ساتھ جس قدر زیادہ  محبت ہو گی اسی قدراس کی تربیت کی استعدا د قوی ہوتی جائے گی ۔ (یہاں یہ خیال نہ کرے کہ میرے شیخ کے سوا ادنیا میں کوئی ولی اللہ اور  خدا کا دوست نہیں ہے ۔

خاکساران جہاں رابحقارت منگر            توچہ دانی که در یں گرد سواری باشد

یعنی دنیا کے خاکساروں کو حقارت کی نظر سے نہ دیکھ ۔ تجھکو کیا معلوم کراس غبار میں کوئی شہسوار پوشیدہ ہو  اس باب میں بعض احباب افراط و تفریط سے کام لیتے ہیں جو انکی ہلاکت کا باعث ہےیعنی جب انکے سامنے کسی شیخ سجادہ نشین کا ذکر ہوتا ہے تو اس کی غیبت بلکہ تحقیر کرتے ہیں یا اس کے عیوب بیان کرنے لگتے ہیں اس سے بڑھ کر انکی ہلاکت کے لیے کوئی بدی نہیں۔ کیوں کہ الغيبة أشد من الزنا یعنی غیبت زنا سے بھی زیادہ بری شے ہے بعض تو بے جھجک بول اٹھتے ہیں کہ آجکل کے فلاں سجادہ نشین یا شیخ نے دکان داری پھیلائی ہے ۔ یہ کلمہ بھی قابل غورہے گراگر وہ سجادہنشین یا شیخ باطنی تکمیل سے بے بہرہ ہے اور بظاہر بنا ہوا ہے تو اس کے مکر اور دھوکے کا حساب خداوندکریم اس سے قیامت میں لے گا ۔ چنانچہ اس حالت میں بھی غیبت درست نہیں ۔

ہر کرا جا مہ پارسا بینی    پارسادان ونیک مرد انگار

یعنی  جس شخص  کا لباس پارساؤں کا ساد یکھ اسکو پارسا اور نیک خیال کر۔

درندانی که در نهادش چیست ٍٍمحتسب را درون خانہ چه کار

اور اگر تونہیں جانتا کہ اس کے دل میں کیا ہے تو کیا حرج ہے آخر دار وغہ آبکاری کو اس کے گھریلو  معاملات سے کیاغرض ؟ اور اگر وہ باطنی کمال سے بہرہ ور ہو تو خیال کرو کہ خدا کے دوست کی غیبتت تمہیں کہاں پہنچائیگی الحذر الحذر من الغیبة غیبت سےپر ہیزکر غیبت کرنے والا اپنی تمام نیکیاں دوسرے کو دےدیتا  ہے)

دوسراادب  :۔شیخ کی صحبت کے التزام میں کمرہمت بندھی رہے یعنی طالب اپنے دل میں یہ فیصلہ کرلے کہ میرافتح الباب یعنی دینی ودنیوی سعادت اورتکمیل کا دروازہ شیخ کی صحبت اور اس کی خدمت سے کھلے گا ۔ نیز یہ بھی طے کرلے کہ شیخ کے آستانے پر اپنی جان بھی قربان کر دے گا اور منزل مقصود کو حاصل کرلے گا اس عزیمت اورثبات ہمت کی علامت یہ ہے کہ اگر شیخ اس کو رد اور دور بھی کرے تو بھی شیخ سے نہ پھرے اور نہ بے اعتقاد ہو کیونکہ مشائخ اکثر مریدوں کی ہمت کا امتحان بھی لیتے ہیں ۔ ایک دفعہ کا ذکر ہے کہ ابوعثمان حیری شاہ شجاع کرمانی علیہ الرحمہ  کے ساتھ نیشاپورمیں  ابوحفص حداد رحمتہ اللہ علیہ کی زیارت کو تشریف لائے  

ابوحفص حداد  نے شیخ عثمان حیری کی پیشانی میں نور ولایت کو روشن دیکھ کر قوت القائی سے  اس کے احوال کو جذب کرلیا اور اپنی ارادت میں مقید کر دیا۔ جب شاہ کرمان  واپس ہونے لگے  تو ابو عثمان حیری نے شاہ کرمان سے کہا  کہ آپ کچھ دن  اور نیشا پور میں قیام فرمائیں تو بہتر ہے۔ابوحفص حداد نے عثمان حیری کو اپنے پاس سے اٹھا دیا اور فرمایا کہ آئیندہ ہماری مجلس میں نہ بیٹھے۔ابوعثمان اس اشارت کو قبول  کر کے پچھلے پاؤں پیچھے ہٹے یہاں تک کہ نظروں سے غائب ہو گئے ۔ لیکن آپنے دل  میں یہ ٹھان لی کہ ابوحفص حداد کے دروازے پر ایک گڑھا کھود کر بیٹھ جاؤں اور جب تک وہ باہر نکلنے کی اجازت نہ دیں اس وقت باہر نہ آؤں، جب ابوحفص حدا د نے عثمان حیری کی سچی ارادت اور بلند ہمت کا مشاہدہ فرمایا تو ان کو بلا کر بہت مہربانی فرمائی اور اپنے خواص میں داخل کیا۔ یہاں تک کہ آپ نے اپنی بیٹی کا نکاح بھی ان کے ساتھ کر دیا شیخ کی رحلت کے بعدیہی سجادہ نشین ہوئے۔

تیسرا ادب :۔ اپنی جان و مال میں تصرفات شیخ کا مانع نہ ہو ۔ جو کچھ شیخ فرمائے اسی پر راضی اور قائم رہے ،کیونکہ ارادت اور محبت کا جوہراس طریقے کے سوا کسی اور طرح ظاہر نہیں ہوسکتا اور اس کی سچائی اور ارادت کا معیار اس کسوٹی کے سوا نہیں پرکھا جا سکتا۔ چنانچہ خداوند کریم نے اپنی سچی کتاب میں فرمایا ہے ۔ ‌فَلَا ‌وَرَبِّكَ لَا يُؤْمِنُونَ حَتَّى يُحَكِّمُوكَ فِيمَا شَجَرَ بَيْنَهُمْ ثُمَّ لَا يَجِدُوا فِي أَنْفُسِهِمْ حَرَجًا مِمَّا قَضَيْتَ وَيُسَلِّمُوا تَسْلِيمًا یعنی قسم ہے آپ کے رب کی کہ یہ لوگ اس وقت تک ایمان دار نہ ہوں گے جب تک کہ ان کے درمیان جھگڑا ہو اہے اسکا فیصلہ آپ سے نہ کرا ئیں اورپھر آپ کے اس فیصلے میں اپنے دلوں میں تنگی نہ پائیں مگر اس کو پوری طرح تسلیم کرلیں ۔

چوتھا ادب  :۔شیخ کے ظاہری اور باطنی تصرفات میں اعتراض نہ کرے اور جب  شیخ کے احوال سے کسی باب میں تردد ہو اور اس بات کی صحت کومعلوم نہ کر سکے تو حضرت موسی اور خضر علیہما السلام کے واقعے پر غور کرے کہ با وجودنبوت اور کمال علم کے موسی نے خضر کے بعض تصرفات پرکیسا انکار کیا تھا اور جب موسی پران تصرفات کے راز اور حکمت کے ابواب کھولے گئے تومان گئےلہذا جس بات کے راز کو نہ سمجھ سکے اس میں اپنی سمجھ اورعلم کا قصور اور کوتاہی سمجھے تاکہ اس کی ارادت اور محبت میں کمی نہ آنے پائے کیونکہ محبت اور ارادت کے کم ہو جانے سے شیخ کے سینے سے مرید کے سینے میں فیوض کی آمدکم ہو جاتی ہے ۔ حضرت جنید رحمتہ اللہ علیہ کے ایک مرید نے آپ سے سوال کیا ۔پھر شیخ علیہ الرحمہ کے جواب پر اعتراض کیا تو آپ نے فرمایاوَإِنْ لَمْ تُؤْمِنُوا لِي ‌فَاعْتَزِلُونِ یعنی اگر تم کو مجھ پر یقین نہیں ہے تو کنارہ کشی اختیار کرد۔

پانچواں ادب :۔  دینی اور دنیوی ، کلی اورجزوی غرض تمام کاموں کو شیخ کی ارادت و اختیا ر ا و ر اجازت کے بغیر شر وع نہ کرے ۔

چھٹا ادب  :۔ شیخ  کے خطرات کی رعایت واجب ہے ، جو حرکت شیخ کو ناپسند ہے اس پراقدام نہ کرے اور اپنی اس حرکت کو شیخ کےحسن خلق، کمال حلم اور مدار عفو پراعتماد اور بھرد ساکر کےخفیف  نہ سمجھے

ساتواں ادب  :۔اپنے کشف اور واقعات کے احوال شیخ کے آگے ظاہر کرے اور ان کی صحت وسقم کے لیے صرف شیخ کے علم کی رہ نمائی تلاش کرے کشف  اور واقعات  خواہ  بیداری میں ہوں یانیند میں ، ان کوشیخ کے علم کی طرف رجوع کرے اور جب تک ان کی صحت اور اہمیت کو اچھی طرح سے نہ سمجھ لے ان کی صحت پر جلدی سے حکم نہ  کر بیٹھے کیونکہ بہت ممکن ہے کہ ان واقعات کا منبع اورجڑ مرید  کی جان  میں پوشیدہ کوئی ارادت ہوجس  سے دہ آگاہ نہیں اور بے سوچے سمجھے ان کی صحت پرحکم کر بیٹھے ، اور اس سے کوئی خلل واقع ہو، لہذاجب واقعات کو شیخ کے آگے بیان کرے گا اور شیخ اپنے علم سے ان کی ماہیت سے واقف ہو جائے گا تو مرید کو اس کی صحت سے مطلع کر دے گا ۔ اس وقت اس کو شیخ کے حکم پریقین کے ساتھ عمل کرنا چا ہیئے ۔ ورنہ شبہ توضرورہی رفع ہو جائے گا ۔

آٹھواں ادب  :۔جب شیخ  کلام کرے تو اس کے کلام کو غور سے سنے اور منتظر ہے کہ شیخ کے کلام پر کیا گزر رہا ہے۔ شیخ کی زبان کو کلام الہی کا واسطہ ووسیلہ سمجھے اور یقین کرے کہ شیخ خدا کے ساتھ ہم کلام ہے ۔ حرص و ہوا کے ساتھ کچھ نہیں کہتا اور مرتبہ بی ینطق و بی یبصر وبی یسمع ( یہ ایک حدیث قدسی کی طرف اشارہ ہے اللہ فرماتا ہے وہ بندہ میری زبان سے کلام کرتا میرے کان سے سنتا اور میری آنکھ سے دیکھتا ہے)کو پہنچاہے شیخ کے دل کوبحرمواج خیال کرے جو علم کے خزانوں اور معرفت کے موتیوں سےبھرا  پڑاہے اورجب عنائت  ازلی  کی لہر آتی ہے تو ان میں  بیش بہا جواہرات میں سے بعض کو زبان کے ساحل پر ڈال دیتا ہے ، مرید کو لازم ہے کہ ہمیشہ منتظر وحاضر رہے تاکہ شیخ کے پر فوائد کلام سے  محروم وبے نصیب نہ رہے ۔ اور اس کے کلام اور اپنےچال کے درمیان منا سبت اور متابعت دیکھے اور اپنےجی میں یہ خیال کرے کہ خد اوند تعالی کے دروازے  پرقابلیت کی زبان کے ساتھ اپنے حال کی بہتری ڈھونڈتا ہے ۔ اس کی قابلیت اور استعداد کے مطابق غیب سے خطاب وارد ہوتا ہے، شیخ کے ساتھ کلام کرنے میں اپنے نفس کی حالت کی جستجو کرے  ۔یہ نہیں کہ ریاء ا ور اظہا رعلم اور اپنی  معرفت ظاہر کرنے کی صفت سے موصوف ہوکر شیخ سے کلا م کرے اور نہ اپنے  آپ کو کمال کی صفت سے شیخ کے آگے ظاہر کرے ۔بعض مفسرین نے اس آیت کے نزول کا سبب یوں بیان کیا ہے۔

يَاأَيُّهَا الَّذِينَ آمَنُوا لَا تُقَدِّمُوا بَيْنَ يَدَيِ اللَّهِ وَرَسُولِهِ یعنی اے ایمان والو! اللہ اور رسول کےروبرپیش دستی نہ کر و۔

 کچھ لوگ رسول اللہ ﷺ کیمجلس شریف  میں بیٹھنے والے ایسے تھے کہ جب کوئی سائل آپ سےکوئی مسئلہ پو چھتا تھا تو وہ آپ کے جواب سے پہلے ہی فتوی دے دیتے تھے اس وقت یہ آیت نازل ہوئی اور خدا وند کریم نے سب کو تادیب فرمائی اور ایسی سبقت سے منع فرمایا ۔

نواں ادب  : ۔ شیخ کے حضور میں اپنی آواز بلند نہ کرے کیونکہ بزرگوں کے سامنے آواز بلند کرنا بھی بے ادبی میں شامل ہے ۔ ایک دفعہ سیدنا حضرت ابوبکر صدیق رضی اللہ تعالی عنہ اور حضرت عمر بن خطاب رضی اللہ تعالی عنہ کے درمیان آن حضرت ﷺ کے حضور میں کسی مسئلے میں بحث ہوئی انھوں نے آوازبلند کی اسی وقت ان کو ادب سکھانے کے لیے یہ آیت نازل ہوئی۔ يَاأَيُّهَا الَّذِينَ آمَنُوا لَا تَرْفَعُوا أَصْوَاتَكُمْ فَوْقَ صَوْتِ النَّبِيِّ یعنی اے ایمان والو! اپنی آواز کو حضور نبی کریم ﷺ کی آواز شریف  سے زیادہ بلند نہ کرو چنانچہ اس واقعے کے بعد جب صحابہ کلام کرتے تو اس قدر آہستہ کلام کرتے کی مشکل سے سنا جاتا تھا  بنا بریں یہ آیت نازل ہوئی  إِنَّ الَّذِينَ يَغُضُّونَ أَصْوَاتَهُمْ عِنْدَ رَسُولِ اللَّهِ أُولَئِكَ الَّذِينَ امْتَحَنَ اللَّهُ قُلُوبَهُمْ لِلتَّقْوَى یعنی بے شک جو لوگ اپنی آوازوں کو رسول اللہ ﷺکے سامنے پست رکھتے ہیں ، یہ وہ لوگ ہیں جن کے دلوں کو اللہ تعالی نے تقوے کے لیے خاص کر دیا۔

دسواں ادب : ۔ شیخ کے ساتھ زیادہ کلام نہ کرے کیوں کہ اس فعل سے شیخ کا رعب اس کے دل میں کم ہو جائے گا اور فیض بند ہو جائے گا ۔شیخ  کو تعظیم و احترام سے خطاب کرناچا ہئیے ۔ مثلا یا سیدی یا مولائی اوائل نبوت کے وقت صحابہ رضی اللہ  عنہم رسول اللہ ﷺ کا  اسم مبارک تعظیم سے نہیں پکارتے مثلا یا محمد یااحمد کہہ کر پکارتے تھے۔ خداوند کریم نے ان کوادب سکھانے کےلئے یہ آیت نازل فرمائی ۔ وَلَا تَجْهَرُوا لَهُ بِالْقَوْلِ كَجَهْرِ بَعْضِكُمْ لِبَعْضٍ أَنْ تَحْبَطَ أَعْمَالُكُمْ وَأَنْتُمْ لَا تَشْعُرُونَ یعنی ان سے اس طرح  کھل کر نہ بولا کرو جس طرح آپس میں ایک دوسرے سے کھل کر بات کرتے ہو کہ تمہارے اعمال برباد ہوجائیں، اور تم کوخبر بھی نہ ہو ۔

بعدازاں آنحضرت ﷺ کو با رسول اللہ یانبی اللہ کہہ کرپکارا  کرتے تھے ۔ ایک دفعہ و فدبنی تمیم کی ایک جماعت رسول اللہ ﷺ کے حجرہ  مبارک پر آئی اور آپ کو باہرتشریف لانے کے لیے یوں آواز دی یا محمد  أخرج الینار اے محمد ہمارے پاس آؤ اسی وقت یہ آیت نازل ہوئی ۔ إِنَّ الَّذِينَ يُنَادُونَكَ مِنْ وَرَاءِ الْحُجُرَاتِ أَكْثَرُهُمْ لَا يَعْقِلُونَ وَلَوْ أَنَّهُمْ صَبَرُوا حَتَّى تَخْرُجَ إِلَيْهِمْ لَكَانَ خَيْرًا لَهُمْ یعنی  جو لوگ حجروں کے باہر سے آپ کو پکارتے ہیں ان میں سے اکثربے عقل ہیں او راگر یہ لوگ صبر کرتے ، یہاں تک کہ آپ خود ان کے پاس باہر آجاتے تو یہ انکے لیے بہتر ہوتا ۔

 ہر ایک قول وفعل میں شیخ  کی تعظیم وتکریم واجب ہے۔ اپناسجادہ  شیخ کے سامنے نہ  ڈالے سو ا نماز کے وقت کے سماع (محفل)کے وقت جہاں تک ممکن ہو حرکت اور آواز نکالنے سے پر ہیز کرے شیخ کے سامنے ہنسی بھی  نہ کرے ۔

گیارہواں  ادب : ۔ جب شیخ سے گفتگو کرنا چاہے خواہ وہ دینی ہو یاد نیوی پہلے  یہ سمجھ لے کہ شیخ کو اس کی بات سننے کی فرصت بھی ہے یا نہیں اور جب کلام کرے تو جلدی نہ کرے ۔

بارہواں ادب : ۔ شیخ کے حضور میں اپنے مرتبے کی حد پر نگاہ رکھےجس حالت اور مقام سے واقف نہیں ہے اس کی بابت کلام نہ  کرے ۔

تیرھواں  ادب : ۔ شیخ کے بھید کو ظاہر نہ کرے جن کرامتوں اور واقعات کو شیخ چھپاتا ہے اگر ان سے واقف ہو جائے  تو ظاہر نہ کرے ممکن ہے کہ شیخ ان اسرار کو بعض دینی مصالح کی بنا پر پوشیدہ رکھنا چاہتا ہو کہ اگر وہ  ظاہر ہو جائیں توباعث فساد ہوں۔

چودھواں ادب : ۔ اپنے راز شیخ سے نہ چھپائے جوکرامت اور موہبت خداوندکریم کی جانب سے عنایت ہوئی ہو اس کو شیخ کے آگے بیان کرے کیونکہ اس سے آئیندہ بہت سے فوائد حاصل ہوں گے۔

پندرہواں ادب : ۔اگر اپنے شیخ کی کسی بات کوئی دوسرے آدمی کے سامنے بیان کرنا چاہتا ہے تو سننے والے کی سمجھ کے مطابق بیان کرے اورجس بات کو عوام نہ سمجھ سکیں ، ان کے بیان کرنے سے کوئی فائدہ نہیں بلکہ نقصان ہے کیونکہ ممکن ہے کہ سننے والے کا عقید ہ شیخ کی نسبت فاسد ہوجائے ۔ اسی واسطے پیغمبر علیہ السلام نے فرمایا ہے کلموا الناس على قدر عقولھم  ولا تكلموا الناس على قدر عقولكم ودعوما ینکرون اتریدون ان یكذب الله ور سولہ یعنی لوگوں سے ان کی عقل کے موافق کلام کرو ۔ اپنی عقل کے موافق کبھی گفتگو نہ کر یں جس  بات سے وہ منکر ہوں، اس کو چھوڑ دو کیا تم چاہتے ہو کہ اللہ اور رسول کی تکذب ہو۔یعنی  تمہاری بات کو نہ سمجھیں گے تو اپنے دل میں کچھ کا کچھ سمجھ کر کیا عجب ہے کہ خدا اور رسول کی بھی تکذیب  کربیٹھیں لہذا ایسی بات کہو ، اور اس   طرح کہو کہ اس کو خالص وعام سمجھ سکیں۔ 

رسالہ: – آداب الشيخ  شیخ شہاب الدین سہروردی رحمۃ اللہ علیہ،تجلیات سہروردیہ صفحہ 51 مرکز علم و فن زریاب کالونی پشاور