حکایات – ابوالسرمد

شَیر(درندہ) اور شِیر( دودھ) میں فرق

ابو السرمد — Sun, 18 Jun 2023 01:26:59 +0000

اگرچہ لکھنے میں شَیر(درندہ) اور شِیر ( دودھ) ایک جیسے ہیں لیکن شِیر کو آدمی پیتا ہے اور شَیر آدمی کو پھاڑ ڈالتا ہے۔ محض اسی وجہ سے پورا عالم گمراہ ہوگیا ہے۔ بہت کم کوئی خدا کے ابدال سے واقف ہے۔ بدبختوں کی دیکھنے والی آنکھ نہ تھی۔ اچھا اور بُرا اُن کی نظر میں یکساں ہے۔ انہوں نے نبیوں کے ساتھ برابری کا دعوی کیا اور اولیاء کو اپنے جیسا سمجھا اور کہا کہ یہ بھی انسان ہیں اور ہم بھی انسان ہیں۔ ہم بھی کھاتے اور سوتے ہیں اور یہ بھی۔ اندھے پن سے وہ طوطی کی طرح یہ نہیں سمجھے کہ ہم میں اور اِن میں بہت فرق ہے۔ دو قسموں کے بھڑوں نے ایک ہی جگہ سے کھایا لیکن ایک نے صرف ڈنگ اور ایک نے شہد دیا۔ دونوں قسموں کے ہرنوں نے گھاس کھائی اور پانی پیا لیکن ایک سے گوبر بنا اور ایک سے مُشک۔ دونوں نرسلوں نے ایک جگہ سے پانی پیا لیکن ایک کھوکھلی اور دوسری شکر سے بھری ہوئی۔ اس طرح کی لاکھوں مثالیں تیرے سامنے ہیں لیکن اُن میں ستر سالہ راہ کا فرق دکھائی دیتا ہے۔ یہ کھاتا ہے تو اس میں نجاست نکلتی ہے اور وہ کھاتا ہے تو خدا کا نور بن جاتا ہے۔ یہ کھاتا ہے تو سراسر بخل اور کینہ پیدا ہوتا ہے وہ کھاتا ہے تو نور الٰہ زیادہ ہو جاتا ہے۔ یہ پاک زمین ہے وہ شور’ یہ پاک انسان ہے اور وہ بھوت درندہ’ اگر دونوں کی صورتیں ایک جیسی ہیں تو ٹھیک ہے۔ نمکین اور شیریں میں صفائی موجود ہے۔ صاحبِ ذوق کے سوا کوئی اور دونوں پانیوں میں فرق نہیں کر سکتا۔ جس نے شہد چکھا نہ ہو شہد اور موم میں فرق نہیں کر سکتا۔

مولانا روم رحمتہ اللہ علیہ

رازق سے صلح اور اس کا ثمر

ابو السرمد — Fri, 17 Dec 2021 03:01:32 +0000

حضرت حبیب عجمی رحمۃ اللہ علیہ کاشمارپہلی صدی ہجری کے مشائخ تصوف میں ہوتاہے۔آپ رحمۃ اللہ علیہ کی ولادت فارس میں ہوئی۔کنیت”ابومحمد“ تھی شروع میں بڑے مال دار اور اور اپنا مال سود پر اہل بصرہ کو دیا کرتے تھے اور ہر روز قرض اورسودکے تقاضے کے لئے جایا کرتے تھے اور جب تک قرضداروں سے کچھ وصول نہ کر لیتے ٹلتے نہ تھے۔ ایک روز اپنے مال کی طلب کے لئے ایک گھر میں گئے وہ قرض دار گھر میں نہ تھا اس کی بیوی نے کہا کہ میرا خاوند گھر میں نہیں اور میرے پاس ہرجانہ کیلئے بھی کچھ نہیں۔ ہاں میں نے آج ایک بھیڑ ذبح کی تھی اس کی سری میرے پاس ہے وہ اگر آپ چاہیں تو لے جائیں۔ آپ نے کہا اچھا دے دو۔ اس عورت نے وہ سری آپ کو دے دی۔ اور آپ وہ سری لے کر اپنے گھر آئے اور اپنی بیوی سے کہا کہ یہ سری سود میں آئی ہے پکاؤ۔ بیوی نے کہا آٹا اور لکڑیاں نہیں ہیں آپ نے کہا میں ابھی جا کر سود میں آٹا اور لکڑیاں لے کر آتا ہوں۔ آپ اسی طرح گئے اور کسی قرض دار سے آٹا اور لکڑیاں لے آئے۔ بیوی نے ہانڈی چڑھائی جب ہانڈی پک گئی تو چاہا کہ پیالے میں نکالے کہ ایک سائل نے دروازے پر آ کر سوال کیا اور راہ خدا میں کچھ مانگا۔ حبیب کہنے لگے واپس جاؤ اس لئے کہ تجھے جو کچھ ہم دیں گے تو اس سے امیر نہ ہو جائے گا۔ مگر ہم فقیر ہو جائیں گے۔ ( ٹرخانے کیلئے جھوٹ بولا)سائل لوٹ گیا۔

حضرت حبیب کی بیوی نے جو ہانڈی سے سالن نکالنا چاہا تو کیا دیکھتی ہے کہ اس میں سب خون ہی ہے۔ اپنے خاوند کو بلایا اور دکھا کر کہنے لگی دیکھئے یہ آپ کی بد بختی سے کیا ہو گیا۔ جمعہ کا روز تھا اور لڑکے کھیل رہے تھے ان لڑکوں نے جب حضرت حبیب کو دیکھا تو کہنے لگے دیکھو سود خور آ رہا ہے الگ ہو جاؤ ایسا نہ ہو کہ اس کے پاؤں کی گرد ہم پر پڑے اور ہم بھی اسی طرح بد بخت ہو جائیں۔ جب یہ آواز حضرت حبیب کے کانوں تک پہنچی تو بڑے رنجیدہ ہوئے اور سیدھے حضرت حسن بصری رحمۃ اللہ علیہ کی مجلس میں پہنچے۔ حضرت حسن نے ان کو کچھ پندو نصائح بیان کیں تو حضرت حبیب کی کایا پلٹ گئی اور جب وہاں سے نکلے تو اللہ کے محبوب بن کر نکلے۔ واپس آتے ہوئے آپ کا ایک مقروض آپ کو دیکھ کر بھاگا تو آپ نے اسے آواز دی اور فرمایا بھائی اب تو مجھ سے نہ بھاگ۔ اب مجھے تجھ سے بھاگنا چاہہئے۔ یہ کہا اور گھر کی طرف لوٹے۔ راستے میں پھر وہی لڑکے کھیلتے ملے تو انھوں نے جب حضرت حبیب کو دیکھا تو آپس میں کہنے لگے کہ الگ ہو جاؤ حبیب توبہ کر کے آ رہا ہے۔ اب جو ہماری گرد اس پر پڑ گئی تو ایسا نہ ہو کہ ہم گنہگار ہو جائیں۔ حضرت حبیب نے یہ جملہ سنا تو کہنے لگے اے رب غفور! عجب تیری رحمت ہے کہ اس ایک روز میں جو تجھ سے صلح کی تو اس کا اثر مخلوق کے دل میں پہنچا دیا اور میری نیک نامی مشہور فرما دی۔ پھر آپ نے آواز دی کہ جس نے حبیب کا کچھ دینا ہو وہ آئے اور اپنی دستاویز واپس لے جائے۔ یہ آواز سن کر سب مقروض جمع ہو گئے اور آپ نے جو مال جمع کیا تھا وہ لوگوں میں بانٹ دیا ۔حتیٰ کہ ایک سائل کواپناکرتہ تک اتارکردے دیا۔اوردوسرے سائل کے سوال پراپنی بیوی کی چادرتک دیدی۔

ایک مرتبہ حضرت حبیب عجمی رحمۃ اللہ علیہ کی بیوی نے تنگدستی اورفقروفاقہ کی شکایت کی اورمشورہ دیاکہ عبادت کی بجائے کچھ کمائے۔ حضرت حبیب عجمی رحمۃ اللہ علیہ نے کہاکہ آپ فکرنہ کریں میں صبح مزدوری پرجاؤں گا۔اورتمہارے لئے بہت کچھ کماکرلاؤں گا۔چنانچہ آپ رحمۃ اللہ علیہ مزدوری کرنے کے لئے گھرسے نکلے۔اورسارادن عبادت میں گزاردیا۔جب گھرپہنچے توبیوی نے سوال کیاکہ کیاکماکرلائے ہو۔آپ رحمۃ اللہ علیہ نے کہاکہ جس کی میں مزدوری کرتاہوں وہ بہت کرم والامہربان ہے۔اس کے کرم کی وجہ سے آج میں اجرت طلب نہیں کرسکاہوں۔وہ ایسی ذات ہے جوبے طلب مزدوری اداکردیاکرتاہے۔مجھے روزانہ طلب سے شرم محسوس ہوتی ہے۔اب میں دس دن بعداپنی مزدوری طلب کرونگا۔آپ رحمۃ اللہ علیہ کی بیوی نے بڑی مشکل سے دس دن گزارے۔ دسویں دن جب آپ رحمۃ اللہ علیہ گھرکوآرہے تھے اوردل میں شرمارہے تھے۔کہ گھرمیں بیوی نے پوچھاکیاکماکرلائے ہوتوکیاجواب دوں گا۔ایک طرف تواپنے تصورمیں غرق چلے جارہے تھے۔اوردوسری طرف اللہ تعالیٰ نے ایک بوری آٹا،ذبح شدہ بکری،گھی،شہداورتین سودرہم ایک غیبی شخص کے ذریعے آپ رحمۃ اللہ علیہ کے گھرپہنچادیے۔وہ شخص آپ رحمۃ اللہ علیہ کی بیوی سے کہنےلگاآپ کاخاوندجس شخص کے گھرمزدوری کرتاہے یہ ساری چیزیں اسی نے بھیجی ہیں۔اپنے خاوندسے کہہ دیجیے گاکہ اگروہ زیادہ محنت سے کام کریگاتواُسے زیادہ مزدوری دی جائے گی۔چنانچہ آپ رحمۃ اللہ علیہ گھرکے دروازے پرپہنچے توگھرمیں کھانے کی خوشبوآرہی تھی۔اندرجاکربیوی سے صورتحال دریافت کی تواس نے پوراواقعہ اورپیغام آپ تک پہنچادیا۔یہ سنتے ہی آپ رحمۃ اللہ علیہ کی آنکھوں میں آنسوآگئے۔اوردل میں خیال آیاکہ جب دس دن کی بے توجہ ریاضت کااللہ تعالیٰ نے نعم البدل عطاکیاہے۔اگرمیں زیادہ دلجمعی کیساتھ عبادت کروں گاتونہ جانے کتنے انعامات سے نوازاجاؤں گا۔اسی دن سے عبادت میں غرق ایسے ہوگئے کہ مستجاب الدعوات کے درجہ تک جاپہنچے اوران کی دعاؤں سے مخلوق کوبہت فائدہ ہوا۔

تذکرۃ الاولیاء حضرت حبیب عجمی کے حالاٹ و مناقب صفحہ 38مشتاق بک کارنر لاہر

موئے مبارک کی برکت

ابو السرمد — Wed, 20 Oct 2021 05:36:19 +0000

جنگِ یَرمُوک کے بارہویں دن حضرت سیدنا خالد بن ولید رضی اللہ عنہ کا مقابلہ ایک رومی سردار بطریق نسطور سے ہوا، دونوں کے درمیان جنگ جاری تھی کہ اچانک سیدنا خالد بن ولید رضی اللہ عنہ کا گھوڑا بدکا اور زمین پر گرگیا جس سے آپ بھی زمین پر گرگئے، آپ کی وہ مبارک ٹوپی بھی گرگئی جسے آپ ہروقت اپنے ساتھ رکھا کرتے تھے، حیرانی کی بات یہ ہے کہ جیسے ہی وہ ٹوپی گری آپ کو اپنی جان کی نہیں بلکہ اس ٹوپی کی فکر لگ گئی اور آپ نے بآواز بلند پکارا : قَلَنْسُوَتِیْ رَحِمَکُمُ اللّٰہ یعنی اللّٰہ تعالیٰ تم لوگوں پر رحم فرمائے ، ہے کوئی جو میری ٹوپی مجھے تھما دے۔ چنانچہ آپ کی قوم میں سے ایک شخص گیا اور آپ کی ٹوپی تلاش کرکے آپ کو تھما دی، جیسے ہی آپ نے وہ ٹوپی پہنی تو ایسے لگا جیسے آپ کو نئی طاقت مل گئی ہو، پھر آپ نے نسطور پر اپنی تلوار کا ایسا وار کیا کہ اس کے جسم کے دو ٹکڑے ہوگئے۔ رومیوں نے جب سردار کا یہ حشر دیکھا تو سب کا سانس رُک گیا اور وہ میدانِ جنگ چھوڑ کر بھاگ کھڑے ہوئے۔

برکت کی اصل وجہ

جب حضرت سیدنا خالد بن ولید رضی اللہ عنہ لشکر میں واپس آئے تو اُن سے پوچھا گیا کہ حضرت جب میدان جنگ میں ہرطرف تلواریں چل رہی تھیں ، اس وقت آپ رضی اللہ عنہ کو اپنی ٹوپی کی فکر لگی ہوئی تھی، اس کی کیا وجہ تھی؟ آپ نے ارشاد فرمایا کہ حجۃ الوداع کے موقع پر حضور نبی کریم، رَ ء ُوفٌ رَّحیم ﷺنے حلق کروایا تو میں نے آپ ﷺکے مبارک بالوں میں سے چند بال مبارک اپنے پاس رکھ لیے۔ رسول اللہ ﷺ نے مجھ سے ارشاد فرمایا : مَا تَصْنَعُ بِہٰوُلَائِ یَا خَالِدُ یعنی اے خالد! تم ان بالوں کا کیا کرو گے؟میں نے عرض کی : اَتَبَرَّکُ بِہَا یَا رَسُوْلَ اللّٰہ وَاسْتَعِیْنُ بِہَا عَلَی الْقِتَالِ قِتَالَ اَعْدَائِیْ یعنی یَارَسُوْلَ اللّٰہ ! میں آپ کے ان مبارک گیسؤوں سے تبرک حاصل کروں گا اور جنگوں میں اپنے دشمنوں کے قتال پر ان سے مدد طلب کروں گا۔ یہ سن کر رسول اللّٰہ ﷺنے ارشاد فرمایا : لَا تَزَالُ مَنْصُوْراً مَا دَامَتْ مَعَکَ یعنی اے خالد! جب تک یہ بال تمہارے پاس رہیں گے ان کے وسیلے سے ہمیشہ تمہاری مدد کی جاتی رہے گی۔ سیدنا خالد بن ولید رضی اللہ عنہ فرماتے ہیں : فَجَعَلْتُہَا فِیْ مُقَدَّمَۃِ قَلَنْسُوَتِیْ فَلَمْ اَلْقِ جَمْعًا قَطُّ اِلَّا اِنْہَزَمُوْا بِبَرَکَۃِ رَسُوْلِ اللّٰہ ﷺیعنی پھر میں نے ان مبارک گیسؤوں کو اپنی ٹوپی کے اگلے حصے میں محفوظ کرلیا اور میں جب بھی اپنے دشمنوں سے مقابلے کے لیے جاتاہوں تو اللّٰہ تعالیٰ رسول اللّٰہ ﷺ کی برکت سے میرے دشمنوں کو شکست وذلت سے دوچار فرماتا ہے۔

ایک روایت میں ہے کہ حضرت خالد بن ولید ٹوپی گھر بھول آئے تھےآپ کی زوجہ ام تمیم نے ایسے وقت جب خالد بن ولید مشکل میں گھر چکے تھے ٹوپی دیکھی اور پہنچانے کے لئے تیز رفتار گھوڑے پہ سوار ہو کر ٹوپی دینے کے لیے پہنچیں اور عین اس وقت جب لشکر اسلام شکست کےقریب تھا تو پی دی جس کی برکت کی وجہ سےلشکر اسلام کو فتح حاصل ہوئی۔

فتوح الشام جلد اول صفحہ 210علامہ واقدی الناشر: دار الكتب العلمية

توہین رسالت اور غیرت مند کتا

ابو السرمد — Sat, 09 Oct 2021 07:57:35 +0000

مصنف فتح الباری حضرت امام حافظ ابن حجر العسقلانی رحمہ اللہ نے ایک کتے کا ذکر کیا ہے, جس نے رسول اللہ ﷺ کے دشمن کی گستاخی کی وجہ سے ایک مجع عام میں ہلاک کیا تھا

ایک دن عیسائیوں کے بڑے پادریوں کی ایک جماعت منگولوں کی ایک تقریب میں شرکت کے لیے روانہ ہوئی. جو ایک منگول شہزادے کی عیسائیت قبول کرنے پر منعقد کی گئی تھی، اس تقریب میں ایک عیسائی مبلغ نے رسول اللہ ﷺ کو گالی بکی، قریب ہی ایک شکاری کتا (شکاری کتا عموما انسانوں پر حملہ آور نہیں ہوتا )بندھا ہوا تھا. جو اس کی طرف سے گالی بکنے پر چھلانگیں مارنے لگا. اور زوردار جھٹکا دے کر رسی توڑ تے ہوئے اس بدبخت پر ٹوٹ پڑا. اور اس کو کاٹ لیا. لوگوں نے آگے بڑھ کر اس کتے کو فوراً قابو کیا. اور پیچھے ہٹا یا، تقریب میں موجود بعض لوگوں نے کہا کہ یہ تو نے حضرت محمد (ﷺ) کے خلاف گستاخانہ زبان استعمال کی ہےیہ کتا تمہاری اس گفتگو کی وجہ سے حملہ آور ہوا ہے، اس گستاخ نے کہا. بالکل نہیں
بلکہ یہ خودار کتا ہے. جب اس نے بات چیت کے دوران مجھے دیکھا کہ میں بار بار ہاتھ اٹھا رہا ہوں. اس نے سمجھا کہ میں اس کو مارنے کے لیے ہاتھ اٹھا رہاہوں. تو اس نے مجھ پر حملہ کر دیا، یہ کہہ کر اس بد بخت نے ہمارے محبوب ﷺ کو پھر گالی بکی. اس بار کتے نے رسی کاٹ دی. اور سیدھا اس ملعون پرچھلانگ لگا کر اس کی منحوس گردن کو دبوچ لیا اور اس بار لوگوں کی مدد کے باوجود اس کتے نے اس کی گردن کو اس وقت چھوڑا جب وہ ملعون ہلاک ہو گیا،
اس کو دیکھ کر 40000 (چالیس ہزار) منگولوں نے اسلام قبول کیا”*

الدرر الكامنة في أعيان المائة الثامنة، جلد 4 صفحہ 153،أبو الفضل أحمد بن علي بن محمد بن أحمد بن حجر العسقلاني الناشر: مجلس دائرة المعارف العثمانية – حيدر اباد/ الهند

اور امام الذھبی نے اس قصے کو صحیح اسناد کے ساتھ ” معجم الشیوخ جلد دوم صفحہ 55 مطبوعہ مكتبة الصديق، الطائف – المملكة العربية السعودية میں نقل کیا ہے ، اس واقعے کے عینی شاہد جمال الدین نے کہا ہے کہ*

وَاللَّهِ الْعَظِيمِ، وَأَنَا أَنْظُرُ ثُمَّ عَضَّ عَلَى زَرْدَمَتِهِ فَاقْتَلَعَهَا فَمَاتَ الْمَلْعُونُ

“اللہ کی قسم کتے نے میری آنکھوں کے سامنے اس ملعون گستاخ کوکاٹا اور اس کی گردن کو دبوچا جس سے وہ ہلاک ہو گیا”

نبی ﷺ کے اہل بیت کی پہچان

ابو السرمد — Fri, 01 Oct 2021 01:47:50 +0000

امام زبیری بطار نے الموفقیات میں کلبی رحمۃ اللہ علیہ سے روایت کیا کہ ہرقل (قیصر روم)قوم کے بادشاہ نے حضرت معاویہ رضی اللہ عنہ کی طرف خط لکھاجس میں عجیب و غریب سوالات کئے گئے تھے۔ جو حقیقت میں نہایت پیچیدہ فہم آزما تھے۔ اور ان سے پوچھا

(1)مکمل شے، آدھی شے اور لاشے کسے کہتے ہیں؟

(2) وہ چارذی روح چیزیں بتائو جو نہ ماں کے پیٹ سے پیدا ہوتی ہیں اور نہ وہ باپ کے پیٹھ سے گزری ہوں؟

(3) وہ کو نسا درخت ہے جو بغیر پانی کے اگایا گیاہے ؟

(4) وہ انسان جس کا کوئی( سابقہ ) خاندان نہیں

(5) اس قبر کے بارے میں جو صاحب قبر کے ساتھ چلتی رہی؟

(6) وہ کونسی چیز ہے جس نے سانس لیا ، اور اس میں روح نہ تھی عن شی ء تنفس بغیر روح

(7) ایسا شحص جسکا کوئی باپ نہ ہو۔

(8) اور وہ کونسی جگہ ہے جس پر ایک دفعہ کے سوا سورج نے نہ کھبی پہلے طلوع ہوا نہ بعد میں ہو گا۔

(9)نماز کی چابی کیا ہےاورہر چیز کی نماز کیا ہے

(10)جنت کے پودے کیا ہیں

(11)اس کوچ کرنے والے کے بارے میں جس نے صرف ایک مرتبہ کوچ کیا اس سے پہلے اور اس کے بعد (کبھی) کوچ نہ کرے گا،

(12)اس دین کے بارے میں کہ اللہ تعالیٰ اس کے علاوہ کسی اور (دین) کو قبول نہیں فرماتے

اس کے علاوہ خط کیساتھ ارسال کردہ بوتل میں دنیا کی ہر چیز کے بیچ مجھے ارسال کئے جائیں

امیر معاویہ ؓ کے درباریوں نے ان سے عرض کیا، کہ سوالات اہم اور باریک ہیں او ر آپ اس میدا ن میں دوڑ نہ سکیں گے۔ اگر آپ نے کسی جواب میں کوتاہی یالغزش کھائی تو یقینا آپ کا قیصر کی نگاہوں میں گر جانا دولت اسلامیہ اور مسلمانوں کیلئے خفت وندامت کا باعث ہوگا۔ اس لیے مناسب ہے کہ آپ ان سولات کو حضرت عبداللہ بن عباس کے پاس روانہ کریں او ر وہاں سے جواب لیکر ان کو قیصر کے پاس بھیج دیں۔ چنانچہ امیر معاویہ ؓ نے سوالات اور بوتل حضرت ابن عباسؓ کی دربار میں ارسال کئے ۔ حضرت عبداللہ بن عباسؓ کا علم اور ان کی قرآن دانی ضرب المثل تھی ۔ ا ن کے یہا ں سوال کے جواب میں کوئی تاخیر نہ ہوتی تھی ۔ بلکہ پیچیدہ سوال ہوتا تھا ۔ وہ اتنا ہی جلد اسکی تہہ کو پالیتے تھے اور جواب میں جلدی فرمالیتے تھے۔ ان کے جواب یہ تھے

(1) مکمل شے، وہ شخص جو صاحب عقل ہو، اور اپنی عقل سے کام لیتا ہو۔ آدھی شے وہ جو صاحب عقل نہ ہولیکن دوسرے عقل مند لوگوں کی رائے کے مطابق عمل کرتا ہو۔ لاشے، وہ شخص جو نہ تو خود عقل مند ہو، اور نہ ہی دوسرے عقلمند لوگوں کیساتھ مشورہ کرتا ہو۔

(2) وہ چار چیزیں جو ذی روح ہیں مگر نہ باپ کے پیٹھ میں رہیں، نہ ماں کا پیٹ انہوں نے دیکھا۔یہ ہیں(الف) سیدنا حضرت ا براہیمؑ کا مینڈھا(ب)قوم ثمود کی اونٹنی جو پتھر سے بطور معجزہ کے ظاہر ہوئی(ج) حضرت آدم ؑ اور (د) حضرت حواؑ

(3) وہ درخت جو بغیر پانی کے اگایا گیاہے، شجر یقطین ہے۔ جو حضرت یونس ؑ کو دھوپ سے بچانے کیلئے ان پر اس وقت اگا یا گیا تھا۔ جب وہ مچھلی کے پیٹ سے نکالے گئے تھے۔

(4) وہ انسان جسکا (سابقہ)خاندان نہیں۔ وہ سیدنا حضرت آدم ؑ ہیں۔

(5) وہ قبر جو اپنے صاحب قبر کے ساتھ چلتی رہی وہ مچھلی ہے جو یونس کو دریا میں لے کر چلتی رہی۔ فالتقمہ الحوث و ھوملیم ۔
آخر کار مچھلی نے اسے نگل دیا اور وہ ملامت زدہ تھا۔

(6) وہ چیز جس نے بغیر روح کے سانس لی وہ صبح صادق ہے۔ جس میں روح نہیں ہے ۔ لیکن پھر بھی تنفس موجود ہے۔ وا لصبح اذاتنفساور قسم ہے صبح کی جب وہ سانس لے۔

(7) ایسا شخص جس کا کوئی باپ نہ ہو۔ وہ عیسٰی بن مریم علیہ السلام ہیں۔

(8) وہ جگہ دریائے نیل کا اندرونی حصہ ہے۔ جو بنی اسرائیل کے گزر جانے کیلئے پھاڑدیاگیاتھا۔ اور پانی آگے پیچھے دیوار بن کر کھڑا رہ گیاتھا۔ اس جگہ کو اس وقت کے سوا سورج نے کبھی نہیں دیکھا تھا۔

(9)نماز کی چابی اللہ اکبر ہےاور ہر چیز کی نماز سبحان اللہ وبحمدہ ہے۔

(10) غرس الجنۃ حول ولا قوۃ الا باللہ ہے

(11)وہ کوچ کرنے والا جس نے صرف ایک مرتبہ کوچ کیا نہ اس سے پہلے اور نہ اس کے بعد اس نے کبھی کوچ کیا۔ وہ جبل طور سینا ہے کہ اس کے اور مقدس زمین کے درمیان چار راتوں کی مسافت تھی جب بنی اسرائیل نے نافرمانی کی تو اللہ تعالیٰ نے نور کے دو پروں کے ساتھ اڑا دیا جس میں عذاب کی نشانیاں تھیں اللہ تعالیٰ نے ان پر سایہ کردیا اور ان کو ایک آواز دینے والے نے آواز دی اگر تم توراۃ کو قبول کرو تو تم سے یہ ہٹا دیا جائے گا۔ ورنہ میں اسے تم پر پھینک دوں گا تو انھوں نے توراۃ کو پکڑ لیا معذور ہو کر تو اللہ تعالیٰ نے اس کو اپنی جگہ پر لوٹا دیا اس کو اللہ تعالیٰ نے فرمایا لفظ آیت ” واذنتقنا الجبل فوقھم کانہ ظلۃ “

(12)وہ دین جو اللہ تعالیٰ اس کے علاوہ کسی اور دین کو قبول نہیں فرماتے وہ لا الہ الا اللہ ہے

مذکورہ بوتل آپ نے پانی کے ساتھ بھر دی اور کہا کہ دنیا کی ہر چیز کا بیچ یہی ہے۔ کیونکہ ازروئے قرآن کریم اللہ تعالیٰ نے ہرچیز زندہ پانی سے پیدا فرمائی:وجعلنا من الماء کل شی حیء’’ان جوابات کے ساتھ مذکورہ بوتل حضرت معاویہ ؓ کے پاس بھیج دی گئی اور انہوں نے قیصر روم کی طرف ارسال کردی۔

چنانچہ ابن عباس ؓ نے جواب روانہ فرمادیئے۔ جب یہ سب کچھ قیصر روم کے پاس پہنچاتو اس نے فورا ًیہ کہا یہ باتیں کسی نبی کے گھر (والوں) سے حاصل ہو سکتی ہیں۔

( ا العقد الفریدابن عبدربہ الاندلسی)

الدر المنثور المؤلف: عبد الرحمن بن أبي بكر، جلال الدين السيوطي الناشر: دار الفكر – بيروت

آذان کی نقل دین و دنیا سنوار گئی

ابو السرمد — Thu, 30 Sep 2021 11:07:39 +0000

ابو محذورہؓ کا نام سمرہؓ بن صفیہ ہے انکے قبول اسلام کا قصہ بھی بڑا دلچسپ ہے ہجرت کا آٹھواں سال اور شوال کا مہینہ تھا کہ جب حضور اقداس ﷺ غزوہ سے فارغ ہو کر واپس آرہے تھے اس وقت ابومحذورہ جو اس وقت ایک شوخ نوجوان تھے اور مسلمان بھی نہیں ہوئے تھے اور اپنے ہی جیسے نو دیگر یار دوستوں کے ساتھ حنین کی طرف چل رہے تھے خود بیان کرتے ہیں کہ رسول اللہ ﷺ حنین سے واپس ہو رہے تھے راستے ہی میں حضور ﷺ سے ہماری ملاقات ہوگئی نما ز کا وقت آنے پر حضور ﷺ کو مؤذن نے اذان دی ہم سب آذان کی نقل کرنے لگے اور میں نے بالکل مؤذن کی طرح خوب بلند آواز نقل شروع کردی(آواز بڑی خوبصورت اور صاف تھی۔ خوش قسمتی ان کی راہ دیکھ رہی تھی) رسول اللہ کو آوازپہنچ گئی تو آپ نے سیدنا علی بن ابی طالب اور سیدنا زبیر بن العوام رضی اللہ عنہما کو بھیج کر ہم سب کو بلوایا ہم سب لاکر آپ کے سامنے پیش کردئیے گئے آپ نے فرمایا بتاؤ تم میں سے وہ کون ہے جس کی آواز بلند تھی (ابو محذورہؓ کہتے ہیں کہ میرے سب ساتھیوں نے میرے طرف اشارہ کیا اور بات سچی بھی تھی آپ نے سب کو چھوڑنے کا حکم دیدیا اور مجھے روک لیا او ر فرمایا کھڑے ہو جائو اور پھرآذان کہو ابومحذورہ ؓ کا بیان ہے کہ اس وقت میرا یہ خیال تھا کہ رسول ﷺ سے اور آپ نے جس آذان دینے کا حکم دیا تھا ا س سے زیادہ مکر وہ اور مبغوض میرے لئے کوئی چیز بھی نہ تھی یعنی میرا دل معاذاللہ آپ کی نفرت اور بغض سے بھرا ہواتھا رسول اللہ ﷺ نے مجھے خود آذان بتانی شروع کی جب میں اذان ختم کر چکا توآ پ نے مجھے ایک تھیلی عنایت فرمائی جس میں کچھ چاندی تھی اور میرے سر کے اگلے حصے پر آپ نے اپنا دست مبارک رکھااور پھر آپ نے دست مبارک میرے چہرے پر اور پھر میرے سامنے کے حصے پر یعنی سینے پر اور پر قلب و جگر پر اور پھر نیچے ناف کی جگہ تک پھیرا اوریو ں دعا دی۔ اَللّٰہُمَّ بَارِکْ فِیہِ وَاہْدِہِ إِلَی الْإِسْلَامِ
آپ نے مجھے یہ دعا تین دفعہ دی حضور ﷺ کی اس دعا اور دست مبارک کی برکت سے میرے دل سے کفر اور نفرت کی وہ لعنت دور ہوگئی اور ایمان اور محبت کی دولت مجھے نصیب ہوگئی ۔

اللہ کے رسول صلی اللہ علیہ وسلم کی بے شمار خوبیوں میں ایک خوبی یہ بھی تھی کہ آپ نے ہر شخص سے وہی کام لیا جس کا وہ اہل تھا، جسے وہ بآسانی انجام دے سکتا تھا۔ ابومحذورہ رضی اللہ عنہ کی آواز بڑی خوبصورت تھی۔ مکہ مکرمہ فتح ہوا۔ حرم مکی میں خوبصورت اذان دینے والے شخص کی ضرورت تھی۔ آپ صلی اللہ علیہ وسلم نے دیکھا کہ ابومحذورہ اس ذمہ داری کو بڑی خوبی سے پورا کرسکتے ہیں تو ان کاانتخاب کر لیا اور ابومحذورہ سے ارشاد فرمایا:(اِذْھبْ مُؤَذِّنًا فِي أَہْلِ مَکَّۃَ، أَنْتَ مُؤَذِّنُ أَہْلِ مَکَّۃَ)۔ ’’جاؤ تم اہل مکہ مکرمہ کے مؤذن ہو۔ تمہیں مکہ والوں کے لیے مؤذن مقرر کیا جاتا ہے۔‘‘ ابومحذورہ رضی اللہ عنہ نے مکہ مکرمہ پہنچ کر بیت اللہ شریف میں مؤذن کی ذمہ داری سنبھال لی۔ مکہ مکرمہ کے گورنر سیدنا عتاب بن اسید رضی اللہ عنہ تھے۔ انہیں ابومحذورہ رضی اللہ عنہ کے بطور مؤذن تقرر کے احکامات مل چکے تھے۔ابومحذورہ رضی اللہ عنہ اب مؤذنِ حرمِ مکی تھے۔ ان کے لیے یہ فخر اور اعزاز کی بات تھی کہ اللہ کے رسول صلی اللہ علیہ وسلم نے ان کے بالوں پر شفقت بھرا ہاتھ پھیرا تھا۔انہوں نے مسرت وشادمانی کے احساس سے سرشار ہو کر یہ ذمہ داری سنبھال لی اور زندگی کے آخری سانس تک مؤذنِ حرمِ مکی رہے۔ کہاں ایک معمولی چرواہا اور کہاں اللہ کے عزت وحرمت والے گھر میں پانچوں نمازوں کے لیے اللہ کی طرف لوگوں کو بلانے کا منصب جلیل! یہ شرف وفضیلت ان کی وفات کے بعد نسل درنسل چلتی رہی اور ان کی اولادتین سو سال تک حرمِ مکی میں مؤذن رہی۔

، الاستیعاب، ص:844-842، والإصابۃ:203/7، و صحیح مسلم، حدیث:379، و سیرأ علام النبلاء:119-117/3۔

تو پھر اللہ کہاں ہے؟

ابو السرمد — Thu, 30 Sep 2021 10:40:02 +0000

حضرت نافع کہتے ہیں کہ حضرت عبداللہ بن عمررضی اللہ عنہماایک دفعہ مدینہ منورہ سے باہر تشریف لے جا رہے تھے۔ خدام ساتھ تھے کھانے کا وقت ہو گیا، خدام نے دستر خوان بچھایا سب کھانے کے لیے بیٹھے۔ ایک چرواہا بکریاں چراتا ہوا گزرا، اس نے سلام کیا۔ حضرت ابنِ عمر رضی اللہ عنہما نے اس کی کھانے کی تواضع کی۔ اس نے کہا: میرا روزہ ہے۔ حضرت ابنِ عمر رضی اللہ عنہما نے فرمایا کہ اسقدر سخت گرمی کے زمانہ میں، کیسی لُو چل رہی ہے، جنگل میں تو روزہ رکھ رہا ہے! اس نے عرض کیا کہ میں اپنے ایامِ خالیہ کو جلد وصول کرلوں گا (یہ قرآنِ پاک کی ایک آیت شریفہ کی طرف اشارہ تھا جو سورۂ الحاقہ میں ہے کہ حق تعالیٰ شانہٗ جنتی لوگوں کو فرمائیں گے:
کُلُوْا وَاشْرَبُوْا ھَنِیْئًا م بِمَا اَسْلَفْتُمْ فِیْ الْاَیَّامِ الْخَالِیَۃِ
کھاؤ اور پیو مزہ کے ساتھ ان اعمال کے بدلہ میں جو تم نے گزرے ہوئے زمانہ میں (دنیا میں) کیے ہیں۔)
اس کے بعد حضرت ابنِ عمر رضی اللہ عنہما نے امتحان کے طور پر اس سے کہا کہ ہم ایک بکری خریدنا چاہتے ہیں، اس کی قیمت بتادو اور لے لو۔ ہم اس کو کاٹیں گے اور تمھیں بھی گوشت دیں گے کہ افطار میں کام دے گا۔ اس نے کہا کہ یہ بکریاں میری نہیں ہیں۔ میں تو غلام ہوں، یہ میرے سردار کی بکریاں ہیں۔ حضرت ابنِ عمر نے فرمایا کہ سردار کو کیا خبر ہوگی، اس سے کہہ دینا کہ بھیڑیا کھا گیا۔ اس نے آسمان کی طرف اشارہ کیا اور کہا: فَأَیْنَ اللّٰہُ؟ اور اللہ تعالیٰ کہاں چلے جائیں گے؟ (یعنی وہ پاک پروردگار تو دیکھ رہا ہے۔ جب وہ مالک الملک دیکھ رہا ہے تو میں کیسے کہہ سکتا ہوں کہ بھیڑیا کھا گیا؟) حضرت ابنِ عمر رضی اللہ عنہما تعجب اور مزے سے بار بار فرماتے تھے۔ ایک چرواہا کہتا ہے: أَیْنَ اللّٰہُ؟ أَیْنَ اللّٰہُ؟ (اللہ تعالیٰ کہاں چلے جائیں گے؟ اللہ تعالیٰ کہاں چلے جائیں گے؟) اس کے بعد ابنِ عمر رضی اللہ عنہما شہر میں واپس تشریف لائے تو اس غلام کے آقا سے اس غلام کو اور بکریوں کو خرید کر غلام کو آزاد کر دیا، اور وہ بکریاں اسی کو ہبہ کردیں۔

تفسیر الدر المنثور امام جلال الدین سیوطی تفسیر سور الحاقہ آیت نمبر 24

تمہارے منہ سے جو نکلی وہ بات ہو کے رہی

ابو السرمد — Thu, 30 Sep 2021 03:12:41 +0000

حضرت جابر فرماتے ہیں کہ حضور انو رﷺ کے زمانے میں ایک شخص نے چوری کی آپ کی خدمت میں پیش کیا گیا ، رسول اللہ ﷺنے قتل کردینے کا حکم دیاوگوں نے عرض کی حضور اس نے صرف چوری کی ہے فرمایا ہاتھ کاٹ دو،چنانچہ ہاتھ کاٹ دیا گیا پھر دوبارہ چوری کے جرم میں لایا گیا فرمایا قتل کردو پھر عرض کیا گیا حضور اس نے چوری کی ہے فرمایا پاؤں کاٹ دو،تیسری چوتھی بار بھی یہ ہی ہوا آخر کار پانچویں بار میں اسے قتل کردیا گیا۔نسائی نے بروایت حارث ابن حاطب نقل فرمایا کہ اس شخص نے پانچویں چوری عہد صدیقی میں کی تب صدیق اکبر نے فرمایا کہ رسول اﷲ ﷺاس کے انجام سے خبردار تھے اس لیے پہلی بار میں فرمایا تھا کہ اسے قتل کردو،یہ حدیث طبرانی سے حاکم نے مستدرک میں نقل فرمائی اور کہا صحیح الاسناد ہے

دوسری روایت جسے احکام القرآن مصنف احمد بن علي ابو بكر الرازي الجصاص نےبیان کیا پھر اس شخص نے حضرت ابوبکر رضی اللہ عنہ کے عہد خلافت میں

چوری کی اور وہ پکڑا گیا آپ نے اس کے قطع کا حکم دیا ، پھر اس نے تیسری مرتبہ چوری کی اور قطع کی سزا پائی ، پھر اس نے چوتھی مرتبہ چوری کی اور سزا کے طور پر وہ اپنے ہاتھ پاؤں سے محروم ہوگیا ۔ اس بدبخت نے پھر پانچویں مرتبہ چوری کی اور پکڑا گیا اس موقع پر حضرت ابوبکر رضی اللہ عنہ نے فرمایا : ” اللہ کے رسول ﷺ کو اس کے متعلق زیادہ علم تھا اسی لیے آپ ﷺ نے اسے قتل کردینے کا حکم دیا تھا “ ۔ پھر آپ نے اسے قتل کرنے کا حکم دیا چنانچہ اس کی گردن اڑا دی گئی ۔

أحكام القرآن المؤلف: أحمد بن علي أبو بكر الرازي الجصاص الحنفي الناشر: دار الكتب العلمية بيروت – لبنان

مرشد ایمان کی ڈھال ہے

ابو السرمد — Wed, 22 Sep 2021 05:32:14 +0000

شیطان کے حملے سے بچنے کا بہترین طریقہ ولیوں (پیر) کا دامن تھامنا ھے۔امام فخرالدین رازی صاحبؒ تفسیر کبیر۔آپؒ نے جو تفسیر لکھی ھے جب سے یہ تفسیر لکھی گئی اس وقت سے آج تک سارے علماءاِس تفسیر کے محتاج ہیں۔

۔جب آپؒ کا نزع کا وقت آیا تو شیطان حملہ آور ھوگیا۔ اس وقت شیطان جان توڑ کوشش کرتا ہے کہ کسی طرح ایمان سلب ہو جائے کیونکہ اس وقت پھر جائے تو کبھی نہ لوٹنے کی شیطان کو امید ہوتی ہے شیطان نے کہا امام صاحبآپ نے پوری عمر مناظروں اور مباحثوں میں گذاری ذرا یہ تو بتاؤ خدا کو کس طرح پہچانتے ھو۔امام فخر الدین رازیؒ نزع کے وقت قرآن کی آیتیں پڑھ پڑھ کر دلیلیں دے رہے ہیں۔وہ اللہ ھے وہ خالق ھے،وہ مالک ھے۔امام صاحبؒ نے ایک دلیل دی شیطان خبیث معلم الملکوت رہ چکا تھا نے توڑدی،دوسری دی وہ بھی توڑی دی،تیسری دلیل دی وہ بھی توڑ دی،امام صاحبؒ نے نزع کے وقت خدا کو ماننے اور پہچانے کی تین سو ساٹھ (360) دلیلیں پیش کیں،شیطان نے سب توڑ دیں،امام رازی سخت پریشانی اور مایوسی کے عالم میں ہیں

خواجہ نجم الدین کبریؒ’امام فخر الدین رازیؒ کے مرشد ہیں۔خواجہ نجم الدینؒ نے ہزاروں میلوں کے فاصلے پر سے اپنے مرید امام رازی کو دیکھ لیا کہ نزع کا وقت ھے شیطان حملہ آور ھےخواجہ صاحبؒ وضو فرمارہے تھے۔تو آپؒ نے فورا وضو کے پانی کی چھینٹیں مار کر کہا:”رازی تو چرانمی گوئی کہ من خدا را بلا دلیل میشناسم (تو یہ کیوں نہیں کہتا ھے میں خدا کو بغیر دلیل مانتا ھوں)”۔امام فخر الدین رازیؒ نے جب اپنے پیر کی آواز سنی تو فورا کہا :”شیطان میں خدا کو بغیر دلیل مانتا ھوں”۔جب آپؒ نے کہا تو شیطان بھاگ گیا۔آپؒ کا ایمان محفوظ رہا۔امام صاحبؒ کتنے بڑے عالم ہیں نزع کے وقت اللہ کے ولی نے حفاظت کی۔ولیوں کا دامن صرف دنیا میں ہی کام نہیں آۓ گا بلکہ قبر اور حشر میں بھی کام آۓ گا۔پیر کے بغیر یہ منزلیں طے کرنا بڑی مشکل ہیں۔ مولانا روم فرماتے ہیں

پیر را بگزیں کہ بے پیر ایں سفر ــــــــــــــــــــــــ ہست بس پُر آفت وخوف وخطر

پیر کی تلاش کرو اس لئے کہ اگلا سفر بڑا خوف اور بڑے خطر والا ھے،اگر اس خوفناک اور خطرے والے سفر سے بچنا چاہتا ھے تو کسی اللہ ولے کا مرید ھو جاؤ

حاصل کلام

شیخ مرشد یا پیر طریقت اس لئے نہیں پکڑا جاتا کہ تعویذ دھاگہ اور دنیوی حاجات پوری ہوتی رہیں بلکہ اصل مقصد شریعت کی پابندی اور حفاظت ایمان کا ذریعہ مرشد ہوتا ہے۔

المفوظ کامل ،امام احمد رضا خان ،صفحہ 365رضوی کتاب گھر مٹیا محل جامع مسجد دہلی

دنیاوی دولت سے استغناء

ابو السرمد — Tue, 14 Sep 2021 23:40:24 +0000

شیخ جلال الدین نے سید الاقطاب میں لکھاہے کہ ایک مرتبہ حضرت شیخ کا دریا کے کنارے گزر ہوا وہاں ایک ہندو جوگی آنکھیں بند کئے ہوئے بیٹھاتھا۔تھوڑی دیر میں اس نے آنکھیں کھولیں اورشیخ کی طرف متوجہ ہوکر بڑی مبارک باد د ی کہ تم بڑے اچھے وقت پر دریا پر آئے ہو اسلئے کہ میرے پاس ایک پارس کی پتھری ہے اور میں نے اپنے دل میں یہ عہد کیا تھا کہ آنکھیں کھولنے کے بعد جو شخص سب سے پہلے نظر پڑے گا اس کو دونگا اب اتفاقاًتو مل گیا یہ کہہ کر بڑے احسان رکھ کہ وہ پتھری حضرت شیخ کی نظر کر دی حضرت نے لے کر اس کو دریا میں ڈال دیا وہ جوگی انتہائی غصہ سے بے چین ومضطرب ہو ا اور نہایت حسرت و قلق سے رو کر کہنے لگا کہ یہ کیا کیا ایسی نایاب چیز کی یہی قدر تھی پس میرا پتھر مجھے واپس کرو حضرت نے فرمایا کہ تم مجھ کو دے چکے تھے مجھے اختیار تھا کہ جو چاھے کروں،اس نے بے چینی پر اصرار کیا حضرت شیخؒ نے فرمایا کہ دریا میں گھس جا اور اپنا پتھر اٹھا مگر شرط یہ ہے اپنا ہی پتھر اٹھانا وہاں گھس کر دیکھا کہ اس سے بہتر سینکڑوں پتھر یاں وہاں پڑی ہیں اپنے پتھر کے ساتھ ایک اور چپکے سے اٹھالی حضرتؒ نے آواز سے فرمایا کہ یہ بد عہدی ہے بلاآخر وہ دونوں پتھریاں لایا اور لاکر حضر ت کی خدمت میں سر رکھ دیا اور مسلمان ہوگیا۔ ( تاریخ مشائخ چشت:محمد زکریا ص، 182،مکتبہ الشیخ کراچی)

یہ شیخ جلال الدین کبیر الاولیاء ہیں
اسم گرامی محمد بن محمود یا خواجہ محمود ہے اپنے شیخ کی طرف سے جلال الدین کا لقب پایا سلسلہ نسب حضرت عثمان بن عفان تک پہنچتا ہے ہے آپ کی ولادت 695ھ ہے مجاہدات کا بے حد غلبہ تھا آخری عمر میں استغراق کا یہ عالم تھا کہ خدام نماز کے وقت متوجہ کرتے نماز کے بعد پھر استغراق کی حالت طاری ہوجاتی آپ کے 40 خلفاء ہیں اور ہر خلیفہ سے مستقل سلسلہ جاری ہوا