قلب صنوبری اور لطیفہ قلب میں فرق

وجودِ انسانی میں دل ایک عضلاتی عضو ہے جو تمام جسم میں خون فراہم کرتا ہے۔ اس کی حرکت (دھڑکن) نہ رکنے والی حرکت ہے جو قبل ازپیدائش تا دمِ مرگ جاری رہتی ہے۔ دل کو انسانی وجود کا مرکز قرار دیا گیا ہے۔ یہ تمام جسم کو خون فراہم کر کے وجود کی بقا کا ضامن ہے۔ اس لیے دل بادشاہ کے طور پر اور تمام جسم رعایا کے طور پر عمل کرتے ہیں۔ دل کا دھڑکنا ہی حیاتِ انسانی کی علامت ہے۔ دل کی دھڑکن کے بند ہو جانے کو موت تصور کیا جاتا ہے۔

صرف قلب صنوبری میں کوئی سدھ بدھ نہیں ہوتی ، نفس اور خناس کے غلبے یا اپنے سیدھے پن کی وجہ سے غلط فیصلہ بھی دے سکتا ہے۔ قلبِ صنوبری عام اور بےاعتماد ہے۔ قلب صنوبری (گوشت کا لوتھڑا) ہے جو سینے کے بائیں طرف ہے۔یہ قلب حقیقی کا نشیمن ہے

  قلب حقیقی

  قلب حقیقی جسے لطیفہ قلب اورحقیقت جامعہ بھی کہتے ہیں۔قلب حقیقی(لطیفہ قلب)  وہ خفیہ قوت ہے ۔ جو حقائق کا ادراک کرتی ہے ۔ وہ ادراک ، خفیہ ہوتا ہے ۔ جلی ہوتا ہے ۔ بدیہی ہو تا ہے ،(جب اس میں نُورِ ایمانی چمکتا ہے )اور جب وہ نفسی حجابات سے پاک ہوتا ہے تو اس میں علم الٰہی منعکس کرتا ہے ۔۔

فنائے قلب

  اللہ تعالی کی عادت جاری ہے کہ جب مرید اپنے قلب کی طرف متوجہ ہوتا ہے تو میدا فیض سے قلب حقیقی کے واسطہ سے اُس کو فیض ہوتا ہے یہ لطیفہ قلب کی مشق کی نوعیت ہے جب یہ مشق کامل ہو جاتی ہے اور فناء قلبی حاصل ہو جاتی ہے تو باقی لطائف کی الگ الگ مشق کرائی جاتی ہے ۔ فنائے لطائف یہی ہے کہ لطائف میں مستغرق ہو جائے اور اس میں تکلف کی ضرورت نہ ہو۔

ترکِ دنیا سے مراد دنیا کو چھوڑنا نہیں بلکہ اپنے باطن میں دنیا اور اس کی خواہشوں کو شکست دینا ہے یعنی دل سے دنیا کی محبت نکال دی جائے کیونکہ جب تک دل سے دنیا کی ہوس اور محبت نہیں نکلے گی اللہ کی محبت نہیں آئے گی۔
وہ لوگ جن کے قلوب اللہ کی محبت اور اس کے ذکر سے معمور ہیں دنیا کی محبت ان کے قلب میں نہیں سما سکتی۔

مرشد کامل مرید کے باطنی حواس کو اپنے تصرف سے بیدار کرتا ہے اور اس کے دل کو نئی زندگی عطا کرتا ہے۔
حکم ہے کہ:
مَنْ اَحْیَا اَرْضًا مَیْتًا فَھِیَ لَہٗ
ترجمہ: جو مردہ زمین کو زندہ کرتا ہے پس وہ اسی کی ہوتی ہے۔

زندگانی قلب دانی از کجا
در نظر منظور وحدت باخدا

ترجمہ: کیا تو جانتا ہے حیاتِ قلب کیسے حاصل ہوتی ہے؟ اللہ کی نظرمیں منظور ہو کر وحدت تک رسائی حاصل کرنے سے۔

اَلْحَمْدُ لِلّٰهِ وَسَلَامٌ عَلٰی عِبَادِہِ الَّذِیْنَ اصْطَفٰی (الله تعالیٰ کی حمد ہے اور اس کے برگزیدہ بندوں پر سلام ہو) برادر عزیز کامکتوب مرغوب پہنچا۔ بہت خوشی حاصل ہوئی۔ وہ نصیحتیں جو آگے یاروں کو کی گئی ہیں اور اب بھی کرنے کے لائق ہیں۔ وہ یہ ہیں کہ اول اہل سنت و جماعت شکراللہ تعالیٰ سعیہم کی کلامیہ کتابوں کے موافق اپنے عقائد کو درست کریں۔ پھراحکام فقہیہ یعنی فرض و واجب و سنت و مندوب وحلال و حرام ومکروه و مشتبہ علمی اورعملی طو پر بجالائیں۔ اس کے بعد لازم ہے کہ اپنے دل کو ماسوائےحق کی گرفتاری سے سلامت رکھیں اور دل کی سلامتی اس وقت حاصل ہوتی ہے جبکہ دل میں ماسوائے حق کا گزرنہ ر ہے۔ یعنی اگر بالفرض ہزار سال تک زندگی وفا کرے تو بھی حق تعالیٰ کے سوا اور کچھ دل میں نہ گزرے ۔ نہ اس معنی سے کے اشیاء دل میں گزریں اور ان کو غیرحق نہ جانیں کیونکہ یہ بات ابتداء میں توحید کے مراقبہ کرنے والوں کو بھی حاصل ہو جاتی ہے بلکہ اس معنی ہے کہ اشیاء ہرگز دل میں نہ آ نے پائیں اور اشیاء کا دل پر گزر نہ ہونا اس بات پر مبنی ہے کہ دل ماسوائے حق کو اس طرح بھول جائے کہ اگر تکلف کے ساتھ بھی اشیاءاسے یاد دلائیں تو اس کو یاد نہ آئیں اس دولت کوفنائے قلب سے تعبیر کرتے ہیں اور اس راہ میں یہ پہلا قدم ہے اور باقی جتنے ولایت کے کمالات ہیں سب اسی دولت کی فرع ہیں۔ ۔ 

ہیچ کس راتا نگردد اوفنا نیست راہ در بارگاه کبریا

 ترجمہ: جب تک کوئی نہ ہو جائے فنا رہ نہیں ملتی اسے سوئے خدا

 اور اس دولت عظمی تک پہنچنے کے لئے سب سے زیادہ قریب راستہ طریقہ علیہ نقشبندیہ قدس سرہم کا طریق ہے کیونکہ ان بزرگواروں نے اپنی سیر کی ابتداء عالم امر سے کی ہے اور قلب سے قلب کے پھیر نے والے یعنی خدا کی طرف راستہ لے گئے ہیں۔ انہوں نے دوسروں کی ریاضتوں اور مجاہدوں کے بجائے سنت کو لازم پکڑا ہے اور بدعت سے کنارہ کیا ہے۔ 

حضرت خواجہ نقشبند قدس سرہ نے فرمایا ہے کہ ہمارا طریقہ سب طریقوں سے زیادہ قریب ہے لیکن سنت کو لازم پکڑنا بہت مشکل کام ہے۔ فَطُوْبیٰ لِمَنْ تَوَسَّلَ بِهِمْ وَاقْتَدٰى بِهُدَهُمْ مبارک ہیں وہ لوگ جنہوں نے ان کے ساتھ وسیلہ پکڑا اور ان کی ہدایت کا راستہ اختیار کیا۔ 

مولانا جامی قدس سرہ نے فرمایا ۔

 نقشبندیہ عجب قافلہ سالار انند  کہ برند از رہ پنہان بحرم قافلہ را

 از دل سالک رہ جازذبہ صحبت شاں میبردو سوسہ خلوت و فکر چلہ را 

قاصرے گر کندایں طائفہ راطعن و قصور حاشا للہ که برارم بزباں ایں گلہ را

ہمہ شیران جهان بسته ای سلسلہ اند روبه از حیلہ چساں بگسلد ایں سلسلہ را

ترجمہ: نقشبندی عجیب ہی قافلہ سالار ہیں جو قافلے کو خفیہ راستے سے حرم پہنچا دیتے ہیں ۔    دل سالک  سے ان  کاجذ ب صحبت گھڑی میں مٹادیتا ہے خلوت کے خیالات اور چلے کو ۔گر کوئی قاصر لگائے طعن ان کے حال پر تو بہ توبہ گرزبان پر لاؤں میں اس کا گلہ شیر ہیں جکڑے ہوئے اس سلسلہ میں سب کے سب لومڑی حیلہ سے توڑنے کس طرح یہ سلسلہ 

 دوسرا یہ کہ قاضی محمد شریف کا محبت سے بھرا ہوا نوازش نامہ پہنچا۔ چونکہ فقراء کی محبت سے پرتھا، کمال خوشی کا باعث ہوا فقیر کی دعا و سلام اس کو پہنچادیں۔ 

تیسرا واضح ہو کہ حبیب الله کا مکتوب مرغوب پہنچا۔ اس نے اپنے والد مرحوم کے فوت ہو جانے کے نسبت لکھا تھا۔ إِنَّا لِلَّهِ وَإِنَّا إِلَيْهِ رَاجِعُونَ فقیر کی طرف سے دعا پہنچا کر ماتم پرسی بجالائیں اور کہیں کہ دعاء فاتحہ وصدقہ و استغفار سے اپنے والد مرحوم کی امدادواعانت کریں۔ مَا الْمَيِّتُ فِي الْقَبْرِ إِلَّا ‌كَالْغَرِيقِ الْمُتَغَوِّثِ، يَنْتَظِرُ دَعْوَةً تَلْحَقُهُ مِنْ أَبٍ أَوْ أُمٍّ أَوْ أَخٍ أَوْ صَدِيقٍکیونکہ میت غریق کی طرح ہوتی ہے اور دعا کی منتظر رہتی ہے جو اسے باپ یا ماں یا دوست کی طرف سے آئے  

چوتھا واضح ہو کہ شیخ احمد ان بزرگواروں کا طریقہ اخذ کر کے بہت متاثر ہوا ہےحق تعالیٰ اس کو استقامت عطا فرمائے۔ مشار الیہ(شیخ احمد) چونکہ ازسرنو اسلام لایا ہے یعنی نو مسلم ہے اس واسطے اس کو عقا ئد کلامیہ جو فارسی کتابوں میں مذکور ہیں سکھائیں اور احکام فقہیہ کی بھی تعلیم دیں تا کہ فرض و واجب و سنت مندوب و حلال و حرام ومکروہ ومشتبہ کو پہچان لے اور اس کے موافق اپنی زندگی بسر کرے اور کتاب گلستان و بوستان کا پڑھنا پڑھانا بیکاری میں داخل ہے۔ والسلام۔ 

مکتوبات حضرت مجدد الف ثانی دفتر اول صفحہ340 ناشر ادارہ مجددیہ کراچی