آپ کا شریف اور لطیف خط صادر ہوا الحمد للہ کہ اس کے مضمون سے فقرا کی محبت اور ان کی طرف توجہ کا حال معلوم ہوا۔ جو سرمایہ آخرت ہے کیونکہ یہی لوگ اللہ کے ہم نشین ہیں اور یہ وہ لوگ ہیں جن کا ہم نشین بد بخت نہیں ہوتا اور رسول الله ﷺفقرائے مہاجرین کے طفیل اللہ تعالی سے فتح کی طلب کرتے تھے اور آنحضرت ﷺنے انہی کے حق میں فرمایا ہے ‌رُبَّ ‌أَشْعَثَ، مَدْفُوعٍ بِالْأَبْوَابِ لَوْ أَقْسَمَ عَلَى اللهِ لَأَبَرَّهُ(ترجمہ ) بہت سے ایسے پریشان ہیں جو دروازہ سے ہٹائے ہوئے ہیں۔ اگر قسم کھائیں خدا کی تو البتہ پورا کر دے اس کو اللہ تعالی۔

اے میرے سعادت مند ۔ آپ کے مکتوب کے کسی فقرہ میں لکھا ہوا تھا کہ خدیو نشأتين یعنی دونوں جہان کا بادشاہ۔

یہ ایسی نعت اور تعریف ہے جو حضرت واجب الوجود جل شانہ سے مخصوص ہے بندہ مملوک کو چوکسی پر قادر نہیں ہے کیا لائق ہے کہ کسی وجہ سے خدائے تعالی کے ساتھ شرکت کرے اور خداوندی کے راستہ پر چلے خاص کر عالم آخرت میں کیا کہ مالکیت اور ملکیت حقیقی اور مجازی حضرت مالک یوم الدین سے مخصوص ہے۔ حضرت حق تعالی قیامت کے دن پکارے گا ‌لِمَنِ ‌الْمُلْكُ الْيَوْمَ آج یہ کس کا ملک ہے اور خود ہی جواب میں فرمائے گا لِلَّهِ الْوَاحِدِ الْقَهَّارِ اللہ واحد قہار کا ہے۔

اس دن بندوں پر ڈر اور خوف چھایا ہوگا اور حسرت و ندامت کے سوا کچھ تصور نہ ہوگا۔ حق تعالی قرآن مجید میں اس دن کی سختی اورمخلوقات کی بے قراری سے خبر دیتا ہے اور فرماتا ہے۔ إِنَّ زَلْزَلَةَ السَّاعَةِ شَيْءٌ عَظِيمٌ  يَوْمَ تَرَوْنَهَا تَذْهَلُ كُلُّ مُرْضِعَةٍ عَمَّا أَرْضَعَتْ وَتَضَعُ كُلُّ ذَاتِ حَمْلٍ حَمْلَهَا وَتَرَى النَّاسَ سُكَارَى وَمَا هُمْ بِسُكَارَى وَلَكِنَّ عَذَابَ اللَّهِ شَدِيدٌ بے شک قیامت کا زلزلہ بڑا سخت ہے اس دن سب دودھ پلانے والیاں اپنے بچوں کو بھول جائیں گی اور ہر حاملہ کاحمل گر جائے گا اورلوگ مستوں کی طرح لڑکھڑاتے نظرآئیں گے  حالانکہ وہ مست نہ ہوں گے لیکن الله کا عذاب سخت ہے۔

دراں کز فعل پرسند و قول اولوالعزم مرادل بلرزد ہول

بجائے کہ دہشت خورند انبیاء و عذر گنررا چه داری بیا

ترجمہ: حشر کو پوچھیں گے جس دم فعل سے اور قول سے کانپ جائیں گے اولوالعزموں کے دل وہاں ہول سے جس جگہ ڈر جائیں گے دہشت کے بارے انبیاء تو گنہ کا عذر کیا لائے گا پھر بتلا بھلا

 باقی نصیحت یہ ہے کہ صاحب شریعت علیہ الصلوۃ والسلام کی تابعداری کو لازم پکڑیں اور دنیا کی زیب و زینت کی طرف توجہ نہ کریں اور اس کے ہونے یا نہ ہونے کی پرواہ نہ کریں کیونکہ دنیا حق تعالی جل شانہ کی دشمن اور مبغوضہ ہے۔ اللہ تعالی کے نزدیک اس کا کچھ قدر نہیں ہے۔ پس مناسب ہے کہ بندوں کے نزدیک اس کا عدم اس کے وجود سے بہتر ہو اس کا بے وفائی اور جلدی دور ہو جانے کا قصہ مشہور ہے۔ بلکہ مشاہدے میں آچکا ہے پس اہل دنیا کے حال  سے عبرت حاصل کریں۔ وفقنا الله سبحانه واياكم بمتابعة الشريعة المصطفوية على صاحبها الصلوة والسلام والتحية حق تعالی آپ کو اور ہم کوشریعت  مصطفی ﷺ کی تابعداری کی توفیق دے۔

مکتوبات حضرت مجدد الف ثانی دفتر اول صفحہ225ناشر ادارہ مجددیہ کراچی

بِسْمِ اللَّهِ الرَّحْمَنِ الرَّحِيمِ سیادت مآب برادرم میرمحب اللہ کی مکتوب شریف پہنچا۔ یاس و ناامیدی کے مقدمات و حالات جو ازروئے اضطرار و اضطراب کے درج تھے۔ سب واضح ہوئے ۔ نا امیدی کفر ہے۔ امیدوار رہنا چاہئے۔ اگر ان دوامور میں رسوخ ہوتو کچھ غم نہیں۔ ایک صاحب شریعت غرا علیہ الصلاة والسلام کی متابعت دوسرے شیخ طریقت کا اعتقاد ومحبت۔ آپ اس امر سے واقف رہیں اور تضرع و التجا کرتے رہیں کہ ان دونوں دولتوں میں فتور نہ آئے۔ ان کے سوا اور جو کچھ ہو۔ آسان و سہل ہے اور اس کی تلافی ہو سکتی ہے۔ اس سے پہلے بھی آپ کو لکھا تھا کہ جب آپ مانکپورکی کی سکونت سے بیزار ہیں تو الہ آباد میں وطن اختیار کر لیں۔ امید ہے کہ مبارک ہوگا مگر آپ نے اس کے برعکس سمجھ لیا۔ کیا لفظ مبارک نے بھی آپ کو دلالت نہ کی۔ اب بھی وہی بات ہے۔ آج رات کو نظر آیا۔ کہ آپ کے اسباب کو مانکپور سے الہ آباد کی طرف لے گئے ہیں۔ 

آپ وہیں اپناویرانہ اختیار کر لیں اور اپنے اوقات کو ذکرالہی جل شانہ سے آباد رکھیں اور کسی سے تعلق نہ رکھیں نفی اثبات کے ذکر کو لازم پکڑیں اور اس کلمہ کےتکرار سے تمام مرادوں کو سینے کے میدان سے نکال دیں۔ تاکہ اس کے سوا کچھ مقصود ومطلوب ومحبوب نہ ہو۔ اگر دل ذکر کرنے سے تھک جائے تو زبان کے ساتھ پوشیدہ طور پر شروع کریں، کیونکہ ذکر جہر اس طریق میں ممنوع ہے۔ باقی طریق کی وضع وروش آپ کو معلوم ہی ہے۔ جہاں تک ہو سکے تقلید کا راستہ نہ چھوڑیں۔ کیونکہ شیخ طریقت کی تقلید سے بہت فائدے اور بڑےثمر حاصل ہوتے ہیں اورشیخ کے طریق کے خلاف میں سراسر خطرات ہیں۔ اس سے زیادہ کیا لکھا جائے ۔ والسلام 

مکتوبات حضرت مجدد الف ثانی دفتر سوم صفحہ42 ناشر ادارہ مجددیہ کراچی