حضرت امام ربانی قدس سرہ فرماتے ہیں انسان کی ساخت دس 10 اجزاء سے ہوئی ہے ان میں سے پانچ عالمِ خلق کے اجزاء ہیں اور پانچ عالمِ امر کے اجزاء ہیں ان ہی اجزائے عشرہ کو لطائفِ عشرہ کہا جاتاہے۔

لطائفِِ عشرہ اور اجزائے عشرہ 

انسان لطائفِ عشرہ سے مرکب ہے ان میں پانچ لطائف عالمِ خلق سے ہیں جو عرش کے نیچے کی مخلوقات سے تعلق رکھتے ہیں اور وہ عناصرِ اربعہ (ہوا،پانی،آگ، مٹی)  نفس ناطقہ ، قلب ، روح، سر،  خفی اور اخفیٰ ہیں۔ اسے مجموعہ اجزائے عشرہ کہتے ہیں

دوسرے پانچ لطائف عالمِ امر سے ہیں جو عرش سے اُوپر کی مخلوق سے تعلق رکھتے ہیں ان کا وطنِ اصلی فوق العرش (عالمِ ارواح) ہے لیکن ان کے تعینات انسان کے جسم میں جُدا جُدا مقام رکھتے ہیں جنہیں قلب، روح، سِرّ، خفی، اخفیٰ کہتے ہیں۔

جسمِ انسانی میں یہی وہ مواضع ہیں جن پر انوار و اسرار اور فیوض و برکاتِ الٰہیہ کا نزول ہوتا رہتا ہے گویا یہ لطائف اللہ تعالیٰ تک پہنچانے کے مختلف راستے ہیں اور ہر راستہ ایک اُولوالعزم رسُول کے زیرِ قدم ہے انسانی جسم میں آکر انکی نورانیت زائل ہوگئی ہے اسلئے سالکین ذِکر کرنے کے ذریعے دوبارہ انکو نُورانی بنا لیتے ہیں۔

لطیفہ

انسان کے جسم میں محلِ نور کو لطیفہ کہتے ہیں اور اس کو نفسِ ناطقہ بھی کہتے ہیں یہ وہ جوہر ہے جو مادہ سے خالی ہوتا ہے۔ وَھِیَ الْجَوْھَرُ الْمُجَرَّدُ عَنِ الْمَادَّۃِ کتاب التعریفات(ترجمہ: اور یہ جوھر مادہ سے مبرا ہوتا ہے) ان لطائف کا اصلی مقام عرش کے اوپر ہے لیکن جسمِ انسانی کے ساتھ ان کا ایک لطیف تعلق قائم ہے جسکی تطہیر سے سالکین کو عالمِ امر میں روحانی سیر نصیب ہوتی ہے۔

 لطائف کے نام قُرآن میں

 صوفیائے کرام نے لطائف کے اصطلاحی نام قرآنِ حکیم سے لئے ہیں۔

مثلاً قلب، روح، سر، خفی، اخفیٰ اور نفس کا ذکر درج ذیل آیات میں ہے۔

إِنَّ فِى ذَ‌ٰلِكَ لَذِكْرَىٰ لِمَن كَانَ لَهُۥ قَلْبٌ [ق:37](ترجمہ: جو شخص دلِ (بیدار) رکھتا ہے یا دل سے متوجہ ہو کر سنتا ہے)

قُلِ ٱلرُّوحُ مِنْ أَمْرِ رَبِّى [بنی اسرائیل: 85](ترجمہ: کہہ دو کہ روح میرے پروردگار کا ایک حکم ہے)

فَإِنَّهُۥ يَعْلَمُ ٱلسِّرَّ وَأَخْفَى [طٰہٰ: 7](ترجمہ: تو پھر بے شک وہ چھپے بھید اورنہایت پوشیدہ بات تک کوجانتاہے)

ٱدْعُوا۟ رَبَّكُمْ تَضَرُّعًۭا وَخُفْيَةً [الاعراف 55](ترجمہ:(لوگو!) اپنے پروردگار سے عاجزی سے اور چپکے چپکے دعائیں مانگا کرو)

وَنَفْسٍۢ وَمَا سَوَّىٰهَا [لشمس:7](ترجمہ: اور انسان کی اور اس کی جس نے اس (کے اعضا) کو برابر کیا)

صوفیائے محققین کے نزدیک لطائف کے انوار میں جو اختلاف ہے وہ مکشوفات کے اعتبار سے اختلاف ہے لہٰذا لطائف کے انوار کو رنگوں کے ساتھ مخصوص و مقیّد جاننا لازمی نہیں کیونکہ مقصود، دائمی ملکہ ذکر ہے نہ کہ رنگ و نُور، البتہ اگر لطائف کے رنگ کبھی ظاہر بھی ہوں تو مضائقہ نہیں۔

مقاماتِ لطائفِ عالمِ اَمر

لطیفہِ قلب

لطیفہِ قلب کا مقام انسان کے جسم میں بائیں پستان کے نیچے دو 2انگشت کے فاصلے پر مائل بہ پہلو ہے اسکی فناء قلب پر اللہ تعالیٰ کی تجلی فعل کا ظہور ہے اسکی علامت ذکر کے وقت ماسویٰ اللہ کا نسیان اور ذاتِ حق کیساتھ محوّیت ہے (اگرچہ تھوڑی دیر کیلئے ہو) اسکی تاثیر رفعِ غفلت اور دفعِ شہوت کی صورت میں ظاہر ہوتی ہے اسکا نور زرد ہے۔

قلب کا خاصہ ہے ذکر کرنا۔دھیان کرنا، شاہد رہنا اوراسم ذات باری تعالٰی اللہ اللہ   کرنا، (یعنی وہ ایک ایسی ذات مبارکہ ہے جو تمام اوصاف کاملہ کے

ساتھ موصوف ہے اور ہر قسم کے نقائص سے پاک ہے اور اس پر سہارا تکیہ ہے، 

لطیفہِ روح

اس کا مقام انسان کے سینے میں دائیں پستان کے نیچے دو انگشت کے فاصلے پر مائل بہ پہلو ہے۔ اسکی فناء روح پر اللہ تعالیٰ کی تجلی صفات کا ظہور ہے۔ اسکی علامت ذکر کے وقت کیفیاتِ ذکر (قلبی و روحی) میں اضافہ و غلبہ ہے۔ اسکی تاثیر غصّہ و غضب کی کیفیّت میں اعتدال اور طبیّعت میں اصلاح و سکون کی کیفیت کا ظہور ہے اُسکا نُور سرخ ہے۔ لطیفہ روح حیات قلبی کا باعث ہے

لطیفہِ سر

 اس کا مقام انسان کے سینے میں بائیں پستان کے برابر دو انگشت کے فاصلے پر مائل بہ وسطِ سینہ ہے اس کی فناء لطیفہِ سرّ پر اللہ تعالیٰ کی صفات کے شیونات و اعتبارات کا ظہور ہے۔

اسکی علامت ہر دو سابقہ لطیفوں کی طرح اس میں ذکر کا جاری ہونا اور کیفیات میں ترقی رونما ہونا ہے۔ (یاد رہے کہ یہ مشاہدہ اور دیدار کا مقام ہے) اس کی تاثیر طمع اور حرص کے خاتمے نیز دینی اُمور کے معاملے میں بلا تکلّف مال خرچ کرنے اور فکرِ آخرت کے جذبات کی بیداری سے ظاہر ہوتی ہے۔ اس کا نور سفید ہے۔

لطیفہِ خفی

اس کا مقام انسان کے سینے میں دائیں پستان کے برابر دو 2 انگشت کے فاصلے پر مائل بوسطِ سینہ ہے۔ اسکی فنا صفاتِ سلبیہ تنزیھیہ کا ظہور ہے۔ اسکی علامت اس میں ذِکر کا جاری ہونا اور عجیب و غریب احوال کا ظھور ہے۔ اسکی تاثیر حسد و بخل اور کینہ و غیبت جیسی امراض سے مکمل نجات حاصل ہوجانے سے ظاہر ہوتی ہے۔ اسکا نور سیاہ ہے۔

لطیفہِ اخفیٰ

اس کا مقام انسان کے جسم میں وسطِ سینہ ہے۔ اسکی فنا مرتبہ تنزیہہ اور مرتبہِ احدیّتِ مجردہ کے درمیان ایک برزخی مرتبے کے ظھور و شہود سے وابستہ ہے اور یہ ولایتِ محمد علیٰ صاحبہَا الصلوات کا مقام ہے اس کی علامت اس میں بلاتکلف ذکر کا جاری ہونا اور قربِ ذات کا احساس و شہود ہے اسکی تاثیر تکبر، فخر و غرور اور خودپسندی جیسی مُہلک روحانی امراض سے رہائی پانے اور مکمل حضور و اطمینان کے حصول سے ظہور پذیر ہوتی ہے اسکا نُور سبز ہے۔

لطیفہ نفسی

اس کا مقام پیشانی  کے درمیان ہے ۔ اس لطیفہ میں بھی سابقہ لطائف کی طرح ذکر کا خیال ہی کرنا ہے۔
  لطیفہ نفس کی اصلاح کی علامت یہ ہے کہ سالک ذکر کی لذت میں اس قدر محو ہوجاتا ہے کہ نفس کی رعونت و سرکشی بالکل ختم ہوجاتی ہے۔

لطیفہ قالبی

اس لطیفہ کا دوسرا نام سلطان الاذکار ہے۔ اسکا مقام وسط سر ہے، اس لئے اسکی تعلیم دیتے وقت مشائخ وسط سر یعنی دماغ پر انگلی رکھ کر اللہ، اللہ کہتے ہوئے توجہ دیتے ہیں، جس سے بفضلہ تعالی تمام بدن ذاکر ہوجاتا ہے اور جسم کے روئیں روئیں سے ذکر جاری ہوجاتا ہے۔

اسے حقیقت جامعہ ،حقیقت انسانیہ،ہیئت انسانیہ اور ترکیب روحی بھی کہا جاتا ہے

لطائف عالم امر کی جڑیں عرش کے اوپر ہیں اور جسم انسانی میں ان کے ٹھکانے ہیں

اصل قلب جو فوق العرش ہے، تجلی افعال ہے۔

اصل روح جو فوق العرش ہے، صفات ثبوتیہ ہیں۔

اصل سر جو فوق العرش ہے، شیونات ذاتیہ ہیں۔

اصل خفی جو فوق العرش ہے، صفات سلبیہ ہیں۔

اصل اخفی جو فوق العرش ہے، شان جامع ہے۔

انسان دس چیزوں سے مرکب ہے( ساخت دس 10 اجزاء سے ہوئی ہے) پانچ عالم خلق(عالم مادہ) سے یعنی چار تو عناصر ( پانی، آگ، ہوا، خاک، پانچواں نفس حیوانی جو اربعہ عناصر سے ہی پیدا ہوتا ہے اور پانچ عالم امر(عالم ماورائے مادہ) سے قلب، روح، سر، خفی، اخفی حضرت امام ربانی قدس سرہ فرماتے ہیں ان ہی اجزائے عشرہ کو لطائفِ عشرہ کہا جاتاہے۔عالمِ خلق سے جو عرش کے نیچے کی مخلوقات سے تعلق رکھتے ہیں۔

  ذات کے تینوں مراتب خارجی یعنی عالم ارواح ، عالم مثال ،عالم اجسام کو عالم خلق کہتے ہیں  

عالم شہادت

مَاوَجَدَ عَنِ السَّبَبِ وَ یُطْلَقُ بِاِزَاءِ عَالَمِ الشَّھَادۃِ (کتاب التعریفات ص 119، علامہ شريف الجرجاني،دار الكتب العلمية بيروت -لبنان )ترجمہ: جہاں سب کچھ سبب کے ذریعے وجود میں آئے اس پر عالمِ شہادت کا اطلاق آتا ہے) یعنی مادہ و مقدار سے پیدا ہونے والی مخلوق کو عالمِ خلق کہتے ہیں۔ جیسے فلکیات وارضیات وغیرہ(عالم شہادت : اس وجہ سے کہتے ہیں کہ یہ یہ چشم سرمشاہدے میں آتا ہے ۔ یہ ایک ایسا عالم ہے جس کو حواس خمسہ ظاہری سے ہرشخص دیکھ رہا ہے اور اسی وجہ سے اس کو عالم محسوس، عالم مرئی، عالم کثیف اور عالم رنگ و بو ، عالم آب و گل وغیرہ بھی کہتے ہیں اور اسی کو عالم ناسوت ، عالم خلق اور عالم ملک بھی کہا جاتا ہے ۔ اس میں اجسام و اشیاء شکل و صورت ، رنگ و وزن رکھتے ہیں ۔ طول و عرض بھی ہوتا ہے ۔ اس میں اشیاء بتدریج کمال کو پہنچتے ہیں ، انہیں ارواح کی طرح دفعتا کمال حاصل نہیں ہوتا  )

عالم خلق ہو ۔۔ یا ۔۔ عالم امر ، دونوں ہی کا عدم سے وجود میں آنا خدائے قادر مطلق کے ضابطہ کن فیکونی کے ہی ماتحت ہے ، مگر عالم خلق میں وسائل و اسباب کی بھی کارکردگی ہوتی ہے ، بخلاف عالم امر کے امور کے ، جو ظاہری اسباب و وسائل کے بغیر صرف لفظ ’ کن ‘ سے ظہور پذیر ہوجاتے ہیں۔

اللہ تعالیٰ کی سنت یہ ہے کہ عالم امر میں اس کے احکام کی تعمیل فوری ہوتی ہے ‘ جبکہ عالم خلق میں تدریج کا اصول کارفرما ہے اور یہاں وقت لگتا ہے۔ دنیا کا سارا نظام عالم خلق کے اصولوں پر چل رہا ہے۔ مثلاً آم کی گٹھلی سے کو نپلیں پھوٹتی ہیں ‘ پھر بڑھتی ہیں اور پھر آہستہ آہستہ ایک تناور درخت بن جاتا ہے۔ اس سارے عمل میں وقت درکار ہوتا ہے۔

مادہ عناصر اربعہ سے پیدا ہونے والی مخلوق کو عالم خلق سے یاد کیا کرتے ہیں، جیسے فلکیات و ارضیات وغیرہ یہ پانچوں کا لطائف نفس، پانی، آگ اور مٹی سے مرکب ہیں، عالم خلق عرش کے نیچے سے لے کر تحت الثرٰی تک ہے. عالم خلق کے پانچوں لطائف کی جڑ عالم امر کے پانچوں لطائف ہیں، یعنی نفس کی جڑ قلب، ہوا کی جڑ روح، پانی کی جڑ سِر، آگ کی جڑ خفی اور خاک کی جڑ اخفٰی ہے

دیگر نام

عالمِ خلق کو “عالمِ اسباب، عالمِ اجسام اور عالمِ ناسُوت” کے ناموں سے بھی پُکارا جاتا ہے۔ ان سب کے مجموعہ کو عالمِ مادیات بھی کہتے ہیں۔

غرضیکہ عالمِ خلق، کائناتِ مادی پر مشتمل ہے جس میں ترتیب و تدریج ہے اور جسکی تخلیق میں زمانہ صرف ہوا۔ اللہ تعالیٰ فرماتا ہے

هُوَ ٱلَّذِى خَلَقَ ٱلسَّمَـٰوَ‌ٰتِ وَٱلْأَرْضَ فِى سِتَّةِ أَيَّامٍۢ (الحدید: 4)ترجمہ: وہی ہے جس نے آسمانوں اور زمین کو چھ دن میں پیدا کیا)

دن سے مراد ہزار سالہ دن ہے وَإِنَّ يَوْمًا عِندَ رَبِّكَ كَأَلْفِ سَنَةٍۢ مِّمَّا تَعُدُّونَ (الحج: 47)ترجمہ: اور بےشک تمہارے پروردگار کے نزدیک ایک روز تمہارے حساب کے رو سے ہزار برس کے برابر ہے ) یا پچاس ہزار سالہ دن ہے فِى يَوْمٍۢ كَانَ مِقْدَارُهُۥ خَمْسِينَ أَلْفَ سَنَةٍۢ (المعارج: 40)ترجمہ: (اور) اس روز (نازل ہوگا) جس کا اندازہ پچاس ہزار برس کا ہوگا) یا اللہ تعالیٰ کے علم کے مطابق اس سے بھی بڑا دن مُراد ہے

فیض می آید از ذات بیچون کہ منشاء کمالات رسالت است بہ ہیئت  وحدانی من بواسطہ پیران کبار رحمۃاللہ علیہم اجمعین

ذات باری تعالیٰ  کی طرف سے  جو  کمالات رسالت  کی منشاء ہے عظیم مرشدین گرامی اللہ تعالیٰ ان پر رحمتیں نازل فرمائےکے وسیلہ جلیلہ  سے  میری   ہیئت وحدانی  میں فیض  آتا ہے۔

تشریح

نوٹ :ہیئت وحدانی (تمام لطائف اور جسم)والے مراقبات میں سالک حضور اخفی میں رکھے۔ یہ مقام انبیاء اور مرسلین کے ساتھ مخصوص ہے۔ اور تجلی دائمی کا درجہ دوم ہے۔ اس مقام پر سالک کو لطائف عشرہ ،تصفیہ نفس کے بعد مقامات فوقانی میں ایک ہئیت حاصل کرتے ہیں۔ جسے ہئیت معدنی کہتے ہیں۔ یہاں پر قرآن مجید کی تلاوت اور نماز کی کثرت سے ان کمالات اور دیگر حقائق میں ترقی ہوتی ہے۔  

سیر کمالات نبوت کے بعد اگر تائیدالہی یاوری کرتی رہے تو سا لک کو کمالات رسالت کی سیر نصیب ہوتی ہے ۔ یہ مقام کمالات نبوت کے مقابلہ میں اللہ تعالی سے زیادہ قریب ہے ۔ جس طرح نبوت اور رسالت میں فرق ہے اس طرح کمالات نبوت اور رسالت کے مراتب/مقامات میں بھی فرق ہے۔ رسالت کا مرتبہ درگاہ خداوندی میں نبوت کے مقام سے ایک قدم آگے ہے ۔ جیسے تمام انبیاء کرام علیھم السلام میں مرسلین کا درجہ بلند ہے ۔ اسی طرح دوسرے مقامات کے مقابلہ میں کمالات رسالت ایک مقام خاص ہے اور اس کا فیضان بھی تمام مقامات سے زیادہ ہے اور انوار و برکات بھی نہایت لطیف اور مصفی اور منزہ ہیں اس مقام میں اس ذات سے جو کمالات رسالت کا منشاء ہے بواسطہ حضرت پیر و مرشد سالک کی ہیئت وحدانی پرفیض آتا ہے ۔ سالک کے لطائف خمسہ عالم امر قلب کی صفائی روح کی تجلی تخلیہ سر اور فنا و بقا خفی اخفی کے بعد ایک خاص صورت اختیار کر لیتے ہیں اس مقام مقدسہ سے سلوک کے مقام کے اختتام تک فیض ہوتا ہے۔

ہیئت وحدانی کو یوں سمجھئے جیسے کوئی شخص معجون بنائے تو پہلے دواؤں کی صورت الگ الگ ہوتی ہے ۔ مگر جب معجون تیار ہو جا تا ہے ۔ تو اس کی لذت اور صورت و خواص اور ہی ہو جاتے ہیں اس طرح سالک کے لطائف خمسہ عالم امر اور لطائف عالم خلق ایک دوسری شکل وصورت اختیار کر کے عروج حاصل کر لیتے ہیں ۔ اس مقام میں تمام بدن کو عروج ونزول اور جذب نصیب ہوتا ہے ۔اس کا معاملہ صرف فضل الہی پر منحصر ہے وہ ذات جسے چاہے عطا کر دے اور جس پر یہ نوازش ہوتی ہے اس پر کمالات نبوت سے زیادہ انوارات کی بارش ہوتی ہے ۔

ولایت صغری میں تجلیات ظلال اسماء وصفات کے ساتھ بعد عروج ولایت کبری میں تجلیات اسماء وصفات کے ساتھ یہ سیر وابستہ تھی جو ایمان شہودی کے مراتب ہیں ان مدارج سے بدرجہ کمال عروج ہونے پر معاملہ سیر سالک ذات بحت سے وابستہ ہوا جو ایمان حقیقی کام مرتبہ ہے –   جومثل خورشید خاور ہے۔ جو فلک نبوت پر طلوع ہوتا ہے ۔ جبکہ ایمان شہودی مثل بدر کامل ہے  جو آسمان ولایت پر چمکتا ہے مقام کمالات رسالت میں ذوق وشوق کے بجائے بے مزگی و بے آرامی اور حلاوت وصل کے بجائے ملال اور ناکامی سالک کے حصے میں آتی ہے ۔اس لیے جناب رسول اللہﷺ ہمیشہ فکرمنداورغمگین نظر آتے تھے۔ حدیث شریف میں آیا ہے کہ کان رسول اللہ ﷺ دائم الحزن و متواصل الفكر ترجمہ: رسول اللہﷺ ہمیشہ غمگین اور فکر مند رہتے تھے۔ اس پر دلیل ہے جب سالک مراقبہ کمالات رسالت سے فیض حاصل کرتا ہے تو اللہ تعالی اس کو اپنے علم سے بہرہ ور فرما کر اپنا اور اپنے انبیاء ومرسلین علیہم السلام کا نائب بنا کرلوگوں کو ہدایت دینے والا اوراپنی عظمت سے واقف کرانے والا بناتے ہیں ۔