تصوف میں لفظ اعتبار کا استعمال عموماً حقیقت کے مقابلہ میں ہوتاہے۔ ہر وہ چیز جو حقیقی نہیں اعتباری ہے۔ ہر وہ چیز جو ظنّی وہمی اور فرضی ہے اعتباری ہے۔ ہرتنزل، ہر تعین، ہر تقید اعتباری ہے۔ ساری کائنات اعتبارات ہی کا مجموعہ ہے

کائنات کے  جس پہلو پر بھی نظر ڈالی جائے تو مفروضات وموہومات وظنیات واعتبارات اور نظری مغالطوں کا ایک سلسلہ ہر طرف پھیلا ہوا نظر آئے گا اور ثابت ہوجائے گا کہ یہ ساری کائنات ایک عظیم الشان خواب ہے

لفظ اعتبار تصوف کی اصطلاح میں انتقال ذہنی  کو کہتے ہیں کبھی ایسا ہوتاہے کہ عارف کسی وقت کوئی آیتِ قرآنی یا حدیثِ نبوی سنتاہے تو اس کا ذہن کسی معرفت کی جانب منتقل ہوتاہے اگرچہ بظاہر عبارتِ نص اور اشاراتِ نص اور ایمائے نص سے اس معرفت کی جانب دلالت وضعی نہ پائی جاتی ہواس انتقالِ ذہنی کو اعتبار کہتے ہیں۔

تصوف میں ‘ وجود، علم، نور اور شہود ‘ کو اعتبارات  اربعہ  کہا جاتا ہے

وجود ، علم ، نور اور شہود چار اعتبارات جو محض صلاحیت ذات ہیں اور تعدد وجود نہیں رکھتے ملحوظ ہوتے ہیں۔ ۔ حق تعالیٰ نے انا فرما کر جانا ، یہ جاننے والی ذات ہی تو وجود ہے ، اور یہ جاننا ، علم ۔ پھر دیکھو خود پر ظاہر ہوا تو جا نا لہذا یہ ظہورہی تو نور ہے۔

خود کو دیکھا تو جانا لہذا یہ دیکھنا شہود ہوا ۔ اس طرح وحدت میں یہ چار ذاتی اعتبارات ثابت ہوئے ۔ یہاں یہ وہم نہیں ہونا چاہیئے کہ یہ وجود و علم اور نور و شہود ، پہلے نہ تھے بعد ہوئے کیونکہ یہ مراتب ازلیہ ہیں نہ کہ کونیہ (عالمِ موجودات، دنیائے مخلوقات)حادثیہ حق تعالی حدوث سے منزہ ہے اس کے علم سے  قبل جہل نہیں ، اس کے نور سے قبل استتار نہیں ۔ اس کے وجود سے پہلے عدم اور اس کے شہود سے پہلے غیبت نہیں ۔ یہاں بات صرف اعتبارات کی ہے ۔ یہاں یہ ذات کے اعتبارات ہیں، صفات نہیں ۔

(1)وجود  : اگر وجود کو صفت قرار دیا جائے تو لازم آئے گا کہ ذات وجود پر مقدم ہے کیونکہ موصوف ، صفت سے مقدم ہوتا ہے ۔ ذات کا وجود پر مقدم ہونا یہ معنی رکھتا ہے کہ ذات بغیر وجود کے موجود تھی جو ہداہتاً محال ہے لہذا صاف ظاہر ہے کہ وجود عین ذات ہے نہ کہ صفت ذات .

(2)- علم بھی عین ذات ہے ، کیونکہ علم صفائی کا کمال یہ ہے کہ وہ اپنے علوم کا احاطہ کرے، مگر ذات الہی غیر متناہی ہے ، اگر وہ علم صفاتی کے احاطہ میں آجائے توپھر غیر متناہی نہ ر ہے گی ، اس لیے علم کو عین ذات مانتا ہی پڑے گا ۔ اس میں شک نہیں کہ علم صفاتی بھی تنزلات و حوادث کی بہ نسبت غیر متناہی ہے مگر ذات بحت کی نسبت کرتے ہوئے اس کو غیر متناہی نہیں مانا جا سکتا۔

(3)- نور : یہ بھی عین ذات ہے نہ کہ صفت ذات جس کو امور نسبیہ میں سے سمجھا جا سکے۔

(4) مشہود : یہ بھی عین ذات ہے ۔ اس طرح ذات اس مرتبہ میں :

خود واجد ، خود موجود اور خود وجود

خود عالم ، خود معلوم اور خود علم

خود منوِر ، خود منوَر اور خود نور

خود شاہد، خود مشہوداور خود شهود

اس مرتبہ میں ذات ، مع صفات و اسماء و افعال ہے جس کی طرف   ذات وجود ، صفت علم ، اسم نور اور فعل شہود کہہ کر لطیف اشارہ ہوتا ہے۔

لاندراج الكل في بطون الذات كا لمفصل في المجمل اوكالشجر في النواة

کل ذات میں اسی طرح مندرج ہے جس طرح مفصل مجمل میں یا جیسے درخت گٹھلی میں ہوتا ہے ۔

یا جیسا کہ مور ہمہ رنگا رنگی اور خوش آوازی کے ساتھ انڈے میں ہوتا ہے یا آگ اپنی قہر سامانیوں کے ساتھ چقماق میں ہوتی ہے ۔ اسی وجہ سے صوفیہ کرام کہتے ہیں

خلق پیش از ظهور عین حق بود وحق بعد از ظهور عین عالم

یعنی خلق ، ظہور سے قبل عین حق اور حق ، ظہور کے بعد عین عالم

جب اللہ کی ذات نے مرتبہ لاتعین اور وراءالوراء سے نزول فرما کر باغ کائنات کی گلشن آرائی فرمائی تو اس کو صوفیا تنزلات کے لفظ سے تعبیر کرتے ہیں  یہ تنزل کی جمع ہے تنزل کے معنی یہ ہیں کہ شے اپنے اصلی وجود میں بعینہ باقی رہ کر ظلی طور پر ایک دوسرا وجود اختیار کرے

ذات حق تعالی کا تعینات میں ظاہر ہونا تنزل کہلاتا ہے تنزلات ستہ تصوف کا مشہور مسئلہ ہے اس کا مختصر بیان یہ ہے کہ صوفیائے کرام نے ذات کے چھ مراتب قرار دیئے ہیں جو یہ ہیں۔

احدیت، وحدیت، واحدیت، عالم ارواح، عالم مثال اور عالم شہادت۔

 نمبر 1:۔ مرتبہ احدیت اسکولا تعین ذات بحت کہتے ہیں۔اس مرتبہ احدیت کا نام جمع الجمع، حقیقت الحقائق اورعماء بھی ہے

 نمبر 2:۔ مرتبہ وحدیت علم مجمل علم ذاتی حقیقت محمدیہ اس کو تعین اول کہتے ہیں اسی مرتبہ میں ذات نے اپنے آپ کو انا سے تعبیر فرمایا ہے۔

 نمبر 3:۔ مرتبہ واحدیت علم تفصیلی نفس رحمان حقیقت ادم ہے اس کو تعین ثانی کہتے ہیں اس مرتبہ میں ذات کو علم تفصیلی اپنی صفات و اسماء کا ہے اسےقابلیت ظہور‘اور ‘وجودِ فائض‘ اور’ظل ممدود‘ بھی کہتے ہیں ان تینوں مراتب کو مراتب باطنی اور داخلی کہتے ہیں۔

ان پہلے تینوں مراتب کومراتب باطنی اور داخلی کہتے ہیں

 نمبر 4:۔ مرتبہ عالم ارواح  یہ عالم بحر ناپیدا کنار ہے ایک طرف ذات بیچوں(بے مثال) سے بکیفیت بیچونی متصل ہے دوسری طرف عالم اجسام سے متصل ہے اورروح مقیم اسی کو کہتے ہیں  روح الروح روح اعظم اسی کا نام ہے یہ ایک عالم بسیط  اور اور الطف ہے بے کیف ہے شش جہات  سے بری قرب اور بعد سے پاک  ہے افراد عالم میں ہر کسی کی استعداد کے موافق اس میں متصرف ہے جماد میں روح جمادی نبات میں روح نباتی  حیوان میں روحِ حیوانی انسان میں روح انسانی اسی کا نام ہے جب کسی جسم کے ساتھ اس کا تعلق ہوتا ہے ظاہر و باطن میں اس کے مطابق متصرف ہوتی ہے اسی کا نام حیات ہے اور جب اس کا تعلق جسم سے منقطع ہوجاتا ہے تصرف ظاہر و باطن سے اٹھ جاتا ہے وہ موت ہے اورحالت نوم میں قائم رہتا ہے اسی لیے نوم کو موت کی بہن کہا جاتا ہے۔

نمبر5:۔ مرتبہ عالم مثال اس کو عالم برزخ اورروح جاری بھی کہتے ہیں یہ ایک لطیف جسم ہی قابل طیر و سیر ہے خواب اور مشاہدہ میں نظر آتا ہے اسے ہاتھ سے چھوا نہیں جاتا آنکھ سے دیکھا نہیں جاتا اس کی صورتوں کے مطابق عالم اجسام کا ظہور ہے۔

نمبر6 :۔مرتبہ عالم شہادت اورعالم اجسام اسی کو کہتے ہیں یہ قابل لمس ہے اسے ظاہری آنکھ سے دیکھا جاتا ہے یہ عالم ذات کا انتہا ظہور ہے یہ تینوں عالم یعنی عالم ارواح  ، عالم مثال عالم اجسام ذات کے مراتب خارجی کہلاتے ہیں واضح رہے کہ ذات کے یہ چھ مراتب ہیں ان کو تنزلات ستہ کہتے ہیں اور سب عین ذات ہیں غیریت محض اعتباری ہے اور ذات مطلق  باوجود ان تعینات و تنزلات  ویسی ہی بے چون و بے چگون(بے کیف ہونا)  ہے اس  معمہ کا کھل جانا توحیدذوقی ہے

اصطلاحات صوفیہ صفحہ34 خواجہ شاہ محمد عبد الصمد دلی پرنٹنگ ورک دہلی

شیخ ابن عربی کے نزدیک ذاتِ الٰہی سے پہلا تنزل ‘حقیقت ِمحمدیہ’ میں ہوا ہے اور یہ تنزل اللہ تعالیٰ کی صفت علم میں ہوا ہے۔ دوسرا تنزل ان کے نزدیک ‘حقیقت ِمحمدیہ’ سے ‘اَعیانِ ثابتہ’ میں ہوا ہے۔ اور تیسرا تنزل ‘اَعیانِ ثابتہ’ سے ‘روح’ میں ہوا ہے۔ چوتھا تنزل ‘روح’ سے ‘مثال’ میں اور پانچواں ‘مثال’ سے ‘جسم’ میں اور چھٹا ‘جسم’ سے ‘انسان ‘ میں ہوا ہے۔