اَلْحَمْدُ لِلَّهِ وَسَلَامٌ عَلٰی عِبَادِهِ الَّذِينَ اصْطَفٰى سب تعریف اللہ ہی کے لئے ہے اور اس کے برگزیدہ بندوں پر سلام ہو۔

) برادرم محمد طاہر بدخشی نے دریافت کیا تھا کہ رساله مبدأ  و معاد میں واقع ہے کہ صورت کعبہ جس طرح صورت محمد کی مسجود ہے اسی طرح حقیقت کعبہ(مراد حق تعالیٰ ہے جو سجدے اور عبادت کے لائق ہے) بھی حقیقت محمدی سے افضل ہے حالانکہ ظاہرو مقرر ہے کہ جہاں کی پیدائش سے مقصودآنحضرت علیہ الصلوة والسلام ہیں اور آدم اور آدمیان سب ان کے طفیلی ہیں جیسے کہ وارد ہے۔ لو لاک لما خلق الا فلاک ولما أظهرت الربوبية ( اگر تو نہ ہوتا تو میں آسمانوں کو پیدا نہ کرتا اور اپنی ربوبیت و خدائی ظاہر نہ کرتا)

جاننا چاہئے کہ صورت کعبہ پتھرومٹی سے مراد نہیں ہے کیونکہ بالفرض پتھرومٹی نہ بھی ہوں تو پھر بھی کعبہ کعبہ ہے اور خلائق کامسجود ہے بلکہ صورت کعبہ باوجود یکہ عالم خلق سے ہے لیکن اور اشیاء کی خلقت کی طرح نہیں ہے بلکہ ایک ایسا پوشیدہ امر ہے جوحس و خیال کے احاطہ سے باہر ہے گو عالم محسوسات میں سے ہے لیکن کچھ بھی محسوس نہیں اور اگر چہ اشیاء کا متوجہ الیہ(جس کی طرف توجہ کی جائے) ہے لیکن کچھ بھی توجہ میں نہیں ہے وہ ایک ہستی ہے جس نے نیستی (فنائیت)  کا لباس پہنا ہے اور ایک نیستی ہے جوہستی کے لباس میں ظاہر ہے جہت میں ہو کر بے جہت ہے اور سمت میں ہو کر بے سمت ہے غرض یہ صورت حقیقت نما نہایت ہی عجیب ہے جس کی تشخیص میں عقل عاجز ہے اورعقلمند اس کے تعین میں حیران ہیں گویا عالم بیچونی وبیچگونی کانمونہ رکھتی ہے اوربے شبہی اور بے نمونی کا نشانہ اس میں پوشیدہ ہے ہاں اگر ایسی نہ ہوتی تو مسجود ہونے کے لائق نہ ہوتی اور بہترین موجودات علیہ الصلوۃ والسلام بڑے شوق سے اس کو اپنا قبلہ نہ بناتے۔ فيه آیات بینات اس میں نشان ظاہر ہیں اس کی شان میں نص قاطع ہے۔ اور من دخله كان امنا ( جو اس میں آگیا وہ امن میں ہو گیا) اس کے حق میں ہے بیت اللہ ہے کہ صاحب خانہ جل شانہ کی بیتوتت خاص(رہنا سہنا گھر والا ہونا) اسی میں ہے اور بیچون وبیچگون کا مجہول الکیفیت اتصال ونسبت اس کے ساتھ ہے ۔ ولله المثل الأعلی مثال اعلى الله تعالی کے لیے ہے ) عالم مجاز میں جو حقیقت کا پل ہے بیت یعنی  خانہ و گھر اس بیتوت(آرام کرنے کی جگہ) کی خبر دیتا ہے کہ صاحب خانہ کے قرار و آرام کی جگہ ہے۔ اگرچہ دولت مندوں اور اہل دول کی نشست و برخاست کے مکان بے شمار ہیں لیکن یہ ایسا گھر ہے جو اغیار کی مزاحمت سے بیگانہ ہے اور  معشوق حقیقی کا مکان اور آرام گاہ ہے۔ اگر چہ حدیث قدسی وَلَكِنْ يَسَعُنِي قَلْبُ عَبْدِي الْمُؤْمِنِ(لیکن میں اپنے مومن بندے کے دل میں سماتا ہوں ) کے موافق مومن بندے کا دل بیچونی ظہور کی گنجائش حاصل کر لیتا ہے لیکن بیتیت یعنی  گھر ہونے کی نسبت جو بیتوتت کی خبر دیتی ہے کہاں حاصل کرسکتا ہے اور اغیار کی مزاحمت کو جو گھر کے لوازم سے ہے تا کہ غیر کو سجدہ نہ ہو کیونکہ غیریت مسجود ہونے کے منافی ہے حضرت محمد رسول الله ﷺنے اپنی طرف سے سجده تجویز نہ کیا لیکن بیت الله کی طرف بڑے شوق و رغبت کے ساتھ سجدہ کیا اس بیان سے فرق معلوم کر لیں۔ شتان ما بين الساجد والمسجود(ساجد ومسجود کے درمیان بہت فرق ہے ) میرے بھائی جب تو نے صورت کعبہ کا تھوڑا ساحال سن لیا تو اب حقیت کعبہ کی نسبت بھی کچھ سن لے حقیقت کعبہ(مراد حق تعالیٰ ہے جو سجدے اور عبادت کے لائق ہے) اس بیچون ( بے مثل)واجب الوجود کی ذات سے مراد ہے جہاں تک ظہور اور طلب کی گرد بھی نہیں پہنچی اور مسجود اور معبود ہونے کے لائق ہے اس حقیقت جل شانہ کو اگر حقیقت محمدی کی مسجود کہیں تو اس میں کیا ڈر ہے اور اس سے اس کے افضل ہونے میں کیا ہرج ہے۔ ہاں حقیقت محمدی جہان کے تمام افراد کی حقیقتوں سے افضل ہے لیکن کعبہ معظمہ کی حقیقت عالم کی قسم سے نہیں۔ تا کہ اس کی طرف نسبت کی جائے اور اس کے افضل ہونے میں توقف کیا جائے، تعجب ہے کہ ان دونوں صاحب دولتوں کی صورتوں کا فرق ساجد ومسجود ہونے کے باعث ہے صاحب ہنرعقلمندوں نے ان دونوں کے حقائق کا تفاوت معلوم نہیں کیا ۔ اسی لیے اعراض و انکار کے مقام میں رہے ہیں اور طعن وتشنیع کے لیے زبان دراز کی ہے حق تعالی ان کو انصاف دے تاکہ بے سوچے سمجھے ملامت نہ کریں رَبَّنَا اغْفِرْ لَنَا ذُنُوبَنَا وَإِسْرَافَنَا فِي أَمْرِنَا وَثَبِّتْ أَقْدَامَنَا وَانْصُرْنَا عَلَى الْقَوْمِ الْكَافِرِينَ (یا اللہ  تو ہمارے گناہوں اور کام کی زیادتی کو بخش اور ہم کو ثابت قدم رکھا اور کافروں پر ہمیں غلبہ دے) وَالسَّلَامُ عَلَى مَنِ اتَّبَعَ الْهُدَى (سلام ہو اس شخص پر جس نے ہدایت اختیار کی )

مکتوبات حضرت مجدد الف ثانی دفتر سوم صفحہ402 ناشر ادارہ مجددیہ کراچی

بِسْمِ اللّٰهِ الرَّحْمٰنِ الرَّحِيْمِ        اَلْحَمْدُ لِلَّهِ وَسَلَامٌ عَلٰی عِبَادِهِ الَّذِينَ اصْطَفٰى سب تعریف اللہ ہی کے لئے ہے اور اس کے برگزیدہ بندوں پر سلام ہو۔

) وہ راہ جو جناب قدس جل شانہ کی طرف لے جانے والے ہیں دو ہیں ایک وہ راستہ ہے جو قرب نبوت سے تعلق رکھتا ہے اور اصل الاصل تک پہنچانے والا ہے ۔ اس راہ کے پہنچنے والے بالاصالت انبیاءعلیہم الصلوة والسلام اور ان کے اصحاب ہیں اور امتوں میں سے بھی جس کسی کو چاہیں اس دولت سے سرفراز کرتے ہیں مگر یہ لوگ قلیل بلکہ اقل( بہت کم) ہیں ۔ اس راستے میں واسطہ اور حیلولہ(حائل بننا)نہیں ۔ ان واصلوں میں سے جو کوئی فیض حاصل کرتا ہے کسی کے واسطہ کے بغیر اصل سے حاصل کرتا ہے اور کوئی ایک دوسرے کا حائل نہیں ہوتا دوسرادہ راستہ ہے جوقرب ولایت سے تعلق رکھتا ہے۔ تمام قطب اور اوتاد اور ابدال اور نجیب عام اولیاء اللہ سب اسی راستہ سے واصل ہوئے ہیں راہ سلوک اسی راہ سے مراد ہے بلکہ جذبہ متعارفہ بھی اسی میں داخل ہے۔ اس راستے میں واسطہ اور حیلولہ ثابت ہے اسی راہ کے واصلوں کے پیشوا اور ان کے سرکردہ اور ان بزرگواروں کے فیض کا سرچشمہ حضرت علی کرم الله وجہ الکریم ہیں اوریہ عظیم الشان مرتبہ انہی کے ساتھ تعلق رکھتا ہے۔ اس مقام میں گویاآنحضرت ﷺکے دونوں مبارک قدم حضرت علی المرتضی کے سر مبارک پر ہیں اور حضرت فاطمہ اور حضرات حسنین رضی اللہ تعالی عنہم بھی اس مقام میں ان کے ساتھ شریک ہیں میرے خیال میں حضرت امیر رضی اللہ عنہ وجود عنصری میں  پیدائش سے پہلے بھی اسی مقام کی پناہ میں رہے ہیں جیسے کہ وجودعنصری کے بعد ہیں اور اس راہ سے جس کسی کو فیض و ہدایت پہنچا ہے انہی کے وسیلہ سے پہنچتا ہے کیونکہ اس راہ کا اخیری نقطہ یہی ہیں اور اس مقام کا مرکزا نہی سے تعلق رکھتا ہے جب حضرت امیر معاویہ رضی الله عنہ کا دور تمام ہوا یہ عظیم الشان مرتبہ ترتیب وار حضرات حسنین رضی اللہ عنہما کے سپرد ہوا اور ان کے بعد بارہ اماموں میں سے ہر ایک کے ساتھ ترتیب وتفصیل وار قرار پایا ان بزرگواروں کے زمانہ میں اور ایسے ہی ان کے انتقال فرما چکنے کے بعد جس کسی کو فیض و ہدایت پانچتا رہا انہی بزگواروں کے واسطے اور حیلولہ سے ہی پہنچا رہا۔ گو اپنے زمانہ کے اقطاب و نجباء ہی ہوئے ہوں لیکن سب کا ملجاء و ماوی میں بزرگوار ہوئے ہیں کیونکہ اطراف کو مرکز کے ساتھ ہونے سے پارہ نہیں حتی کہ حضرت شیخ عبدالقادر جیلانی قدس سرہ کی نوبت آ پنی اور منصب مذکور اس بزرگ قدس سرہ کے سپرد ہوا۔ مذکورہ بارہ اماموں اور حضرت شیخ قدس سرہ کے سوا اور کوئی شخص اس مرکز پر مشہود نہیں ہوتا۔ اس راستہ میں تمام اقطاب ونجباء کو فیوض و برکات کا پہنچنا شیخ قدس سره ہی کے وسیلہ شریف سے مفہوم ہوتا ہے کیونکہ یہ مرکز شیخ قدس سرہ کے سوا کسی اور کومیسر نہیں ہوا اسی واسطے شیخ قدس سرہ نے فرمایا ہے۔ شعر۔

 افلت شموس الأولين و شمسنا  ابدا على أفق الاعلي لا تغرب

ترجمہ شعر پہلوں کے سورج غروب ہو گئے ہمارا سورج ہمیشہ روشنی دیگا 

شمس یعنی آفتاب سے مراد ہدایت وارشاد کے فیضان کا آفتاب ہے اور اس کے غروب ہونے سے مراد فیضان مذکور کا نہ ہونا ہے چونکہ حضرت شیخ قدس سرہ کے وجود سے وہ معاملہ جو اولین سے تعلق رکھتا تھا ۔ شیخ قدس سرہ کے سپرد ہوا اور رشد و ہدایت کے پہنچنے کا واسطہ و وسیلہ ہو گئے جیسے کہ ان سے پہلے بزرگوار ہوئے ہیں۔ نیز جب تک فیضان کے وسیلہ کا معاملہ بر پا ہے۔شیخ قدس سرہ کے توسل دتوسط ہی سے ہے اس لیے درست ہوا کہ افلت شموس الأولين و شمسنا  الخ

 سوال: یہ حکم  مجدد الف ثانی میں نقص پیدا کرتا ہے کیونکہ مکتوبات جلد دوم کے ایک مکتوب میں مجددالف معانی کے معنی اس طرح لکھے ہیں کہ اس مدت میں جس قسم کا فیض امتوں کو پہنچتا ہے اسی کے وسیلہ سے پہنچتا ہے اگر چہ وقت کے اقطاب واوتاد اور ابدال ونجباء ہوں۔

 جواب: میں کہتا ہوں کہ مجددالف ثانی سے مراد اس مقام میں حضرت شیخ قدس سرہ کا قائم مقام ہے اور حضرت  شیخ کی نیابت و قائم مقامی کے باعث یہ معاملہ اس پر وابستہ ہے جیسے کہتے ہیں۔ نور القمر مستفاد من نور الشمس (چاند کا نور سورج کے نور سے حاصل ہوا ہے)

سوال: مجدد الف ثانی کے معنی جو اوپر مذکور ہوئے ہیں مشکل ہیں کیونکہ مدت مذکورہ میں حضرت عیسی علی نبینا وعلیہ الصلوۃ والسلام نزول فرمائیں گے اور حضرت مہدی علیہ الرضوان بھی ظہور کریں گے اور ان بزرگواروں کا معاملہ اس سے برتر ہے کہ کسی کے وسیلہ سے فیوض اخذ کریں۔

 جواب: میں کہتا ہوں کہ تو سط و وسیلہ کا معاملہ مذکورہ بالا را ہوں میں سے دوسرے راستہ پر موقوف ہے جو قرب ولایت سے مراد ہے لیکن راه اول میں جوقرب نبوت سے مراد ہے تو سط و وسیلہ کا معاملہ مفقود ہے۔ اس راستہ سے جو کوئی واصل ہوا ہے کوئی حائل و متوسط در میان نہیں آیا۔ دوسرے کے وسیلہ کے بغیر اس کو فیوض و برکات حاصل ہوئے ہیں ۔ تو سط وحیلولہ فقط دوسرے راستہ میں ہے اور اس مقام کا معاملہ علیحدہ ہے جیسے گزر چکا ۔ حضرت عیسیٰ علی نبینا و علیہ الصلوة والسلام اور حضرت مہدی علیہ الرضوان راه اول سے حاصل ہیں جیسے کہ حضرات شیخين رضی اللہ عنہماآنحضرت علیہ الصلوة والسلام کی تبعیت کے ضمن میں راہ اول سے واصل ہوئے ہیں اور اپنے اپنے درجوں کے موافق وہاں شان خاص رکھتے ہیں ۔

 تنبیہ: واضح ہو کہ ممکن ہے کہ آدی قرب ولایت کے راستہ سے قرب نبوت تک پہنچ جائے اور ہر دو معاملہ میں شریک ہو اور انبیا علیہم الصلوة والسلام کے طفیل کو بھی جگہ دیدیں اور دونوں جگہوں کا معاملہ اس پر وابستہ کر دیں۔ 

خاص کند بنده – مصلحت عام را ترجمہ: خاص کر لیتا ہے اک کوتا بھلا ہو عام کا 

ذَلِكَ فَضْلُ اللَّهِ يُؤْتِيهِ مَنْ يَشَاءُ وَاللَّهُ ذُو الْفَضْلِ الْعَظِيمِ یہ الله تعالی کا فضل ہے جس کو چاہتا ہے دیتا ہے اللہ تعالی بڑے فضل والا ہے) سُبْحَانَ رَبِّكَ رَبِّ الْعِزَّةِ عَمَّا يَصِفُونَ  وَسَلَامٌ عَلَى الْمُرْسَلِينَ  وَالْحَمْدُ لِلَّهِ رَبِّ الْعَالَمِينَ(پاک ہے تیرا رب اس وصف سے کہ جو وہ کرتے ہیں بزرگ اور برتر ہے اور اللہ تعالی کیلئے حمد ہے جو تمام جہانوں کا پالنے والا ہے)

مکتوبات حضرت مجدد الف ثانی دفتر سوم صفحہ399 ناشر ادارہ مجددیہ کراچی

بِسْمِ اللَّهِ الرَّحْمَنِ الرَّحِيمِ اَلْحَمْدُ لِلّٰهِ وَسَلَامٌ عَلٰی عِبَادِہِ الَّذِیْنَ اصْطَفٰی اللہ تعالی کیلئے حمد ہے اور اس کے برگزیدہ بندوں پر سلام ہو) حقیقت محمدی جو ظہور اول اورحقيقۃ الحقائق ہے۔ اس کا مطلب یہ ہے کہ دوسری حقائق کیا انبیاء کرام کی حقائق اور کیا ملائکہ عظام کی حقائق سب اس کے اظلال کی مانند ہیں اور وہ تمام حقائق کا اصل ہے۔ رسول اللہﷺنے فرمایا ہے۔ اول ماخلق الله نوری(سب سے اول خدا تعالی نے میرے نور کو پیدا کیا اور فرمایا ہے خلقت من نور الله والمؤمنون من نوری ( میں اللہ تعالی کے نور سے پیدا ہوا ہوں اور مومن میرے نور سے ) پس وہ حقیقت باقی تمام حقائق اور حق تعالی کے درمیان واسطہ ہے اور آنحضرت ﷺکے واسطہ کے بغیر کوئی مطلوب تک نہیں پہنچ سکتا۔ فهو نبی الأنبياء والمرسلين وارساله رحمة للعالمين عليه وعلى اله الصلوة والسلام ( وہ تمام انبیاء اور مرسلین کے نبی ہیں اور ان کا بھیجنا جہان کے لیے رحمت ہے) یہی وجہ ہے کہ انبیاءاولوالعزم با وجود اصالت کے ان کی تبعیت طلب کرتے رہے اور ان کی امت میں داخل ہونے کی آرزو کرتے رہے جیسے کہ حدیث میں وارد ہے۔

 سوال: وہ کون سا کمال ہے جو حضور کی امت ہونے پر وابستہ ہے اور انبیاء کو دولت نبوت کے باوجود میسر نہیں ہوا۔

 جواب: وہ کمال اس حقیقۃ الحقائق کے ساتھ واصل اور متحد ہونا ہے جو وراثت و تبعیت پر وابستہ ہے بلکہ حق تعالی کے کامل فضل پر موقوف ہے جو حضور کی امتوں میں سے اخص خواص کے نصیب ہے جب تک امت نہ ہوں اس دولت تک نہیں پہنچتے اور تو سط کا حجاب رفع نہیں ہوتا جو اتحاد کے وسیلہ سے میسر ہے۔ شاید اسی واسطے حق تعالی نے فرمایا ہے کہ كُنْتُمْ ‌خَيْرَ أُمَّةٍ (تم تمام امت میں سے بہتر ہو پس آنحضرت علیہ الصلوة والسلام جس طرح انبیاء کرام اور ملائکہ عظام کے ہر ایک فرد سے افضل ہیں اسی طرح کل ہونے کی حیثیت سے کل سے افضل ہیں اس لیے کہ اصل کو اپنے ظل پر فضیلت ہے اگر چہ اس ظل کے آگے اور ہزارہا ظل ہوں کیونکہ اس بارگاہ جل شانہ سے ظل تک فیوض کا پہنچنا اس اصل ہی کے واسطہ اور طفیل سے ہے ۔ فقیر نے  اپنے رسالوں میں تحقیق کی ہے کہ اوپر کے نقطے کو نیچے کے تمام نقطوں پر جو اس کے ظلال کی طرح ہیں فضیلت ہے اور عارف کا اس اوپر کے نقطہ کو ( جو اصل کی طرح ہے )قطع کرنا نیچے کے تمام نقطوں کو ( جو اس کےظلال کی مانند ہیں ) قطع کرنے سے زیادہ درجہ رکھتا ہے۔

سوال: اس بیان سے لازم آتا ہے کہ اس امت کے خواص کو انبیاء پر فضیلت ہے۔ جواب: کوئی فضیلت لازم نہیں آتی۔ البتہ اس قدر ثابت ہے کہ اس امت کے خواص اس دولت میں انبیا کے شریک ہیں ۔ اس کے علاوہ اور بہت سے کمالات ہیں جن کے ساتھ انبیاء علیہم الصلوة والسلام کو زیادتی اور خصوصیت حاصل ہے۔ اس امت میں سے اخص خواص خواه کتنی ہی زیادہ ترقی کرے۔ اس کا سراس پیغمبر کے پاؤں تک بھی نہیں پہنچتا جو تمام پیغمبروں سے کم درجہ ہے پھر برابری اور زیادتی کی کیا گنجائش ہے۔ اللہ تعالی فرماتا ہے ۔ وَلَقَدْ ‌سَبَقَتْ كَلِمَتُنَا لِعِبَادِنَا الْمُرْسَلِينَ   إِنَّهُمْ لَهُمُ الْمَنْصُورُونَ (ہمارے مرسل بندوں کے لیے ہمارا وعدہ ہو چکا ہے کہ یہی لوگ فتح مند ہیں ) اگر امتوں میں سے کوئی فرد اپنے پیغمبر کے طفیل و تبعیت کے باعث بعض پیغمبروں سے اوپر چلا جائے تو خادمیت اور تبعیت کے طور پر ہوگا کیونکہ معلوم ہے کہ خادم کو مخدوم کے ہمسروں کے ساتھ خادمیت و تبعیت کے سوا اور کوئی نسبت نہیں۔ خادم وطفیلی ہر وقت طفیلی ہے جو کچھ آخر کار مراتب ظلال کے طے کرنے کے بعد اس فقیر پر منکشف ہوا ہے ۔ یہ ہے کہ حقیقت میں جوحقيقة الحقائق ہے۔ اس حب کا تعین اور ظہور ہے جو ظہورات کا مبدأ  اور مخلوقات کی پیدائش کا منشاء ہے۔ جیسے کہ اس حدیث قدسی میں آیا ہے جو مشہور ہے۔ كُنْتُ ‌كَنْزًا ‌مَخْفِيًّا فَأَرَدْتُ أَنْ أُعْرَفَ فَخَلَقْتُ الْخَلْقَ ( میں ایک پوشیده خزانہ تھا میں نے چاہا کہ پہنچانا جاؤں پس میں نے خلق کو پیدا کیا) اول اول دہ چیز جو اس پوشیدہ خزانہ سے میدان ظہور میں آئی یہی حب ہے جومخلوقات کی پیدائش کا سبب ہوئی ہے۔ اگر یہ حب نہ ہوتی تو ایجاد کا دروازہ نہ کھلتا اور عالم عدم میں راسخ اور مستمر رہتا۔ حدیث دی لَوْلَاكَ لَمَا ‌خَلَقْتُ ‌الْأَفْلَاكَ (اگر تو نہ ہوا تو میں آسمانوں کو پیدا نہ کرتا) کے ستر کو جو حضرت خاتم الرسل کے شان میں ہے اسی جگہ ڈھونڈنا چاہیئے اور وَلَوْلَاكَ لَمَا أَظْهَرْتُ الرَّبُوْبِيَّةَ اگر تو نہ ہوتا تو میں اپنی ربوبیت کو ظاہر نہ کرتا) کی حقیقت کو اس مقام میں طلب کرنا چاہیئے۔ سوال: فتوحات مکیہ والے نے تعین اول جو حقیقت محمدی ہے حضرت اجمال علم کو کہا ہے اور تم نے اپنے رسالوں میں تعین اول تعین وجودی کو کہا ہے اور اس کے مرکز کو جو اس کے تمام اجزا میں سے اشرف واسبق(سب سے پہلی) ہے۔ حقیقت محمد قرار دیا ہے اور حضرت اجمال علم کو اس تعین وجودی کا ظل سمجھا ہے اور یہاں لکھتے ہو کہ تعین اول حبی ہے اور وہ حقیقت محمدی ہے۔ ان اقوال کے درمیان موافقت کی وجہ کیا ہے؟

جواب: بسا اوقات شے کا ظل اپنے آپ کوشے کے اصل پر ظاہر کرتا ہے اور سالک کو اپنے ساتھ گرفتار کر لیتا ہے۔ پس وہ دونوں تعین تعین اول کے ظلال ہیں جو عروج (عروج سے مراد سالک کا حق تعالی کی ذات و صفات عالیہ کے مشاہدہ میں مستغرق ہو جانا اور مخلوق سے منقطع ہونا ہے)  کے وقت عارف تعین اول یعنی تعین حبی کے اصل کی طرح ظاہر ہوتا ہے۔

 سوال: تعین وجودی کرتعین حبی کاظل کہنا کس طرح درست ہے۔ حالانکہ وجود کو حب پر سبقت ہے کیونکہ حب وجود کی فرع ہے۔

 جواب: اس فقیر نے اپنے رسالوں میں تحقیق کی ہے کہ آنحضرت حق سبحانہ وتعالی بذات خود موجود ہے نہ کہ وجود کے ساتھ ۔ اسی طرح حق تعالی کی صفات ثمانیہ واجب الوجود کی ذات کے ساتھ موجود ہیں۔ نہ کہ وجود غیر کے ساتھ کیونکہ وجود بلکہ وجوب کو بھی اس مرتبہ میں گنجائش نہیں۔ کیونکہ وجوب وجود دونوں اعتبارات میں سے ہیں ۔ عالم کے ایجاد کے لیے پہلے جو اعتبار پیدا ہوا وہ حب ہے۔ بعد ازاں اعتبار وجود جو ایجاد کا مقدمہ ہے کیونکہ حضرت ذات جل شانہ اس حب اور اس وجود کے اعتبارات کے بغیر عالم اور عالم کی ایجاد سے مستغنی ہے۔ إِنَّ اللَّهَ ‌لَغَنِيٌّ عَنِ الْعَالَمِينَ الله تعالی تمام جہانوں سے غنی ہے) اور تعین علمی اجمالی کو ان دونوں تعینوں کاظل کہنا اس اعتبار سے ہے کہ وہ دونوں تعین صفات کے ملاحظہ کے بغیر ذات تعالی کے اعتبار سے ہیں اور اس تعین میں  صفت  ملحوظ ہے جوذات عزشانہ کے لیے ظل کی طرح ہے۔ جاننا چاہے کہ تعین اول میں کہ تعین حبی ہے جب بڑی بار یک نظر سے دیکھا جاتا ہے تو معلوم ہوتا ہے کہ اس تعین کا مرکز حب ہے جو حقیقت محمدی ﷺ ہے اور اس کا محیط(جوصورت مثال میں دائرہ کی طرح ہے اس مرکز کےظل کی مانند ہے) خلت ہے جس کو حقیقت ابرا ہیمی کہتے ہیں ۔ پس جب اصل ہے اور خلت اس کے ظل کی طرح اور یہ مجموعہ مرکز ومحيط کہ ایک دائرہ ہے تعین اول ہے اور اس کے اجزاء میں نے اشرف اور اسبق جزویعنی مرکز کے نام سے کہ حب سے مراد ہے مسمی ہے اور نظر کشفی میں بھی اصالت کے اعتبار اور اس جزو کے غلبہ سے تعین حبی ظاہر ہوتا ہے چونکہ محيط دائرہ  مرکز کے ظل کی طرح ہے اور اسی سے پیدا ہے اور وہ مرکز اس کا اصل ومنشا ہے اس لیے اگر اس محیط کو جو حب وخلت پرمشتمل ہے جو ایک ہی دائرہ کے مرکز ومحيط ہیں اور تعین ثانی نظرکشفی میں تعین وجودی ہے جو تعین اول کے ظل کی طرح ہے جیسے کہ گزر چکا چونکہ مرکز محیط کا اصل ہے اس لیے محیط کے لیے مطلوب تک پہنچنے میں مرکز کا واسطہ و وسیلہ ضروری ہے کیونکہ مطلوب تک پہنچنا مرکز ہی کی راہ سے ہے جو دائرہ کا اصل اور اجمال ہے اس بیان سے اس مناسبت و اتحاد کو جو حضرت حبیب اللہ علیہ الصلوة والسلام کو حضرت خلیل اللہ علیہ الصلوة والسلام کے ساتھ ہے ۔ معلوم کرنا چاہیئے چونکہ ظل کے مطلوب تک پہنچنے میں اصل واسطہ و وسیلہ ہے۔ اس لیے حضرت خلیل الله علیہ الصلوة والسلام نے حضرت حبیب اللہ کا واسطہ و وسیلہ طلب کیا ہے اور یہ آرزو فرمائی ہے کہ ان کی امت میں داخل ہوجیسے کہ وارد ہے۔

 سوال: جب معاملہ ایسا ہے تو پھر حضرت حبیب اللہ کو حضرت خلیل اللہ کی ملت کی متابعت کا امر کس لیے ہے اور آنحضرت ﷺنے اپنے اوپر صلوۃ وسلام کے بیان میں كَمَا ‌صَلَّيْت ‌ اور كَمَا سَلَّمْت  عَلَى إبْرَاهِيمَ کیوں فرمایا؟

جواب:شے کی حقیقت جس قدر زیادہ بلند اور تنزیہ کے زیادہ قریب ہوگی اسی قدر اس حقیقت  کا مظہر عالم عناصر میں زیادہ پست اور صفات بشریت کے ساتھ زیادہ متلبس ہوگا ۔ پس اس مظہرکا عروج    کی راہ سے اس حقیقت تک پہنچنا بہت مشکل ہے اور وہ خلت جو حضرت ابراہیم علی نبینا و علیہ الصلوۃ والسلام کو عطا ہوئی ہے۔ حقیقت  ابرا ہیمی تک پہنچنے کے لیے جو حقیقت محمدی کے قریب وجوار میں واقع ہوئی ہے ۔ سیدهی شاہراہ ہے جیسے کہ گزر چکا ۔ حضرت ابراہیم علیہ السلام اسی راستہ سے وہاں تک پہنچے ہیں۔ اسی واسطے امر ہوا ہے کہ اس ملت کی متابعت کر کے حقیقت الحقائق تک وصول فرمائیں اور آنحضرت ﷺنے اسی واسطے کماصلیت فرمایا ہے کہ حضرت ابراہیم علیہ السلام پرصلوۃ وسلام وصول حقیقت کی دولت کے حاصل ہونے کے بعد ہے یا ہم یوں کہتے ہیں کہ کبھی ایسا بھی ہوتا ہے کہ فاضل(اعلی) کو مفضول (ادنی)کی متابعت کا حکم کرتے ہیں اور اس متابعت کے امر سے اس کی فضیلت میں کوئی قصور لازم نہیں آتا۔ اللہ تعالی نے نبی علیہ الصلوة والسلام کو فرمایا ہے۔ ‌وَشَاوِرْهُمْ فِي الْأَمْرِ (امر میں ان سے مشورہ کر) اصحاب کے ساتھ مشوره کرنے کا حکم ان کی متابعت کے حکم سے خالی نہیں ۔ ورنہ مشورت کا کیا فائدہ ہے۔ 

جاننا چاہیئے کہ حضرت صدیق کی حقیقت یعنی اسماء الہی جل شانہ میں سے ان کا رب جو ان کا مبدا تعین ہے کسی امر کے توسط کے بغیر حقیقت محمد کاظل ہے۔ اس طرح پر کہ جو کچھ اس حقیقت  میں موجود ہےاس  ظل میں تبعیت و وراثت کے طورپر ثابت ہے اسی واسطے حضرت  صد یق رضی اللہ عنہ اس امت  کے وارثوں میں سے اکمل وافضل ہیں۔ رسول اللہ ﷺنے فرمایا ہے۔ مَا ‌صَبَّ ‌اللَّه شَيْئًا فِي صَدْرِي إِلَّا وَصَبَّهُ فِي صَدْرِ أَبِي بَكْرٍ (جس چیز کو اللہ تعالی نے میرے سینے میں ڈالا میں نے اس چیز کو ابوبکر کے سینے میں بھی ڈالا ) اور یہ بھی ظاہر ہوا ہے کہ حقیقت اسرافیلی بھی یہی حقیقت  محمدی ہے لیکن اصالت وظليت کے طریق پرنہیں جیسے کہ حضرت صدیق کی حقیقت اس حقیقت کاظل ہے۔ بلکہ یہاں دونوں اصالت رکھتی ہیں کوئی ظلیت در میان حائل نہیں ۔ فرق صرف کلیت اور جزئیت کا ہے کیونکہ آنحضرت ﷺکل ہیں ۔ اسی واسطے وہ حقیقت آنحضرت ﷺکے نام سے مسمی ہے اور ملائکہ کرام کے حقائق اس حقیقت اسرافیلی سے پیدا ہوئے ہیں۔

سوال: عارف کو اپنی حقیقت سے جو اس اسم الہی جل شانہ سے مراد ہے جو اس کا رب ہے اس حقیقت تک پہنچنے کے بعدترقی جائز ہے یا نہیں۔

 جواب :اس حقیقت تک پہنچنا مراتب سلوک کے طے کرنے کے بعد جو سیر الی اللہ کے تمام ہونے سے مراد ہے دوقسم پر ہے۔ ایک قسم وہ ہے کہ جس میں اس اسم کے ظلال میں سے اس ظل تک پہنچنا ہے جس نے اپنے آپ کو مظاہرو جو بیہ میں اپنی حقیقت کے طور پر ظاہر کیا ہے اور اصل کے رنگ پر نمایاں ہے۔ اس راستے میں یہ اشتباه بہت واقع ہوتا ہے اور سالک کے لیے بڑی بھاری گھاٹی ہے۔ محض فضل کے ساتھ اس گھاٹی سے خلاصی میسر ہوتی ہے اور شک نہیں کہ اس حقیقت نماظل سے ترقی جائز بلکہ واقع ہے اور اگر اپنی نفس حقیقت تک وصول واقع ہو جائے تو دوسرے کے طفیل و تبعیت کے بغیر اس سے ترقی کرنا جائز نہیں کیونکہ وہ حقیقت اس کے ذاتی استعداد کے مراتب کی نہایت ہے۔ ہاں اگرطفیل سے اس کو دوسری جقيقت تک جواس کی حقیقت کے اوپر ہے پہنچائیں تو جائز بلکہ واقع ہے یہ سیر گویا سیرقسری(خارج از ذات، جبری) ہے جو سیر طبیعی اور استعدادی کے ماسوا ہے۔ چنانچہ اس کا تھوڑا سا حال حقیقت محمدی کے حصول کے بیان میں پہلے گزر چکا ہے۔

 سوال: حقیقت محمدی حقيقۃ الحقائق ہے اور ممکنات کی حقیقتوں میں سے کوئی حقیقت اس سے اوپرنہیں اس سے ترقی جائز ہے یانہیں ۔ تم نے اپنے رسالوں میں لکھا ہے کہ حقیقت محمدی سے ترقی واقع ہوئی ہے یہ معاملہ کیا ہے؟ 

. جواب: جائز نہیں کیونکہ اس مرتبہ کے اوپر مرتب لاتعین ہے جس کے ساتھ متعین کا وصول و الحاق محال ہے۔ وصول و الحاق بے تکیف کہنا صرف ایک زبانی بات ہے جس کے ساتھ حقیقت معاملہ تک پہنچنے سے پہلے تسلی کی جاتی ہے لیکن حقیقت معاملہ تک پہنچنے کے بعد وصول و الحاق کے نہ ہونے کا حکم کرنا لازم ہے کیونکہ وہاں تک کی آمیزش نہیں اور یہ جو میں نے لکھا ہے کہ حقیقت میں سے ترقی واقع ہوئی ۔ اس حقیقت سے مراد اس حقیقت کا ظل تھا جو حضرت اجماں علم سے مراد ہے جس کو وحدت سے تعبیر کرتے ہیں اس وقت ظل اپنے اصل کے ساتھ مشتبہ ہوا تھی جب اللہ تعالی کے محض فضل سے اس ظل اور باقی تمام ظلال سے خلاصی میسر ہوئی تو معلوم ہوا کہ حقیقت الحقائق سے ترقی واقع بلکہ جائز نہیں کیونکہ وہاں سے قدم اٹھنا اور آگے رکھنا وجوب میں جانا اور امکان سے نکلنا ہے جو عقلی اور شرعی طور پرمحال ہے۔

 سوال: اس تحقیق سے لازم آتا ہے کہ حضرت خاتم الرسل ﷺکی بھی اس حقیقت  سے ترقی واقع نہیں ہوئی ۔

 جواب :آنحضرتﷺبھی باوجود اس قدر بلند شان اور جاہ و جلال کے ہمیشہ ممکن ہی ہیں اور ہرگز امکان سے نکل کر وجوب کے ساتھ نہ ملیں گے کیونکہ یہ امر الوہیت کے ساتھ حق ہونے کا موجب ہے۔تعالی الله أن يكون له ند و شریک( الله تعالی ہمسر اور شریک سے برتر ہے)

دع ما ‌ادعته النصارى في نبيهم ترجمہ: چھوڑ دعوی  جو نصاری نے کیا اپنے نبی میں۔

 سوال: تحقیق سابق سے واضح ہوا کہ دوسروں کو بھی آنحضرت ﷺکے طفیل اور وراثت سے حقیقۃ الحقائق کے ساتھ وصول والحاق واتحاد ثابت ہے اور ان کے خاص کمال میں شرکت حاصل ہے۔ پھر اس کمال کے حاصل ہونے کی صورت میں جوحجاب کے رفع ہونے اور واسطہ کے دور ہونے پرمشتمل ہے اور تمام کمالات سے برتر ہے۔ تابع ومتبوع اور اصلی اور طفیلی کے درمیان کیا فرق ہے اور متبوع اور اصل میں کونسی زیادتی ہے جو تابع وطفیلی میں نہیں۔

جواب: اس حقیقت کے ساتھ دوسروں کا وصول و الحاق ایسا ہے جیسے خادم کا مخدوم کے ساتھ اورطفیلی کا اصل کے ساتھ ہے اگر واصل اخص خواص میں سے ہے جن کا وجود بہت ہی کم ہے تو خود خادم ہی ہے اور اگر انبیاء میں سے ہے تو وہ بھی طفیلی اور پس خوردہ کھانے والا ہے اس کو مخدوم کے ساتھ کیا شرکت ہے اور اس کے مقابلہ میں اس کی کونسی عزت و آبرو ہے ۔ طفیلی اگر چہ ہم نشین ہم لقمہ ہے لیکن پھر بھی طفیلی ہی ہے۔ خادم جومخدوم کی تبعیت سے بلند مکانوں میں جاتے ہیں اور خاص خاص کھانوں سے پس خوردہ کھاتے ہیں اور عزت و احترام پاتے ہیں یہ سب کچھ مخدوم کی بزرگی اور اس کی متابعت کی بلندی کے باعث ہے۔ گویا مخدوم کو اپنی ذاتی عزت کے باوجود ایک اور عزت خادموں کے الحاق کے باعث حاصل ہو جاتی ہے اور ان کی شان زیادہ بلند ہو جاتی ہے ۔ غور فرمائیں کہ حدیث نبوی ﷺ میں آیا ہے کہ مَنْ ‌سَنَّ ‌سُنَّةً حَسَنَةً كَانَ لَهُ أَجْرُهَا وَمِثْلُ أَجْرِ مَنْ عَمِلَ بِهَا (جس نے کوئی نیک سنت یا طریقہ جاری کیا اس کے لیے اس کا اجر ہے اور اس شخص کا اجر بھی ہے جس نے اس پر عمل کیا ) پس سنت حسنہ میں متبوع کے جس قدر زیادہ تابعدار ہوں گے ان کے اجروں کی مانند اسی قدر زیادہ اس کا اجر ہوگا اور اسی قدر اس کا مرتبہ زیادہ ہوگا۔ اس صورت میں تابع کو متبوع کے ساتھ کیا شر کت و مساوات ہوگی۔ سنیئے سنیئے جائز ہے کہ بہت سے لوگ ایک مقام میں ہوں اور ایک ہی دولت میں شریک ہوں لیکن ان میں سے ہر ایک کے ساتھ جدا جدا معاملہ ہو اور ایک کو دوسرے سے اطلاع نہ ہو۔ ازواج مطہرات بہشت میں آنحضرت ﷺکے ساتھ ایک ہی مقام میں ہوں گی اور ایک ہی طعام وشراب سے تناول فرمائیں گی لیکن وہ معاملہ جو آنحضرت ﷺکے ساتھ ہوگا ان کے ساتھ نہ ہوگا اور وہ لذت و سرور جو آنحضرت ﷺکو حاصل ہوگا ان کو نہ ہو گا اگر وہاں ان کو آنحضرت ﷺکے ساتھ تمام امور میں شرکت ہوتو آنحضرت ﷺکی افضیلت کی طرح ان کی افضیلت بھی سب پر لازم آئے گی کیونکہ وہاں کی فضیلت اللہ تعالی کے نزدیک کثرت ثواب کے لحاظ سے ہے۔

 سوال:یہ تعین اول جوتعین حبی اور حقیقت  محمدی ہےممکن ہے یا واجب اور حادث ہے یا قدیم۔ صاحب فصوص نے تعین اول کو حقیقت محمدی کہا ہے اور اس کو وحدت سے تعبیر کیا ہے۔ اسی طرح تعین ثانی کو واحد بیت کہا ہے اور اعیان ثابتہ جن کو حقائق ممکنات کہتے ہیں اس مرتبہ میں ثابت کیے ہیں اور ان دونوں تعینوں کو تعین وجوبی کہتا ہے اور قدیم جانتا ہے اور باقی تین تنزلوں کو جوروحی و مثالی وجسدی ہیں ۔ تعین امکانی کہتا ہے تمہارا اعتقاد اس مسئلہ میں کیا ہے؟ 

 جواب : اس فقیر کے نزدیک کوئی تعین ومتعین نہیں وہ کون ساتعین ہے جو لاتعین کو تعین کرے یہ الفاظ حضرت شیخ محی الدین قدس سرہ کے مذاق کے موافق ہیں۔ اس فقیر کی عبارت میں اگر اس قسم کے الفاظ واقع ہوں تو صنعت و مشاکلت کی قسم سے جاننے چاہئیں۔ بہر حال میں کہتا ہوں کہ وہ تعین تعین امکانی اور مخلوق و حادث ہے۔ رسول الله ﷺ نے فرمایا ہے أَوَّلَ مَا ‌خَلَقَ ‌اللَّهُ ‌نُورِي (سب سے اول اللہ نے میرےنور کو پیدا کیا اور دوسری حدیثوں میں اس نور کے پیدا ہونے کے وقت کا تعین بھی آیا ہے چنانچہ فرمایا ہے کہ قبل خلق السموات بألفي عام آسمانوں کے پیدا ہونے سے پہلے دو ہزار برس) جو چیز مخلوق اور عدم کے ساتھ مسبوق ہے وہ ممکن و حادث ہے جب حقیقۃ الحقائق جو تمام حقائق سے اسبق واول ہے ۔ مخلوق ممکن ہوئی تو دوسری حقیقتیں بطریق اولی مخلوق ہوں گی اور ان میں حدوث و امکان ہوگا ۔ تعجب ہے کہ شیخ  قدس سرہ حقیقت محمدی بلکہ تمام ممکنات کی حقائق کے لیے جن کو اس نے اعیان ثابتہ (ممکنہ حقائق) کہا ہے وجوب کا حکم کس طرح کرتا ہے اور کیونکر قدیم جانتا ہے اور پیمبر علیہ الصلوة والسلام کے قول کے برخلاف کرتا ہےممکن بمع اپنے تمام اجزاء کےممکن ہے اور اپنی صورت و حقیقت میں ممکن ہے ممکن کی حقیقت کے لیے تعین وجوبی کیسے ہوسکتا ہے ممکن کی حقیقت بھی ممکن ہی ہونی چاہیئے کیونکہ ممکن مخلوق ہے اور حق تعالی اس کا خالق ہے جب واجب اورممکن کے درمیان تمیز نہیں کرتا اور خود فرماتا ہے کہ ان دونوں میں کوئی تمیز نہیں تو اگر واجب کوممکن اور ممکن کو واجب کہ دے تو کیا ڈر ہے اور اگر اس کو معاف و معذور فرمائیں تو کمال کرم و عضو ہے ۔ رَبَّنَا لَا تُؤَاخِذْنَا إِنْ نَسِينَا أَوْ أَخْطَأْنَا يااللہ تو ہمارے بھول چوک پر ہمارا مواخذہ نہ کر)

 سوال: تم نے اپنے رسالوں میں واجب اورممکن کے درمیان اصالت و ظلیت کی نسبت ثابت کی ہے اور ممکن کو واجب کاظل کہا ہے نیز واجب تعالی کو اصالت کے طور پرممکن کی حقیقت کہ اس کا ظل ہے لکھا ہے اور بہت سے معارف اس پر مترتب کیے ہیں اگر اس اعتبار سے شخ قدس سره بھی واجب تعالی کو ممکن کی حقیقت کہہ ہے تو کیا ڈر ہے اور کیوں ملامت کا باعث ہے؟

 جواب: اس قسم کے علوم جو واجب اور ممکن کے درمیان کسی قسم کی نسبت کو ثابت کرتے ہیں شرع میں ان کے ثبوت کے لیےکچھ وارد نہیں ہوا سب سکر یہ معارف میں سے ہیں اور حقیقت معاملہ تک نہ پہنچنے کا باعث ہیں۔ 

ممکن چه بود که ظل واجب باشد              نہیں ہوتا ہے ممکن ظل واجب 

اور واجب تعالی کا کیوں ظل ہو کیونکہ ظل سےمثل کے پیدا ہونے کا وہم گزرتا ہے اور اصل میں کمال لطافت کے نہ ہونے کا شک پیدا ہوتا ہے جب حضرت محمد رسول اللہ کا کمال لطافت کے باعث سایہ وظل نہ تھا تو خدائے محمد کا سایہ وظل کس طرح ہو سکے ۔ خارج میں بالذات و بالا ستقلال حضر ت ذات تعالی اور اس کی صفات ثمانیہ حقیقیہ ہی موجود ہیں۔ باقی سب کچھ حق تعالی کی ایجاد سے موجود ہوا ہے اور ممکن ومخلوق وحادث ہے کوئی مخلوق اپنے خالق کا ظل نہیں اور اس نسبت کے سوا کہ جس کی نسبت شرع وارد ہے یعنی مخلوقیت کے سوا اور کوئی نسبت خالق تعالی کے ساتھ نہیں رکھتا۔ عالم کے ظل ہونے کا یہ علم سالک کو راستہ میں بہت کام آتا ہے اور اس کو کھینچ کر اصل کی طرف لے جاتا ہے اور جب کمال عنایت سے ظلال کے منازل کو طے کر کے اصل تک پہنچ جاتا ہے تو اللہ تعالی کے فضل سے معلوم کر لیتا ہے کہ یہ اصل بھی ظل کا حکم رکھتا ہے اور مطلوب ہونے کے لائق نہیں ہے کیونکہ اس پر امکان کا داغ لگا ہے اور مطلوب ادراک کے احاطہ اور وصل و اتصال سے ماوراء ہے

رَبَّنَا آتِنَا مِنْ لَدُنْكَ رَحْمَةً وَهَيِّئْ لَنَا مِنْ أَمْرِنَا رَشَدًا (یا اللہ تو اپنے پاس سے ہم پر رحمت نازل فرما اور ہمارے کام میں بھلائی ہمارے نصیب کر)

فصل

فضائل مآب و کمالات اکتساب مولانا حسن کشمیری دہلوی نے (خدا اس کے احوال کو اچھا کرے اور اس کی امیدوں کو پورا کرے) ایک رسالہ فقیر کو بھیجا تھا جس میں چند سوال درج تھے جن کاحل مطلوب تھا چونکہ ان کا حل بہت سے اسرار کے ظاہر کرنے پرمشتمل تھا۔ اس لیے بعض موانع کے باعث فقیران کے جواب میں جرات نہ کر سکتا تھا اورلیت و لعل میں گزارتا تھا چونکہ فقیر پر مشار الیہ کے بہت حقوق ہیں کیونکہ انہی کے حسن دلالت سے ولایت پناہ طریق اندراج النہایت في البدایت کے حادی(حدی خوان) و ہادی قدس سرہ کی دولت حضور سے مشرف ہوا ہے اور اس طریق میں الف با کاسبق انہی سے لیا ہے اور انہی کی خدمت میں بے اندازہ فیوض و برکات کا استفادہ کیا ہے۔ اس لیے بعض سوالوں کاحل جواس رسالہ کے علوم کے مناسب ہے اس رسالہ کے ذیل میں درج کیا ہے۔ والله سبحانه الهادي إلى سبيل الرشاد (اللہ تعالی ہی سیدھے راستے کی ہدایت دینے والا ہے ) آپ نے پوچھا تھا کہ جب کمالات صوری و معنوی ظاہری و باطنی علمی وعملی اور دینی و اخروی جس قدر کہ نوع بشر میں ممکن ہیں سب حضرت خیرالبشر علیہ الصلوۃ والسلام میں بالفعل حاصل ومتمکن ہیں جیسے کہ حدیث نفیس أنا سَيَّدُ وَلَدِ آدمَ يومَ القيامةِ ولا فَخْرَ آدَمُ فَمَنْ دُونَهُ ‌تَحْتَ ‌لِوَائِي، وَلا فَخْرَ، يَوْمُ الْقِيَامَةِ فعلمت ‌علم ‌الأولين والآخرين اولاد آدم کا سردار ہوں اور کوئی فخر نہیں اور آدم اور ان کے سوا سب قیامت کے دن میرے جھنڈے کے نیچے ہوں گے مجھے تمام اولین و آخرین کا علم دیا گیا ہے ) وغیرہ سے سمجھا جاتا ہے اور جو کچھ کسی  چیز پر مشروط یا کسی وقت پر موقوف ہوگا وہ بھی بہت اچھی وجہ سے جلوہ گر ہو گا تو پھر اس صورت میں آنحضرت ﷺکا حزن وغم جو دوام و کثرت کے ساتھ معروف وموصوف ہے کیوں ہے اور اس کا سبب کیا ہے؟ کیونکہ حزن و اندوہ کسی ایک چیز کے گم ہونے کے باعث ہوتا ہے جس کو وہ چاہتا ہے میرے مخدوم و مکرم حضرت محمد رسول اللہ ﷺ کے جاہ و جلال اور خدا تعالی کی عنایت پر جو آنحضرت ﷺکے حال خیر مال کو شامل ہے نظر کرنے کے اعتبار سے اس حضرت خاتمیت سے حزن و اندوہ کا بعید نظر آنا اور کمال کاگم ہونا مسلم ومستحسن ہے اور جب آنحضرت ﷺکی عبدیت اورعجز و بشریت پرنظر کی جائے اور حق تعالی کی عزت و جلال اور کبریا اور ذاتی استغنا کا ملاحظہ کیا جائے تو آنحضرت ﷺکے حق میں بھی اللہ تعالی کے بے نہایت کمالات میں سے کسی کمال کا گم ہونا اور حزن کا حاصل ہونا کچھ بعید نہیں معلوم ہوتا ہے بلکہ بندگی کے حال کے لائق ہے آیت کریمہ وَلَا ‌يُحِيطُونَ بِهِ عِلْمًا اور آیت کریمہ لَا ‌تُدْرِكُهُ الْأَبْصَارُ دونوں اس بات پر گواہ عادل ہیں اور سب کےحق میں فقدان ثابت کرتی ہیں ہاں سچ ہے ممکن خواہ کتنا ہی بلند در جوں تک پہنچ  جائے پھر بھی واجب کی حقیقت کو نہیں پا سکتا اور حادث قد یم کونہیں گھیر سکتا اور متناہی غیر متناہی کا احاطہ نہیں کر سکتا اور یہ جو آپ نے لکھا ہے کہ جو کمال نوع بشر میں ممکن ہیں حضرت خاتمیت میں با لفعل حاصل ہیں ہاں کل پرفضلی کلی آنحضرت ﷺکے ساتھ ہی مخصوص ہے لیکن بعض کمال ایسے ہوتے ہیں جو جزئی فضیلت کی طرف راجع ہوتے ہیں اور ہوسکتا ہے کہ انبیاء کرام اور ملائکہ عظام میں سے بعض کے ساتھ مخصوص ہوں اور آنحضرت  ﷺکی کلی فضیلت میں کچھ کمی نہ کریں ۔ احادیث صحیحہ میں آیا ہے کہ امتوں کے افراد میں بعض کمالات ایسے ہوتے ہیں جن پر انبیا علیہم الصلوة والسلام رشک کرتے ہیں حالانکہ انبیا علیہم الصلوۃ والسلام کو امتوں کے تمام افراد پرفضل کلی ہے۔ نیز حدیث میں آیا ہے 

کہ شہداء فی سبیل اللہ چند چیزوں سے انبیاء پر زیادتی رکھتے ہیں شہداء کوغسل کی حاجت نہیں اور انبیاء کوغسل دینا چاہیئے ۔ شہداء پر نماز جنازہ نہیں آئی ہے کہ امام شافعی کا مذہب ہے اور انبیاء علیہم السلام پر نماز جنازہ ادا کرنی چاہیئے ۔ قرآن مجید میں آیا ہے کہ شہداء کو مردہ نہ جانو کہ وہ زندہ ہیں اور انبیاء کو مردہ فرمایا ہے یہ سب جزئی فضائل ہیں جو انبیاعلیہم السلام کے فضل کلی میں قصور پیدا نہیں کرتے۔ پس ہوسکتا ہے کہ ان فضائل جزئیہ میں سے بعض کے گم ہونے کے باعث آنحضرت ﷺپر حزن و اندوہ طاری ہوتا کہ ان فضائل کی استعداد کے حاصل ہونے اور وہاں تک پہنچنے کا باعث ہو۔ مثلا نبوت کے ساتھ درجہ شہادت بھی جمع ہو جائے اور اگر ہم مان بھی لیں کہ انسان کے تمام افراد کےتمام کمالات اس حضرت علیہ الصلوة والسلام میں بالفعل حاصل ہیں تو ہم کہتے ہیں کہ چونکہ حضرت ﷺ کی ہمت بلند ہے اس واسطے ان کمالات پر کفایت نہیں کرتے اور هل من مزید کہتے ہوئے بلندی و برتری کا شوق ظاہر فرماتے ہیں اور چونکہ ذوق کے کمالات حصول بشری کے امکان سے خارج ہیں اس لیےدائمی غم و اندوه نقد وقت ہے۔ اس بحث کی تحقیق والله سبحانه أعلم بحقيقة الحال 

حقیقت حال کو اللہ تعالی بہتر جانتا ہے ) یہ ہے کہ طریقت و حقیقت و قربت ومعرفت میں کام کا مدار فناء پر اور صفات بشریت اور احکام امکان کے دور ہوجانے پر ہے بیت 

پچ کس را تا نگردداوفنا نیست ره در بار گاہ کبریا

ترجمہ بیت جب تک انسان نہ ہو جائےفنا تب تک اس کو نہیں ملتا خدا

  جس قدر بھی صفت بشر یت با تی ہے اسی قدر راستہ کا حجاب ہے اور صفات بشریت کا بالکل دور ہو جاناکل میں ممکن نہیں ۔ خواہ خواص ہوں ۔ خواہ اخصص خواص ۔ شیخ عطا فرماتے ہیں۔ بیت

نمے بینی کے شا ہے چوں پیمبر نیابد فقرکل تورنج کم بر

ترجمہ: بیت نہ پایافقرکل جبکہ پیمبر ملا تجھ کو نہیں مگر کچھ نہ غم کر

فقرکل سے مراد صفات بشریت و امکان کا بالکل دور ہو جانا ہے جس کا حاصل ہونا متصور نہیں کیونکہ اس سے قلب حقائق یعنی حقیقتوں کا بدلنا لازم آتا ہے اس لیے کہ ممکن اگر ترقی کرنے گا تو اپنے مکان سے نکل کر واجب ہو جائے گا اور یہ محال عقلی اور شرعی ہے اور یہ جو کسی بزرگ نے کہا ہے کہ بیت 

چو ممکن گردا مکان برفشاند بجز واجب درو چیز ے نماند

ترجمہ: بیت ہواممکن سے جس دم دور امکان تو واجب ہوگیا بالکل وہ انسان 

تشبیہ تمثیل پرمحمول ہے  نہ تحقیق وتقریر پر کہ یہ غیر واقع ہے ایک عزیز فرماتا ہے۔ بیت سیاه روئی نہ ممکن در دو عالم جدا ہر گز نشد واللہ اعلم 

ترجمہ: بیت سیاه روی ممکن کی ہوئی  نہ دور رہادونوں جہانوں میں یہ بے نور

 سوال: امکان کے احکام و آثار کا باقی رہنا مقام قاب قوسین میں ظاہر ہے جہاں امکان کی قوس اور وجوب کی قوس بر پا ہے لیکن مقام او ادنی میں جو بالاصالت آنحضرت ﷺکے ساتھ مخصوص ہے امکان کے احکام کا باقی رہنا کس طرح ہے۔

جواب: جس چیز سے جواب و امکان میں تمیز ہوسکتی ہے وہ عدم ہے جو امکان کے ایک طرف ہے کیونکہ امکان کی دوسری طرف کہ وجود ہے وجوب و امکان کے درمیان قدر مشترک ہے مقام اوادنی میں اس عدم کے احکام زائل ہو جاتے ہیں اور قوسین کی امتیاز دور ہوتی دکھائی دیتی ہے نہ یہ کہ امکان بالکل رفع ہو جاتا ہے اور وجوب میں منقلب ہو جاتا ہے کیونکہ یہ محال ہے جیسے کہ گزر چکا اس قدر ہے کہ مقام قاب قوسین میں ظلمانی حجابوں سے جو عدم کے آثار میں سے ہیں باہر نہیں ہو سکتے اور مقام او ادنی میں جو حجاب ہیں وہ نورانی ہیں اور امکان کی طرف وجود کی راہ سے آئے ہیں اس بزرگ کے بیت کے معنی کو جو اوپر گزر چکا ہے اسی توجیہ پرمحمول کر سکتے ہیں اور گرد امکان کے دور ہونے سے عدم کے احکام کا وجود جو سراسر کدورت ہے دور ہونا مراد لے سکتے ہیں۔ 

سوال: جب امکان کی طرف عدم زائل ہوگئی اور وہ جو وجوب و امکان میں تمیز کا باعث تھا مرتفع ہو گیا اور وجود کے سوا جو امکان کی دوسری طرف ہے اور وجوب و امکان کے درمیان قدر مشترک ہے وہاں کچھ نہ رہا تو لازم آیا کہ امکان اپنی حقیقت سے نکل کر وجوب کے ساتھ جو وجودصرف ہے ملحق ہو گیا اور حقیقت کا بدلنا لازم آیا اور اس بزرگ کے مذکورہ بالا بیت کے معنی کے موافق واجب کے سوا اس میں کچھ نہ رہا اور وہ بیت حقیقت پرمحمول ہوا۔

 جواب: یہ وجود جوممکن کی طرف میں ثابت ہے اس وجود کا ظل ہے جو وجوب میں ہے نہ کہ اس وجود کا عین اور یہ وجوب جوممکن میں طرف عدم کے زائل ہونے سے پیدا ہوا ہے وجوب بالغیر ہے جوممکن کی ایک قسم ہے نہ کہ وجوب بالذات تا کہ قلب حقیقت لازم آئے کیونکہ یہ عدم ذات ممکن کی راہ سے رفع نہیں ہوا تا کہ واجب بالذات ہو اور محال لازم آئے بلکہ ممکن میں اس عدم کا ارتفاع ممکن کی ذات پر حضرت واجب کے وجود اور حضرت وجوب تعالی کے غلبہ کے باعث ہے لیکن اس وجوب سے جو مصرعہ سابق میں واقع ہوا ہے وجوب ذاتی ظاہر ہوتا ہے نہ کہ وجوب بالغیر اور وجود کو وجوب و امکان کے درمیان قدر مشترک کہنا اشتراک لفظی کی قسم سے ہے نہ کہ معنی اشتراک کی قسم سے اگر چہ اس کو کلی مشکک کہتے ہیں کیونکہ ممکن کے وجود کو واجب تعالی کے وجود کے ساتھ درحقیقت کوئی شرکت نہیں تا کہ کلی اور جزئی ہونا متصور ہو۔

 سوال :فنا و بقا جو صوفیاء نے کہا ہے اور اس کو ولایت سے تعبیر کیا ہے۔ اس کے کیا معنی ہیں جب صفات بشریت کا دور ہو جانا متصور نہیں تو پھر فنا کی کیا گنجائش ہے۔

 جواب: وہ فنا جو ولایت میں معتبر ہے وہ شعور شہود(مشاہدہ)  کے اعتبار سے ہے جو ماسوائے حق کے نسیان سے مراد ہے نہ کہ ماسوی کے ارتفاع سے حاصل کلام یہ کہ اس فنا کا صاحب سکر(مستی)  کےغلبوں میں اشیاء کے عدم شعور کو عدم اشیاء خیال کرتا ہے اور اس کو ماسوی کارفع ہوناسمجھتا ہے اور اس سے تسلی پاتا ہے اور اگر محض فضل سے اس کو ترقی دے کر صحو کی دولت سے مشرف فرمائیں اور صاحب تمیز کریں تو جان لیتا ہے کہ وہ فناء اشیاء کا نسیان تھانہ اشیاء کا معدوم ہونا اور اس نسیان سے اگر زائل ہوئی ہے تو اشیاء کی گرفتاری ہی زائل ہوگئی ہے جو ثابت و برقرار اور مذموم تھی۔ نہ کہ نفس اشیاء کیونکہ اشیاء اپنی اسی صرافت پر قائم اور موجود ہیں اور اس کی نفی اور معدوم کرنے سے منتفی نہیں ہوسکتیں۔ 

  سیاسی از حبشی کے رود که خودرنگ است ترجمہ : سیاہی دورحبشی سے نہیں ہوتی کہ ہے اصلی 

اور جب فضل سےیہ دید اوریہ تمیز عطا ہوئی تو تسلی دور ہوگئی اور اس کی جگہ حزن و اندوه و بے آرامی آگئی اور جان لیا کہ اس کی بود او(اس کا ہونا) ایک ایسا مریض ہے جو اس کی کوشش و اہتمام سے نابود نہیں ہوتا اور معلوم کیا کہ مور کے دونوں پاؤں کی طرح کہ ہمیشہ کے لیے اس کے جانکاه ہیں ۔ امکان کانقص اور حدوث کا قصور ہمیشہ کیلئے اس کے جانکاہ ہیں میں عجب معاملہ ہے کہ عارف جوں جوں زیادہ بلند ہوتا جاتا ہے اور زیادہ زیادہ تر قیات وعروجات(عروج سے مراد سالک کا حق تعالی کی ذات و صفات عالیہ کے مشاہدہ میں مستغرق ہو جانا اور مخلوق سے منقطع ہونا ہے) کرتا جاتا ہے۔ توں توں دید نقص اس میں اسی قدر زیادہ ہوتی جاتی ہے اورقصور زیادہ تر اس کی نظر میں آتا جاتا ہے اور بے آرام ہوتا جاتا ہے اور اس کا حال اس رسن تاب یعنی رسی بٹنے والے شاگرد کی طرح ہو جاتا ہے جس نے اپنے استاد کو کہا کہ میں جس قدر زیادہ کام کرتا ہوں اس قدر زیادہ دور ہوتا جاتا ہوں ۔ شاید اسی واسطے آنحضرت ﷺنے فرمایا ہے کہ ياليت رب محمد لم يخلق محمدا ( کاش محمدکا رب محمد کو پیدا نہ کرتا ) نیز فرمایا ہے۔ مَا ‌أُوذِيَ ‌نَبِيٌّ مِثْلَ مَا أُوذِيتَ (جیسی مجھے ایذاپہنچتی ہےویسی کسی نبی کو نہیں پہنچی) شاید اس ایذا سے مراد نقص وقصور کا دیکھنا ہے جو کمال حزن و اندوہ کا موجب ہے کیونکہ اور دوسری ایذائیں دوسرے پیغمبروں کو زیادہ 

تر پہنچی ہیں ۔ حضرت نوح علی نبینا علیہ الصلوة والسلام نو سو پچاس سال تک اپنی قوم میں رہ کر دعوت کرتے رہے اور طرح طرح کی ایذائیں برداشت کرتے رہے ۔ لکھا ہے کہ ان کی قوم کے لوگ دعوت کے وقت اس قدر پتھر ان کو مارتے تھے کہ بے ہوش کر گر پڑتے تھے اور پتھروں کے نیچے دب جاتے تھے جب ہوش میں آتے تو پھر دعوت کرنے لگ جاتے اور قوم کے لوگ وہی معاملہ ان کے ساتھ کرتے إلى أن ‌يَبْلُغَ ‌الْكِتَابُ أَجَلَهُ (یہاں تک کہ لکھا ہوا اپنے وقت تک پہنچ گیا جاننا چاہیئے کہ یہ نقص وقصور کا دیکھنا دوری کے سبب سے نہیں بلکہ قرب وحضوری 

کے باعث ہے کیونکہ صاف اور شفاف جگہ میں تھوڑی سی کدورت بھی بہت نظر آتی ہے اور سیاه و مکدر جگہ میں بہت سی کدورت بھی تھوڑی دکھائی دیتی ہے اور یہ جو پہلے کہا گیا ہے کہ قرب و معرفت کے کام کا مدارفنا پر ہے اس لیے ہے کہ سالک جب تک اپنے آپ سے فانی نہ ہو جائے اور بشریت و امکان کی صفات سے بالکل خالی نہ ہو جائے مطلوب تک نہیں پہنچتا کیونکہ مطلوب کے ساتھ اس کا جمع ہونا دونقیضوں کے جمع ہونے کی قسم سے ہے اس لیے کہ امکان میں عدم کا ثبوت ضروری ہے اور وجوب میں عدم کا سلب ضروری ہے اور جب تک مطلوب تک نہ پہنچے مطلوب کے کمالات سے کیا پاسکتا ہے اور اس کے کمالات کو اپنے کمالات کی مانند جاننے کے سوا کیا سمجھ سکتا ہے۔ لا يدرك الشيء إلا بما يضادہ ویغائره (ہر شے اپنی ضد اور غیر سے معلوم ہوتی ہے) معقول والوں کا مقررہ قضیہ ہےوہ لڑ کا جوابھی لذت جماع تک نہیں پہنچا ہے اگر جماع کی لذت کا کمال بیا ن کرے تو اس کو شیرین بیان کرے گا نہ کڑ وا اور اس کی شیرینی کو بھی  مصری  و قند کی شیرینی کی طرح جانے گا کیونکہ اس کو اس کے سوا اور کچھ معلوم ہی نہیں اور یہ کمال اس کا کمال نہیں بلکہ ایسا کمال ہے جو اس لڑکے کا اپنا بنایا ہوا اور اختراع کیا ہوا ہے جو درحقیقت اس کی طرف راجع ہے نہ کہ اس کے ساتھ متصف ہے۔ پس سالک مطلوب کے جتلانے کے بغیر جو کچھ اپنی طرف سے مطلوب کی نسبت کہے گا وہ گویا اپنی نسبت ہی کہا ہوگا اور جو کچھ اس کی تعریف کرے گا اپنی ہی تعریف کی ہوگی اس جگہ ایک عارف فرماتا ہے کہ ہو سکتا ہے کہ آیت کریمہ وَإِنْ مِنْ شَيْءٍ إِلَّا يُسَبِّحُ ‌بِحَمْدِهِ کوئی چیز نہیں جو اس کی تسبیح اور حمد نہ بیان کرتی ہو)میں حمد کی ضمیرشے کی طرف راجع ہو یعنی کوئی چیزتسبیح و تقدیس وستائش نہیں کرتی مگر اپنی شاید حضرت بسطامی قدس سرہ نے اسی واسطے سبحانی کہا ہوتا کہ تسبیح کا اعادہ اس کی اپنی طرف ہو کیا اچھا کہنا ہے ۔ ابیات 

اے شدہ ہم در جمال خویشتن می پرستی ہم خیال خویشتن

قسم خلقان زانجمال و زاں کمال ہست گر برہم نہی مشت خیال

 گرز معشوقت خیالے در سراست نیست معشوق آں خیال دیگر است 

ترجمہ ابیات اے کہ تو ہے سر بسرمحوجمال ہے فقط تیرا ہی اپنا یہ خیال یار کا اصلی ہے جو حسن و کمال پاسکے مخلوق ہے یونہی خیال

 گرتیرے سر میں ہے دلبر کا خیال وہ نہیں معشوق ہے تیرا خیال 

صاحب فصوص فرماتا ہے۔ والتجلی من الذات لا يكون إلا بصورة المتجلى له لأنه ما رای سوی صورته في مر ۃ الحق و مارئ الحق ولا يمكن أن یراه (تجلی ذات متجلی لہ کی صورت پر ہوتی ہے کیونکہ وہ ان کے آئینے میں اپنی ہی صورت کو دیکھتا ہے نہ کہ حق کو اور نہ ہی اس کو دیکھ سکتا ہے )رویت کے عدم امکان کو مبالغہ کے رو سے کہا ہے نہ تحقیق کی روسے کیونکہ رویت دنیا میں جائز ہے اور آخرت میں واقع ہے چونکہ سالک کا کلی طور پر فانی ہوناممتنع اور محال ہے اور اس کے بغیر مطلوب کا وصول و اتصال ممنوع ہے اور معرفت بغیر وصول کے ناممکن ہے اس لیے معرفت سےعجز لازم آیا اور معرفت سے عاجز ہونا عین معرفت ہوا۔ کوئی یہ نہ کہے کہ معرفت سے عاجز ہونا جو معرفت کی نقیض ہے معرفت کس طرح ہے کیونکہ معرفت سے عاجز ہونا معرفت ہی ہے۔ بأنه لا يعرف (اس طرح پر کہ وہ پہچانا نہیں جاتا ) حضرت صدیق اکبر رضی اللہ عنہ نے فرمایا ہے ۔ الْعَجْزُ عَنْ ‌دَرْكِ ‌الْإِدْرَاكِ إِدْرَاكٌ کے پانے سے عاجز ہونا ادراک ہے) الْحَمد لله الَّذِي لم يَجْعَل لِلْخلقِ سَبِيلا إِلَى مَعْرفَته إِلَّا ‌بِالْعَجزِ ‌عَن ‌مَعْرفَته ( پاک ہے وہ ذات جس نے معرفت سے عاجزی کے سوا کوئی راستہ خلق کو اپنی طرف نہیں بتایا ) ایک بزرگ فرماتا ہے۔ بیت 

سبحان خالقے کہ صفاتش زکبریا بر خاک عجزمے فگند عقل انبیاء 

وہ پاک ذات اکبر جس کی صفات اکبر پیغمبروں کی عقلیں عاجز ہیں جن سے یکسر 

جب انبیاء علیہم الصلوة والسلام صفات کبریا کی معرفت میں عاجز ہیں اور ملائکہ کرام علی نینا وعلیہم الصلوة والسلام سُبْحَانَكَ ‌مَا ‌عَرَفْنَاكَ حَقَّ مَعْرِفَتِكَ  پاک ہے تو ہم نے تجھے نہیں پہچانا جیسے کہ حق ہے)کہیں اور حضرت صدیق اکبر جو اس امت خَيْرُ ‌الْأُمَمِ کے رئیس و سردار ہیں ۔ عاجزی کا اقرار کریں تو پھر اور کون ہے جو معرفت کا دم مارے۔ سوائے اس کے کہ اپنے جہل مرکب کو معرفت خیال کرے اور غیرحق  کوحق پہنچانے یہ معرفت سے عاجز ہونا مراتب عروج کے نہایات کی نہایت اور مدارج قرب کا منتہا ہے جب تک سالک اخیر نقطہ تک نہ پہنچے اور تجلیات وظہورات کے مراتب کو طے نہ کرے او راس وصل و اتصال کو جس پر مدتوں تک خوش تھا عین فصل و انفصال خیال نہ کرے اس عجز کی دولت سے مشرف نہیں ہوتا اور خدا تعالی کی ناشناسی سے خلاص نہیں ہوتا اورحق اور غیرحق میں تمیز نہیں کر سکتا۔

 سوال: پھر خدا کی معرفت کا وجوب کس معنی سے ہے؟ 

 جواب: معرفت کا وجوب اس معنی سے ہے کہ ذات و صفات کی معرفت میں جو کچھ شریعت نے فرمایا ہے اس کا پہچاننا واجب ہے اور جو معرفت شریعت کے بغیر حاصل ہوتی ہے اس کو خدا کی معرفت کہنا دلیری ہے اور ظن وتخمین سے حق پرحکم کرنا ہے۔ ‌أَتَقُولُونَ عَلَى اللَّهِ مَا لَا تَعْلَمُونَ ( کیا تم اللہ تعالی پر وہ کہتے ہو جو نہیں جانتے ) امت کے چراغ روشن اور اماموں کے امام حضرت امام اعظم کو فی رضی اللہ عنہ نے شاید اسی واسطے فرمایا ہے۔ سُبْحَانَك ‌مَا ‌عَبَدْنَاك حَقَّ عِبَادَتِك، وَلَكِنْ ‌عَرَفْنَاك حَقَّ مَعْرِفَتِك ( پاک ہے تو ہم سے تیری عبادت کا حق ادا نہیں ہوا لیکن تجھے پہچان لیا جو تیرے پہچاننے کا حق تھا ) اگر چہ یہ قول اکثر لوگوں کو گراں معلوم ہوتا ہے لیکن بہتر توجیہ کے قابل ہے کیونکہ حق تعالی کی معرفت یہ ہے کہ حق تعالی کو ان تمام چیزوں کے ساتھ کہ جن کو شریعت نے بیان کیا ہے یعنی کمالات و تنزیبات و تقدیسات کے ساتھ پہنچانا جائے کیونکہ ان کے سوا معرفت کی کوئی ایسی چیز نہیں جو حق معرفت کی مانع ہو۔

سوال: اس معرفت میں عوام وخواص شریک ہیں بلکہ مساوات رکھتے ہیں اور لازم آتا ہے کہ عام مومنوں کی معرفت خواص انبیا کی معرفت کی مانند ہو کیونکہ یہ حق معرفت سب کو حاصل ہے یہ مسئلہ بھی اسی مسئلہ کی طرح ہے جو امام اعظم رضی اللہ عنہ نے فرمایا ہے۔ الْإِيمَانَ ‌لَا ‌يَزِيدُ ‌وَلَا ‌يَنْقُصُ ایمان نہ کم ہوتا ہے نہ زیادہ ) اس عبارت سے بھی لازم آتا ہے کہ عام مومنوں کا ایمان انبیا علیہم الصلوۃ والسلام کے ایمان کی طرح ہوگا۔ 

جواب : اس شبہ قویہ کا حل ایک دقیقه پرمبنی ہے جس پراس فقیر نے محض فضل و کرم سے ہد ایت پائی ہے وہ دقیقہ یہ ہے کہ معرفت کا حق یہ ہے کہ ان معارف شرعیہ سے عارف کی معرفت سے عجز لاحق ہو ۔ مثلا شریعت میں آیا ہے کہ حق تعالی کیلئے علم کی صفت ثابت ہے اوروہ علم بھی ذات واجب تعالی کی طرح بیچون وبیچگون ہے اور ہمارے ادراک کے احاطہ سے باہر ہے اگر اس علم کو سالک اپنے علم کے قیاس پر پہچانے تو یہ اس کی پہچان نہیں بلکہ اپنےمجعول ومخترع ( بنایا ہوا اورگھڑا ہوا) کی پہچان ہے نہ کہ حق تعالی کے علم کی معرفت جوحق تعالی کے کمال کی صفت ہے۔ پس اس صورت میں جب نفس معرفت حاصل نہیں تو حق معرفت کب حاصل ہوگا اور اگر اس کا معاملہ قیاس وتخمین سے عاجز ی میں آجائے اور وجدان و حال سے معلوم کرے کہ اس کونہیں پہچان سکتا اور جان لے کہ اس صفت کمال کے ثبوت پر ایمان لانے کے سوا کچھ حاصل نہیں تو اس وقت معرفت بھی حاصل ہوگی اور حق معرفت بھی پس جب عوام کو حق معرفت میں خواص کے ساتھ شرکت نہ ہوئی تو پھر مساوات کی کیا گنجائش ہے۔

 سوال: جب حق معرفت نفس معرفت ہے تو پھر چاہیئے کہ عوام کونفس معرفت بھی حاصل نہ ہو جب حق معرفت حاصل نہیں۔

 جواب: معرفت کی ایک صورت ہے اور ایک حقیقت وہ معرفت جو عین حق معرفت ہے معرفت کی حقیقت ہے جو معرفت سے عجز پر وابستہ ہے اور اس کی صورت یہ ہے کہ اس عجز کی حد تک نہ پہنچے اور صفات امکان کے قیاس کی آمیزش سے خالی نہ ہو جیسے کہ گزر چکا۔ یہ اللہ تعالی کا کمال فضل ہے کہ معرفت کی صورت کا بھی نفس ایمان میں اعتبار کیا ہے اور نجات کو اس پر وابستہ کیا ہے جیسے کہ ایمان کی صورت کو بھی معتبر رکھا ہے اور جنت میں داخل ہونا اس پر مرتب کیا ہے۔ صورت ایمان میں صورت معرفت کافی ہے اور حقیقت ایمان میں حقیقت معرفت سے چارہ نہیں۔ اس تحقیق سے معلوم ہوا کہ ایمان کے بھی دو فرد ہیں صورت وحقیقت جو عوام کا حصہ ہے وہ صورت ہے اور جو خواص کو عطا ہوا ہے وہ حقیقت ہے پس عوام کا ایمان انبیاء کے ایمان کی طرح نہ ہوا جواخص خواص ہیں کیونکہ وہ ایمان اور ہے اور یہ ایمان اور دونوں میں کوئی مماثلت و مشابہت نہیں اور حقیقت ایمان میں چونکہ معرفت کا عجزحاصل ہے اور بانه لا یعرفوہ نہیں پہچانا جاتا ) کی معرفت موجود ہے اس لیے اس میں کمی و زیادتی مفقود ہے کیونکہ سلب معرفت کی معرفت میں درجات کے تفاوت کا احتمال نہیں وہ ثبوت ہے جس میں درجات کا تفاوت ہے پس ثابت ہوا کہ حقیقت ایمان میں کمی بیشی نہیں ہوتی  وَاللَّهُ سُبحَانَه أَعْلَمُ ‌بِحَقِيقَةِ ‌الْحَالِ (اللہ تعالی ہی حقیقت حال کو جانتا ہے)۔

 سوال: اس تقریر سے لازم آتا ہے کہ صوفیاء کے علوم و معارف کشفی اعتبار سے ساقط ہیں اور حق تعالی کی معرفت ان پروابستہ نہیں کیونکہ حق معرفت علوم شرعیہ سے حاصل ہوا اور کوئی معرفت نہ رہی جس کو صوفياء تلاش سے حاصل کریں ۔ پس حق تعالی کی معرفت میں صوفیاء کے لیے علماء پرکوئی زیادتی ثابت نہ ہوئی۔

 جواب: صوفیاء کے کشفی علوم و معارف اس عجز کے اسباب ومعدات ہیں جو صوفياء میں سے منتہیوں کو نہایت النہایت میں میسر ہوتا ہے کہ بزرگواران کشفیہ معارف کےزینوں کے ذریعے اس عجز کی دولت سے مشرف ہوتے ہیں۔ پس ان بزرگواروں کے معارف معتبر ہوں گے کیونکہ معرفت کے حاصل  ہونے کا وسیلہ اور ایمان حقیقی تک پہنچنے کا ذریعہ ہیں۔

 سوال: جب معرفت سے عجز ثابت ہوا اور کمال عجز میں منحصر ہوا تو پھر صوفیاء نے جو مراتب سہ گانہ اعتبار کیے ہیں ان کا کیا مطلب ہے اورعلم الیقین اور عین الیقین اور حق الیقین سے کیا مراد ہوگی۔

 جواب : اس مسئلہ میں فقیر قوم(صوفیہ) کے ساتھ اختلاف رکھتا ہے ان بزرگواروں نے ان تینوں مرتبوں کو حق تعالی کی ذات کی نسبت اعتبار کیا ہے اور علم الیقین اور عین الیقین اور حق الیقین کو اس بارگاہ جل شانہ میں ثابت کیا ہے اور اس کی مثال اس طرح بیان کی ہے کہ آگ کے اس علم کو جو دھوئیں کے استدلال سے حاصل ہوتا ہے ۔ علم الیقین کہا ہے اور آگ کے دیکھنے کو عین  الیقین تصور کیا ہے اور آگ کے ساتھ متحقق ہونا حق الیقین لیکن اس فقیر نے ان تینوں مرتبوں کو ان آیات ونشانات میں جوحق تعالی کی ذات پر دلالت کرنے والے ہیں اعتبار کیا ہے اور علم و عین وحق دلالت کرنے والے نشانات میں کہا ہے نہ مدلول میں کیونکہ وہ علم وعین وحق دھوئیں کی نسبت جانا ہے نہ آگ کی نسبت کیونکہ دھوئیں کا علم جو استدلال سے حاصل ہوا ہے وہ دھوئیں کا ہی علم الیقین ہے جوآگ کومستلزم ہے اور اگر دھوئیں کو دیکھا ہے اور اس سے آگ کے ہونے پر استدلال کیا ہے تو یہ بھی دھوئیں کا عین الیقین ہے اور اگر دھوئیں کے ساتھ متحقق ہوا ہے اور اس سے آگ پراستدلال کیا ہے تو یہ بھی دھوئیں کا حق الیقین ہے۔ یہ استدلال پہلے سے زیادہ کامل ہے کیونکہ وہ استدلال آفاق سے ہے اور یہ انفس سے کہ دھوئیں کے ساتھ متحقق ہوا ہے نیز عین الیقین میں دھواں واسطہ ہے اور حق الیقین میں واسطہ نہیں بلکہ وہی نسبت جو دھوئیں کو آگ کے ساتھ ہے اس کو بھی وہی نسبت حاصل ہو جاتی ہے اور قرب کے اعلی درجات تک پہنچا دیتی ہے جو علم و عین وحق کے ماوراء ہیں کوئی یہ نہ کہے کہ جب واسطہ مرتفع ہوگیا تو رویت ثابت ہوگئی جو عین الیقین ہے کیونکہ میں کہتا ہوں کہ رویت کےمتحقق ہونے میں صرف واسطہ کا دور ہو جانا کفایت نہیں کرتا اور بھی بہت سی چیزیں ہیں جن کا وجود مفقود ہے جب یقین کے تمام مراتب آیات و نشانات کی طرف راجع ہوئے اور کوئی معرفت نہ رہی جو مدلول کی طرف راجع ہوتو بے شک مدلول کی معرفت سے عجز لازم آیا اور سلب معرفت کے سوا وہاں کوئی  معرفت متحقق و ثابت نہ ہوئی اور اگر یقین کے ان تینوں مراتب کو آیات و دلائل کی طرف راجع نہ کیا جائے اور مدلول کی طرف راجع ہوں تو اس معرفت سے کس طرح عجز متصور ہوگا اور سلب معرفت کے کیا معنی ہوں گے۔ 

مکتوبات حضرت مجدد الف ثانی دفتر سوم صفحہ378ناشر ادارہ مجددیہ کراچی

اَلْحَمْدُ لِلّٰهِ وَسَلَامٌ عَلٰی عِبَادِہِ الَّذِیْنَ اصْطَفٰی ( اللہ تعالی کیلئے حمد ہے اور اس کے برگزیدہ بندوں پر سلام ہو آپ کا صحیفہ گرامی جو شفقت و مہربانی سے اس فقیر کے نام لکھا تھا۔ اس کے مطالعہ سے مشرف ہوا۔ اس میں لکھا تھا کہ ایک عزیز(غالبا شیخ عبد الحق) نے اس مکتوب (نمبر 87 دفتر سوم)کی عبارت پر جو اجمیر میں لکھا گیا تھا بہت اعتراض کئے ہیں ۔ ان کا حل لکھنا چاہیے اور چونکہ بعض یاروں نے اشتباه کی جگہوں کو مقرر کر کے لکھا تھا اس لئے اس کے اندازہ کے موافق اس اشتباه کے عمل میں چند مقدے لکھے جاتے ہیں۔ ۔ وَاللهُ سُبْحَانَهٗ الْهَادِيْ إِلىٰ سَبِيْلِ الرَّشَادِ ( اللہ تعالی ہی سیدھے راستے کی طرف ہدایت دینے والا ہے) میرےمخدوم و مکرم سیر مرادی اور سیر مریدی ایک ایسا امر ہے جو اس سیروالے کے وجدان سے تعلق رکھتا ہے اور کسی ایسے امر کا الزام نہیں جو غیر سے تعلق رکھتا ہو۔ پس اس کے اثبات پر حجت و برہان طلب کرنا گنجائش نہیں رکھتا۔ اس کے علاوہ جس شخص کو خدا تعالی نے قوت حدسیہ (سرعت فہم) دی ہے وہ اگر اس سیر والے شخص کے احوال و اوضاع میں اچھی طرح ملاحظہ کرے اور حق تعالی کے فیوض و برکات اور علوم و معارف جن کے ساتھ وہ ممتاز ہے۔ مشاہدہ کرے تو ہوسکتا ہے کہ اس کی سیر مرادی کا حکم کرے اور کسی دلیل کا محتاج نہ ہو جس طرح اس قرب و بعد و مقابلہ و اجتماع کے ملاحظہ کے بعد جو چاند کو سورج کے ساتھ ہےحکم کرے کہ چاند کا نور سورج کے نور سے حاصل ہوا ہے اگر چہ یہ امر ارباب حدس کے سوا کسی دوسرے پر حجت نہیں۔ نیز ہمارے خواجہ(باقی باللہ ) قدس سرہ نے ابتداء حال میں اس فقیر کے سیر کوسیر مرادی فر مایا۔ یاروں نے بھی شاید اس بات کو ان سے سنا ہوگا اور مثنوی کے ان ابیات کو فقیر کے حال کے مطابق جان کر پڑھا کرتے تھے۔ ابيات 

عشق معشوقان نهان است وستیر عشق عاشق باد و صد طبل و نفير

 لیک عشق عاشقان تن زه کند عشق معشوقاں خوش و فربه کند

ترجمہ: ابیات عشق معشوقاں ہے پردہ میں چھپا عشق عاشق دھوم دیتا ہےمچا عاشقوں کا عشق تن لاغر کرے . عشق معشوقاں بدن خوشتر کرے 

اور مرادوں میں سے جو کوئی واصل ہوا ہے ۔ اجتباء ( برگزید ہونا)کے راستہ ہی سے گیا ہے۔ اجتباء کا راستہ انبیا علیہم الصلوة والسلام کے ساتھ مخصوص ہے۔ صاحب عوارف قدس سره  نے مجذوب سالک اور سالک مجذوب کے بیان میں اس امر کی تصریح فرمائی ہے اور مریدوں کے راستے کو انابت کا راستہ اور مرادوں کے راستہ کو اجتباء کا راستہ کہا ہے اللَّهُ ‌يَجْتَبِي إِلَيْهِ مَنْ يَشَاءُ وَيَهْدِي إِلَيْهِ مَنْ يُنِيبُ (اللہ تعالی برگزیدہ کرتا ہے جس کو چاہتا ہے اور جو شخص اس کی طرف رجوع کرے اس کو اپنی طرف ہدایت دیتا ہے) ہاں اجتباء(برگزیدہ ہونا) کا راستہ بالاصالت انبیا علیہم الصلوة والسلام کے ساتھ مخصوص ہے اور امتوں کو دوسرے کمالات کی طرح اس سے بھی ان کی تبعیت کے باعث حصہ حاصل ہے۔ یہ نہیں کہ اجتباء کا راستہ مطلق طور پر انبیاءعلیہم الصلوة والسلام ہی کے ساتھ مخصوص ہے اور امتوں کو اس سے ہرگز حصہ حاصل نہیں کیونکہ یہ غیر واقع ہے۔ میرے مخدوم سالک کو فیوض کا پہنچنا حضرت خیر البشر علیہ الصلوة والسلام کے توسط اور حیلولت سے اس وقت تک ہے۔ جب تک اس سالک محمدی المشرب کی حقیقت حقیقت محمدی سے منطبق نہیں ہوئی اور اس کے ساتھ متحد نہیں ہوئی۔ جب کمال متابعت بلکہ محض فضل سے مقامات عروج (عروج سے مراد سالک کا حق تعالی کی ذات و صفات عالیہ کے مشاہدہ میں مستغرق ہو جانا اور مخلوق سے منقطع ہونا ہے)  میں اس حقیقت کو اس حقیقت کے ساتھ اتحاد حاصل ہوا تو توسط دور ہوگیا کیونکہ توسط وحيلولت مغائرت میں ہے اور اتحاد میں توسط و متوسط و حاجب و محجوب کوئی نہیں۔ جہاں اتحاد ہے وہاں معاملہ شرکت کے ساتھ ہے۔ لیکن چونکہ سالک تابع اور الحاقی اور طفیلی ہے۔ اس لئے یہ شرکت ایسی ہے جیسے خادم کو اپنے مخدوم کے ساتھ ہوتی ہے اور یہ جو ہم نے کہا ہے کہ سالک کی حقیقت کو حضرت علیہ الصلوۃ والسلام کی حقیقت کے ساتھ انطباق و اتحاد پیدا ہو جاتا ہے۔ اس کا بیان یہ ہے کہ حقیقت محمدی تمام حقائق کی جامع ہے۔ اس کوحقیقت الحقائق کہتے ہیں اور دوسروں کے حقائق اس کے اجزاء کی طرح ہیں یا جزئیات کی طرح۔ کیونکہ اگر محمدی المشرب ہے۔ تو سالک کی حقیقت اس کلی کے لئے جزئی کی طرح ہے اور اس پر محمول ہے اورمحمدی المشرب کے سوا کسی غیر کی حقیقت اس کل کے لئے جزو کی طرح ہے اور اس پر غیر محمول ہے۔ غیرمحمدی المشرب کی اس حقیقت کو اگر عروج  میں اتحاد پیدا ہوتو اس پیغمبر کی حقیقت کے ساتھ ہوگا۔ جس کے قدم پروہ ہے اوراسی حقیقت پر محمول ہوگی اور اس کے کمالات میں شرکت پیدا کر یگی۔ لیکن یہ شرکت خادم مخدوم کی شرکت کی قسم سے ہوگی جیسے کہ گزر چکا اور جب اس جزئی کو کمال متابعت کے علاقہ سے بلکہ محض فضل سے اپنی کلی کے ساتھ محبت خاص پیدا ہو جاتی ہے اور وہاں تک پہنچنے کا شوق اس کو دامنگیر ہو جاتا ہے تو وہ قید جوکلی کو جزئی میں  لائی تھی ۔ خداوند تعالی کے فضل سے دور ہونے لگتی ہے اور آہستہ آہستہ زوال کے بعد اس جزئی کو اس کلی کے ساتھ انطباق والحاق حاصل ہو جاتا ہے اور یہ جو ہم نے کہا ہے کہ محبت خاص پیدا ہو جاتی ہے۔ جس طرح کہ محض فضل سے اس فقیر کو پیدا ہوئی تھی اور اس محبت کے غلبہ میں کہا کرتا تھا کہ میری محبت حق تعالی کے ساتھ اس لئے ہے کہ حق تعالی حضرت محمد رسول اللہ ﷺکا رب ہے اور میاں شیخ تاج اور دوسرے یار اس بات پر تعجب کرتے تھے میرے خیال میں شاید آپ کو بھی یہ بات یاد ہوگی ۔ غرض جب تک اس قسم کی محبت پیدا نہ ہو۔ الحاق و اتحادمتصورنہیں ہوتا۔  ذَلِكَ فَضْلُ اللَّهِ يُؤْتِيهِ مَنْ يَشَاءُ وَاللَّهُ ذُو الْفَضْلِ الْعَظِيمِ ( یہ الله تعالی کا فضل ہے جس کو چاہتا ہے دیتا ہے اور الله تعالی بڑے فضل والا ہے۔)

اب تو سط و عدم توسط کی حقیقت کو بیان کرتا ہوں ۔ غور سے سنیں ۔ طریق جذبہ میں چونکہ مطلوب کی طرف سے کشش ہے اور الله تعالی کی عنایت طالب کے حال کی متکفل ہے۔ اس لئے واسطہ اور وسیلہ کوقبول نہیں کرتا اور طریق سلوک میں چونکہ طالب کی انابت و رجوع ہے اس لئے اس میں وسیلہ اور واسطہ کا ہونا ضروری ہے۔ نفس جذبہ میں اگرچہ وسیلے درکار ہیں لیکن جذبہ کا تمام ہونا سلوک پر وابستہ ہے کیونکہ جب تک سلوک جو شریعت کے بجالانے یعنی توبہ و زہد وغیرہ سے مراد ہے۔ جذبہ کے ساتھ نہ ملے تب تک جذبہ نا تمام وا بتر رہتا ہے۔ ہم نے بہت سے ہنوداورملحدوں کو دیکھا ہے کہ جذبہ رکھتے ہیں لیکن چونکہ صاحب شریعت علیہ الصلوۃ والسلام کی متابعت سے آراستہ نہیں ہیں۔ اس لئے خراب و ابتر ہیں اور جذب کی صورت کے سوا کچھ نصیب نہیں۔

 سوال: جذب کا حاصل ہونا ایک قسم کی محبوبیت چاہتا ہے پس کفار کے لئے جو اللہ تعالی کے دشمن ہیں جذبہ کا نصیب کس طرح تصور کیا جاتا ہے۔ جواب: ہوسکتا ہے کہ بعض کفار ایک قسم کی محبوبیت رکھتے ہوں جو ان کے جذب کے حاصل ہونے کا باعث ہوئی ہو۔ لیکن چونکہ ان کو صاحب شریعت علیہ الصلوة والسلام کی متابعت سے آراستہ نہیں کیا۔ خوار اور زیاں کار رہے ہیں اور اس جزو میں حجت کے سوا اور کچھ ان پر درست نہیں کیا کیونکہ ان کی استعداد کو جتلا دیا ہے جس کو وہ جہل و عداوت کے باعث قوت سے فعل یعنی پوشیدگی سے ظہور میں نہیں لائے وَمَا ‌ظَلَمَهُمُ اللَّهُ وَلَكِنْ أَنْفُسَهُمْ يَظْلِمُونَ الله تعالی نے ان پر ظلم نہیں کیا۔ بلکہ وہ تو اپنی جانوں پر ظلم کرتے تھے ) طریق جذبہ  میں اگر صاحب شریعت علیہ الصلوة والسلام کی متابعت کے وسیلہ سے جو کہ سلوک سے مراد ہے مطلوب تک پہنچنا میسر ہو جائے تو کسی امر کے واسطے اور حیلولہ کے بغیر ہوگا ۔ بزرگوں نے فرمایا ہے۔ ولو دلیتم بدلو لوقعتم علی الله یعنی اگر تم حق تعالی کی طرف کھینچے جاؤ اور باطنوں کے باطن کی طرف پہنچائے جاؤ تو تمہارے اور حق تعالی کے درمیان کسی امر کا حیلولہ اور حجاب نہ ہوگا شاید آپ کو بھی یاد ہوگا کہ ہمارے حضرت خواجہ قدس سرہ فرمایا کرتے تھے کہ اگر اس معیت کے راستے سے جوحق تعالی کو بندہ کے ساتھ ہے وصول میسر ہو جائے تو کسی امر کے وسیلہ کے بغیر ہوگا کہ معیت کے مناسب ہے کیونکہ واسط تربیت کے سلسلہ میں ضروری ہے جو سلوک سے مراد ہے اور راہ معیت جذبہ کے راستوں میں سے ایک راستہ ہے اور حدیث الْمَرْءُ ‌مَعَ ‌مَنْ ‌أَحَبَّ ( آدمی  اسی کے ساتھ ہوگا جس کے ساتھ اس کو محبت ہے) بھی اسی مضمون کی تائید کرتی ہے کیونکہ انسان کو جب اپنے محبوب کے ساتھ معیت ثابت ہو جاتی ہے تو واسطہ درمیان سے اٹھ جاتا ہےذرا غور سے سنیں کہ ہر ایک ظل کو اپنے اصل کی طرف ایک شاہراہ ہے اور کوئی چیز ان کے درمیان حائل نہیں۔ اگر اللہ تعالی کی عنایت سے ظل کو اپنے اصل کی خواہش پیدا ہو جائے اور اس کی طرف کشش ظاہر ہو جائے تو صاحب شریعت علیہ الصلوة والسلام کی متابعت کی بدولت اس ظل کو اس اصل کے ساتھ وصل اور الحاق حاصل ہو جائے گا اور وہ کسی امر کے واسطے اور حیلولہ کے بغیر ہوگا چونکہ وہ اصل اسماء  الہی جل شانہ میں سے ایک اسم ہے اس لیے اسم اور اس کےمسمی میں کوئی حائل نہ ہوگا پس ظل کا اس راستے سے اصل الاصل تک جو اس اسم کا مسمی ہے پہنچنا کسی امر کے وسیلہ کے بغیر ہوگا ۔ نیز جو شخص بیچونی وصول کے ساتھ حضر ت ذات تعالی کاواصل ہے اس کے حق میں کسی امر کا واسطہ اور حیلولہ مفقود ہے جب حضرت ذات تعالی کے وصول کی صورت میں حق تعالی کی صفات کا حجاب اور حیلولہ ہونا دور ہو جاتا ہے تو پھر صفات کے سوا کسی اور امر کا حجاب اور حیلولہ ہونا کب گنجائش رکھتا ہے۔

 سوال: جب حضرت ذات تعالی سے صفات واجبی جل شانہ کا جدا ہونا جائز نہیں تو پھر اصل اور موصول الیہ کے درمیان سے صفات کے حیلولہ کا دور ہو جانا کس طرح ہے؟

 جواب: جب سالک کو اپنے اصل کے ساتھ (جواسماء الہی میں سے ایک اسم ہے اور وہ سالک اس کا ظل ہے )وصل وتحقق حاصل ہو جائے تو سالک اور حضرت ذات تعالی کے درمیان کوئی   واسطہ اور حیلولہ نہ ہوگا جس طرح کہ اسم اور اس کے مسمی میں کسی امر کا حیلولہ ثابت نہیں ۔ پس نہ ارتفاع لازم آیا اور نہ انفکاک۔ اسی قسم کی  تحقیق  حقیقت سالک اور حقیقت محمدی کے اتحاد میں اوپر گزر چکی ہے۔ اس تحقیق کا تھوڑا ساحال ظل کے اپنے اصل تک پہنچنے کے بیان میں گزر چکا ہے۔ 

تنبیہ : اس عدم توسط یعنی واسطہ کے نہ ہونے سے جو طریق جذبہ وغیرہ میں کہا گیا ہے کوئی بیوقوف یہ گمان نہ کرے کہ حضرت خیر البشر علیہ الصلوة والسلام کی بعثت کی کچھ حاجت نہیں اور ان کی تبعیت و متابعت کی کچھ پرواہ نہیں کیونکہ یہ کفر و الحاد وزندقہ اور شریعت حقہ کا انکار ہے حالانکہ اوپر گزر چکا ہے کہ جذبہ سلوک کے واسطے کے بغیر جو شریعت کے بجالانے سے مراد ہے ابتر و نا تمام اور سراسرنقمت اور عذاب ہے جو نعمت کی صورت میں ظاہر ہوا ہے اور جذبہ ناتمام کے صاحب پر حجت کو پورا کیا ہے ۔ عرض کشف صحیح  اور الہام صریح سے یقینی طور پر معلوم ہو چکا ہے کہ اس راہ کے دقائق میں سے کوئی دقیقہ اور اس گروہ کے معارف میں سے کوئی معرفت آنحضرت علیہ الصلوة والسلام کی متابعت کے واسطہ اور وسیلہ کے بغیر میسر نہیں ہوتی اور مبتدی اور متوسط کی طرح منتھی کو بھی اس راہ کے فیوض و برکات آنحضرت کی طفیل و تبعیت کے بغیر حاصل نہیں ہوتے۔ بیت۔

  محال است سعدی که راه صفا تو اں رفت جز درپے مصطفی

ترجمہ: اطاعت نہ ہو جب تک مصطفی کی کبھی حاصل نہ ہو دولت صفا کی

افلاطون بے وقوف نے اس صفائی کے باعث جو ریاضتوں اور مجاہدوں سے اس کے نفس کو حاصل ہوئی اپنے آپ کو انبیاء علیہم الصلوة والسلام کی بعثت سے مستغنی جانا اور کہا کہ ‌نَحْنُ قَوْمٌ مَّهْدَیُّوْنَ لَاحَاجَةَ بِنَا إِلىٰ مَنْ يَّهْدِيْنَا ہم ہدایت یافتہ لوگ ہیں ہم کو ایسے شخص کی حاجت نہیں ہے جو ہم کو ہدایت دے۔  اس بیوقوف نے یہ نہ جانا کہ یہ صفائی جو انبیاء کی متابعت کے بغیر ریاضتوں اور مجاہدوں سے حاصل ہوئی ہے ایسی ہے جیسی سیاه تابنے پر سونا چڑھا دیں۔ زہر کو شکر سے غلافی کریں وہ انبیاء کی متابعت ہی ہے جو تا ہنے کی حقیقت کو بدل کر خالص سونا بنادیتی ہے اور نفس کو اماره پن سے نکال کر اطمینان میں لے آتی ہے ۔ حکیم مطلق جل شانہ نے انبیاءعلیہم الصلوة والسلام کی بعثت اور شرائع کو امارہ  کے عاجز اور خراب کرنے کے لیے مقرر کیا ہے اور اس  کی خرابی بلکہ اس کی اصلاح کو ان بزرگواروں کی متابعت کے سوا اور کسی چیز میں نہیں رکھا۔ ان بزرگواروں کی متابعت کے بغیر اگر ہزاروں ریاضتیں اور مجاہد ے کیے جائیں اس کا اماره پن بال بھربھی کم نہیں ہوتا بلکہ اس کی سرکشی اور بھی بڑھ جاتی ہے۔ ع 

ہر چہ گیر دعلتی علت شود ترجمہ جوکچھ مریض کھاۓ اس کا مرض بڑھ جائے ۔

اس کے ذاتی مرض کا دور ہونا انبیا علیہم الصلوۃ والسلام کی شرائع پر موقوف ہے۔ وَبِدُونِهَا خَرْطُ الْقَتَادِ ( اور اس کے سوا بے فائد ه رنج و تکلیف ہے) جاننا چاہیئے کہ جذبہ کے لیے اگر چہ سلوک کا ہونا ضروری ہے خواہ جذبہ سلوک پر مقدم ہو یا مؤخر لیکن جذبہ کے مقدم ہونے میں فضیلت ہے کیونکہ اس صورت میں سلوک اس کا خادم ہے اور جذبہ کے مؤخر ہونے میں سلوک اس کا مخدوم ہے۔ 

کیونکہ وہ اس کی بدولت اس کو جذب میسر ہوا ہے لیکن جذبہ کے مقدم ہونے میں ایسا نہیں کیونکہ وہ بالذات مطلوب ومدعو ہے۔ اسی واسطے یہ مراد ہوا اور وہ مرید۔ مرادوں کے سردار اورمحبوبوں کے رئیس حضرت محمد رسول اللہ ﷺ ہیں کیونکہ اس دعوت سے مقصود ذاتی اور مدعواولی (سب سے اول بلایا ہوا) آنحضرت ﷺہی ہیں اور دوسروں کو خواہ مراد ہوں یا مرید حضور ہی کی طفیل بنایا ہے۔ لو لاہ لما خلق الله الخلق ولما أظهر الربوبية (اگر وہ نہ ہوتے تو الله تعالی خلقت کو پیدا نہ کرتا اور نہ اپنی ربوبیت ظاہر کرتا) چونکہ دوسرے سب ان کے طفلی ہیں اور وہ اس دعوت کے اصل مقصود ہیں۔ اس لیے سب ان کے محتاج ہیں اور انہیں کے ذریعہ سے فیوض و برکات اخذ کرتے ہیں ۔ اس لحاظ سے اگر سب کو ان کی آل کہیں تو بجا اور درست ہے کیونکہ سب ان کے پیچھے چلنے والے ہیں اور ان کے وسیلہ کے بغیر کامل وصول نہیں کر سکتے جب ان سب کا وجود ان کے وجود کے وسیلہ کے بغیرمتصور نہیں ہوسکتا تو دوسرے کمالات جو وجود کے تابع ہیں ان کے وسیلہ کے بغیر کس طرح متصور ہو سکتے ہیں ہاں محبوب رب العالمین ایسا ہی ہونا چاہیئے ذرا کان لگا کر سنیں مکشوف ہوا ہے کہ آنحضرت ﷺکی محبوبیت حق تعالی کی اس محبت کے ساتھ ثابت ہے جو شیون و اعتبارات کے بغیر حق تعالی کی ذات بحت سے تعلق رکھتی ہے اور جس محبت کے سبب حق تعالی کی ذات محبوب ہے برخلاف دوسروں کی محبوبیت کے جو اس محبت کے ساتھ ثابت ہے جس کا تعلق شیون و اعتبارات کے ساتھ ہے اور اسماء و صفات با اسماء وصفات کے ظلال کے ساتھ درجہ بدرجہ متلبس ہے۔ 

فإن فضل رسول الله ليس له                      حد فيعرب عنه ناطق بفم

ترجمہ: بیت رسول پاک کی شان وفضیلت بے نہایت ہے کر سے ظاہر زبان کیونکر کہاں اس میں یہ طاقت ہے

اس مقام کی تحقیق یہ ہے کہ آنحضرت ﷺکا توسط یعنی واسطه و وسیلہ ہونا دو وجہ پر ہوسکتا ہے۔ ایک یہ کہ آنحضرت ﷺسالک اور اس کے مطلوب کے درمیان حائل وحاجب ہوں ۔ دوسرے یہ کہ سالک آنحضرت کے طفیل اور آنحضرت کی تبعیت و متابعت کے واسطہ سے مطلوب تک واصل ہو۔ طریق سلوک میں حقیقت محمدی تک پہنچنے سے پہلے دونوں طرح کا واسطہ ثابت ہے بلکہ میں خیال کرتا ہوں کہ اس طریق میں جوشیخ در میان آیا ہے شہود سالک کا متوسط و حاجب ہے۔ اگر آخر میں جذبہ کے ساتھ اس کا تدارک نہ کریں اور اس کا معاملہ پردہ سے بے پردگی تک نہ پہنچے تو اس کا حال قابل افسوس ہے کیونکہ طریق جذبہ میں حقیقت الحقائق یعنی حقیقت محمدی تک پہنچنے کے بعد دوسری وجہ کا واسطہ ثابت ہے جو طفیلیت اور تبعیت ہے نہ کہ حیلولت و حجاب جوشہود و مشاہدہ وغیرہ کا پردہ ہو۔ کوئی یہ نہ کہے کہ اس واسطے کے نہ ہونے سے اگر چہ ایک ہی وجہ سے ہو۔ حضرت خاتمیت علیہ الصلوة والسلام کی جناب پاک میں قصور لازم آتا ہے کیونکہ میں کہتا ہوں کے واسطے کا نہ ہونا آنجناب علیہ الصلوة والسلام کے کمال کو مستلزم ہے نہ قصور کو کیونکہ قصور وسیلہ و واسطہ کے ہونے میں ہے۔ اس لیے کہ متبوع کا کمال یہ ہے کہ یہ طبع اس کی طفیل و تبعیت سے کمال کے تمام درجات تک پہنچ جائے اور کوئی دقیقہ نہ چھوڑے یہ امر واسطہ کے نہ ہونے میں ثابت ہے نہ کہ واسطہ کے ہونے میں کیونکہ وہاں شہود بے پردہ ہے جو درجات کمال کی نہایت ہے اور یہاں در پرده پس کمال وسیله و واسطہ کے نہ ہونے میں ہے اورقصور واسطہ کے ہونے میں یہ مخدوم کی عظمت و شوکت کا باعث ہے کہ اس کا خادم کسی مقام میں اس سے پیچھے نہیں رہتا اور اس کی تبعیت سے سب کی دولت میں شریک ہوتا ہے اسی واسطے آنحضرت نے فرمایا ہے کہ عُلَمَاءُ أُمَّتِي ‌كَأَنْبِيَاءِ بَنِي إِسْرَائِيلَ میری امت کے علماء بنی اسرائیل کے نبیوں کی طرح ہیں)رویت اخروی کسی امر کے واسطہ اور حیلولہ کے بغیر ہوگی۔ حدیث میں آیا ہے کہ جب بندہ نماز میں داخل ہوتا ہے تو وہ حجاب جو بندہ اور خدا  کے درمیان ہے دور ہو جاتا ہے یہی وجہ ہے کہ نماز مومن کی معراج ہے اور اس سے بہت ساحصہ منتہی واصل کو حاصل ہوتا ہے کیونکہ حجاب کا دور ہونا اس فقیر کی خاص لدنی معرفتوں میں سے ہے جومحض فضل و کرم سے اس فقیر کو عطا فرمائی ہے اور اس کی حقیقت سے متحقق کیا ہے۔ بیت 

من آں خاکم که ابر نو بهاری کنداز لطف بر من قطره باری

 ترجمہ بیت . وہ مٹی ہوں کہ ابر نو بہاری کرے جس پر کرم سے قطره باری 

کسی نے اچھا کہا ہے۔ بیت

اگر پادشہ بردر پیر زن بیاید تو اے خواجہ  سبلت مکن

 ترجمہ: اگر بڑھیا کے در پر آئے سلطان تو اے خواجہ نہ ہو ہرگز پریشان

آنحضرت ﷺکے توسط و عدم توسط میں مشائخ طریقت قدس سرہم کا بہت اختلاف ہے ۔ بعض توسط کی طرف گئے ہیں اور بعض عدم توسط کی طرف لیکن کسی نے توسط وعدم توسط کی تحقیق نہیں کی اور کمال قصور کی نسبت کچھ بیان نہیں کیا ۔ نزدیک ہے کہ ارباب ظواہریعنی علماء ظاہر عدم توسط کو کہ کمال ایمان ہے ۔کفر جانیں اور بے سوچ سمجھے اس کے قائل کو گمراہی کی طرف منسوب کریں اور تو سط کو کمال ایمان تصور کریں اور اس کے قائل کو کامل تابعداروں سے جانیں حالانکہ عدم توسط متابعت کے کامل کی خبر دیتا ہے اور تو سط متابعت کے تصور کو ظاہر کرتا ہے جیسے کہ گزر چکا ان کا یہ کہنا حقیقت حال سے ناواقف ہونے کے سبب سے ہے اللہ تعالی فرماتا ہے۔ بَلْ كَذَّبُوا بِمَا لَمْ ‌يُحِيطُوا بِعِلْمِهِ وَلَمَّا يَأْتِهِمْ تَأْوِيلُهُ كَذَلِكَ كَذَّبَ الَّذِينَ مِنْ قَبْلِهِمْ   بلکہ جھٹلایا انہوں نے اس سبب سے کہ اس کے علم کا احاطہ نہ کیا حالانکہ ابھی اس کی تاویل ان کے پاس نہیں آئی اسی طرح ان سے پہلے لوگوں نے جھٹلایا) میرے مخدوم ! اویسی کہنے میں پیر ظاہر کا انکار نہیں کیونکہ اویسی وہ شخص ہے جس کی تربیت میں روحانیوں کا دخل ہوحضرت خواجہ احرار قدس سرہ کو پیر ظاہر کرنے کے باوجود چونکہ حضرت خواجہ نقشبند قدس سرہ کی روحانیت سے امداد بھی تھی اس لیے اویسی کہتے تھے اسی طرح حضرت خواجہ نقشبند قدس سرہ نے باوجود پیر ظاہر کے چونکہ حضرت خواجہ عبدالخالق قدس سرہ کی روحانیت سے مدد پائی تھی اس لئے وہ بھی اویسی تھے خصوصا وہ شخص جواویسی ہونے کے باوجود پیر ظاہر کا اقرار رکھتا ہے اس زبردستی پیر کا انکار اس کے ز مے لگاتا عجب انصاف ہے۔ میرے مخدوم ۔ لفظ عبدالباقی کی ترکیب سے مراد اضافی معنی ہیں ۔ نہ علمی معنی بھی اگر چہ علمی معنی بھی اس سے بخوبی ظاہر ہوتے ہیں لیکن میرا پیرا گرچه بنده باقی کا ہے یعنی اللہ تعالی کا بندہ ہے لیکن میری تربیت کا متکفل اور ذمہ دار الله باقی ہے۔ اس میں کونسی تحریف اور بے ادبی ہے۔ اللہ تعالی انصاف دے میرے مخدوم وہ قصور جو معنی سبحانی میں کہ غلبات سکر(مستی)  میں حضرت بسطامی قدس سرہ سے صادر ہوا ہے کہ کہا ہے اس سے لازم نہیں آتا کہ وہ تصور اس کے کہنے والے میں دائمی ہوتا کہ دوسرا اس سے افضل ہو کیونکہ بہت سے ایسے معارف ہیں جو ایک وقت میں اس قوت کےحال کے موافق صادر ہوتے ہیں اور دوسرے وقت میں اللہ تعالی کی عنایت سے جب ان کا قصور معلوم ہوا ہے تو ان سے گزر کر اوپر کے مقام میں پہنچے ہیں۔ آپ کے مکتوب شریف میں لکھا تھا کہ اگر ارباب سکر(مستی) اس قسم شطح آمیز (وہ اقوال جو حالت مستی  اور ذوق میں بے اختیار صادر ہوں،بظاہر خلاف شریعت)باتیں لکھیں تو بجا ہے لیکن ارباب صحو (ہوشیاری) سے اس قسم کی باتوں کا ظاہر ہونا تعجب کا باعث ہے میرے مخدوم جس کسی نے ان باتوں کو لکھا ہے سکر ہی کے باعث لکھا ہے ۔ سکر  کی آمیزش کے بغیر اس بارہ میں کوئی قلم نہیں پکڑتا۔ حاصل کلام یہ ہے کہ سکر میں بہت سے مرتبے ہیں جس قدر سکر زیادہ ہوگا اسی قدر شطح غالب ہوگا بسطامی جیسا شخص ہونا چاہیئے کہ قول لوائي ارفع من لواء محمد (میرا جھنڈا حضرت محمد ﷺکے جھنڈے سے برتر ہے ) اس سے بے تحاشا سرزد ہو۔ پس جو کوئی صحو رکھتا ہے گمان نہ کریں کہ سکر اس کے ہمراہ نہیں کیونکہ یہ عین قصور ہے ۔صحو خالص عام کا نصیب ہے جس نے صحو کو ترجیح دی ہے اس کی مراد غلبہ صحو ہے نہ صرف صحواسی طرح جس نے سکر کو ترجیح دی ہے اس کی مراد غلبه سکر ہے نہ سکر خالص کہ وہ سراسر آفت ہے حضرت جنید قدس سره جوار باب صحو کے رئیس ہیں اورصحو کوسکرپرترجیح دیتے ہیں۔ ان کی اس قدر سکر  آمیز عبارتیں ہیں جن کا شمارنہیں ہوسکتا۔ فرماتے ہیں۔ هو العارف والمعروف (وہی عارف ہے اور وہی معروف ) اور فرماتے ہیں لون الماء لون انائہ ( پانی کا رنگ اس کے برتن کا رنگ ہے) اور فرماتے ہیں۔ المحدث إذا قورن بالقديم لم يبق له اثر (حادث جب قدیم کے ساتھ مل جاتا ہے تو اس کا کوئی اثر باقی نہیں رہتا) صاحب عوارف جوکاملین ارباب صحو میں سے ہے اس  کی کتاب میں اس قدر معارف سکر  یہ ہیں جن کا بیان نہیں ہوسکتا۔ اس فقیر نے اس کے معارف سکر  یہ کو ایک ورق میں جمع کیا ہے ۔ سکر  کے بقیہ کا سبب ہے کہ اسرار کا ظاہر کرنا جائز سمجھتے ہیں اور سکر  ہی کا باعث ہے جو فخر و مباہات کرتے ہیں ۔ سکر  ہی سے ہے کہ دوسروں پر اپنی زیادتی ظاہر کی جاتی ہے جہاں صحو خالص ہے وہاں اسرار کا ظاہر کرنا کفر ہے اور اپنے آپ کو دوسرے سے بہتر جاننا شرک ہے صحو میں سکر  کا بقیہ نمک کی طرح ہے جو طعام کا اصلاح کرنے والا ہے اگر نمک نہ ہو۔ طعام معطل و بیکار ہوتا ہے۔ بیت 

اگر عشق نبودے وغم عشق نبودے چندیں سخن نغزنه گفتے ونشنو دے 

ترجمہ بیت . گر نہ ہوتاعشق اورہوتانہ  اس کا دردوغم ایسی ایسی عمده باتیں پھر نہ کہتے سنتے ہم 

صاحب عوارف قدس سرہ نے قول قدم هذه على رقبة كل ولی کو(میرا قدم ہر ایک ولی کی گردن پر ہے ) جوشیخ عبدالقادر جیلانی قدس سرہ سے صادر ہوا ہے ۔سکر(مستی)  کے بقیہ پر محمول کیا ہے اس کی مراد اس قول کا قصور نہیں ۔ جیسے کہ بعض نے وہم کیا ہے بلکہ عین مدحت و تعریف ہے اور واقع کا بیان کیا ہے یعنی اس قسم کی باتوں کا صادر ہوتا جو فخر و مباہات کی خبر دیتی ہیں سکر(مستی)  کے بقیہ کے بغیر ثابت نہیں کیونکہ صحو خالص میں اس قسم کی باتوں کا سرزد ہونا دشوار ہے۔ اس فقیر نے جو یہ دفتروں کے دفتر اس گروہ کے علوم و اسرار میں لکھے ہیں کیا آپ سمجھتے ہیں کہ سکر  کی آمیزش کے بغیرصحوخالص سے لکھے ہیں ہرگز نہیں کیونکہ وہ حرام و منکر اور گزاف و سخن بافی (باتیں بنانا)ہے سخن باف یعنی بیہودہ باتیں بنانے والے جو خالص صحو سے متصف ہیں بہت ہیں وہ اس قسم کی باتیں کیوں نہیں بناتے اور لوگوں کے دلوں کو اس طرف کیوں نہیں مائل کرتے۔ بیت 

فریاد حافظ این ہم آخر بہر زه نیست ہم قصہ غریب وحدیث عجیب است 

ترجمہ بیت نہیں حافظ کی یہ بیہودہ فریاد عجب ہے ماجر ا اس کا سراسر 

میرے مخدوم اس قسم کی باتیں جو اسرار کے اظہار پر مبنی ہیں اور ظاہر کی طرف سے مصروف اور پھری ہوتی ہیں ہر وقت مشائخ طریقت قدس سرہم سے سرزد ہوتی رہی ہیں اور ان بزرگواروں کی عادت مستمرہ ہوگئی ہے۔ کوئی نیا امرنہیں جس کو اس فقیر نے شروع کیا ہے یا اس کا اختراع کیا ہے۔ 

وليس هذا ‌أول ‌قارورة كسرت في الإسلام (یہ پہلی شیشی نہیں جو اسلام میں توڑی گئی ہو)پر یہ سب شور و غوغا کیا ہے ۔ اگر کوئی ایسا لفظ صادر ہوا ہے جس کا ظاہر علوم شریعہ کے ساتھ مطابقت نہیں رکھتا تو تھوڑی سی توجہ کے ساتھ اس کو ظاہر سے پھیر کر مطابق کرنا چاہیئے اور ایک مسلمان کو متہم نہ کرنا چاہیئے جب شریعت میں فاحشہ کا رسوا کرنا اور فاسق کا خوار کرنا حرام و منکر ہے تو پھر صرف اشتباه ہی سے ایک مسلمان کا خوار کرنا کیا مناسب ہے اور شہر شہر اس کی منادی کرنا کونسی دینداری ہے۔ مسلمانی اور مہربانی کا طریق یہ ہے کہ اگر کسی شخص سے کوئی ایساکلمہ  صادر ہو جو بظاہر علوم شرعیہ کے مخالف ہو تو دیکھنا چاہیئے کہ اس کا کہنے والا کون ہے اگر ملحدوزندیق (بے دین)  ہوتو اس کو رد کرنا چاہیئے اور اس کی اصلاح میں کوشش نہ کرنی چاہیئے اور اگر اس کلمہ کا کہنے والا مسلمان ہو اور خدا اور رسول پر ایمان رکھتا ہو تو اس کی اصلاح کی کوشش کرنی چاہیئے اور اس کے واسطےمحمل صحیح (صحیح معنی) پیدا کرنا چاہیئے یا اس کے کہنے والے سے اس کا حل طلب کرنا چاہیئے اور اگر اس کے حل کرنے میں عاجز ہو تو اس کو نصیحت کرنی چاہیئے اور نرمی کے ساتھ امر معروف اور نہی منکر کرنا چاہیئے کیونکہ اجازت وقبولیت کے نزدیک ہے او اگر مقصود اجابت نہ ہو اور خوار کرنا ہی مطلوب ہو تو یہ الگ بات ہے اللہ تعالی توفیق دے ۔ زیادہ تر تعجب کی بات یہ ہے کہ آپ کے مکتوب شریف سے مفہوم ہوا ہے کہ اس عزیز نے اس فقیر کے مکتوب کو سننے کے بعد آپ کے ملازموں میں بھی اشتباه و انحراف طاری ہو گیا تھا ۔ مانا کہ انعکاسی ہوگا آپ کو چاہیئے تھا کہ اشتباہ کے مقامات کو خودحل کردیتے اور اس فقیر پر نہ ڈالتے اور فتنہ کو فرو کر دیتے۔ فقیر دوسرے یاروں کا گلہ کرے جن میں سے بعض یار اس اشتباه کے دفع کرنے کی طاقت بھی رکھتے تھے۔ کچھ نہ کر سکے اور خامو ش رہے

مازیا راں چشم یاری و اشتیم خود غلط بود آنچه مانپداشتیم

: ترجمہ بیت ہم کو تھایا روں سےیاری کا خیال پرسراسروہ غلط نکلا خیال 

رَبَّنَا آتِنَا مِنْ لَدُنْكَ رَحْمَةً وَهَيِّئْ لَنَا مِنْ أَمْرِنَا ‌رَشَدًا يا الله تو اپنے پاس سے ہم پر رحمت نازل فرما اور ہمارے کام سے بھلائی ہمارے نصیب کر) والسلام اولا واخرا۔ 

مکتوبات حضرت مجدد الف ثانی دفتر سوم صفحہ365ناشر ادارہ مجددیہ کراچی

اَلْحَمْدُ لِلّٰهِ وَسَلَامٌ عَلٰی عِبَادِہِ الَّذِیْنَ اصْطَفٰی  ( الله تعالی کیلئے حمد ہے اور اس کے برگزیدہ بندوں پر سلام ہو )

 برادرم عزیز کے بزرگ صحیفوں نے یکے بعد دیگرے پہنچ کر خوش کیا۔ اللہ تعالی کیلئے حمد ہے کہ بے مناسبتی کے اسباب کے باوجود اس محبت و ارتباط میں جو آپ کو فقراء کے ساتھ ہے کسی قسم کا تغیر و تبدل نہیں آیا اور فتورکا باعث نہیں ہوا بلکہ اس ارتباط ومحبت میں زیادتی پیدا ہوئی ہے۔ حق تعالی آپ کو اس گروہ کی محبت میں استقامت عطا فرمائے کیونکہ یہی محبت سعادت کا سرمایہ ہے۔ اے شفقت کے نشان والے اس فرصت میں گوشہ نشینی کا شوق غالب آ کر گوشہ نشینی اختیار کی ہے۔ جمعہ کے سوا مسجد میں نہیں جاتا۔ جماعت پنج وقتی اس گوشہ میں منعقد ہو جاتی ہے۔ لوگوں کی ملا قات کا راستہ بند ہے۔ اوقات بڑی جمعیت سے گزر رہے ہیں۔ گویا تمام عمر کی آرزو اب حاصل ہوئی ہے۔ اس نعمت پر الله تعالی کیلئے حمد ہے۔ باقی ظاہری احوال بھی عافیت کے ساتھ ہیں اور تمام فرزند (دل کو طمینان حاصل ہونا) ومتعلقین جمعیت کے ساتھ بسر کر رہے ہیں۔ جناب خواجہ عبدالله(خواجہ باقی باللہ کے صاحبزادے) ماه مبارک رمضان سے پہلے دہلی تشریف لے گئے ۔ اللہ تعالی کیلئے حمدہے کہ خواجہ نے اس آنے میں بہت فائدے حاصل کئے اور حالت تمام بدل لی اور توحید کے غلبات سے دریائے   تنزیہ (ذات حق کو امکانی نقائص سے پاک جاننا) میں غوطہ لگایا اور عمق یعنی گہرائی کی طرف متوجہ ہیں اور ظاہر سے باطن بلکہ باطنوں کے باطن کی طرف جارہے ہیں ۔ باقی احوال حافظ بہاء الدین(مجدد پاک کے بھتیجے) وہاں آ کر مفصل طور پر بیان کرے گا۔ 

مکتوبات حضرت مجدد الف ثانی دفتر سوم صفحہ364 ناشر ادارہ مجددیہ کراچی

شیخ(شہاب الدین سہروردی) قدس سرہ نے اپنی کتاب عوارف کے نویں باب میں ان لوگوں کے بیان میں جو صوفیاء کی طرف منسوب ہیں کہا ہے کہ ان میں سے بعض وہ لوگ ہیں جو حلول کے قائل ہیں۔ 

خَذَلَھُمُ اللہ ُسُبْحَانَہٗ اللہ تعالیٰ ان کو خوار کرے) اور خیال کرتے ہیں کہ اللہ تعالیٰ ان میں حلول کئے ہوئے ہے اور ان جسموں میں کہ جن کو وہ دوست رکھتا ہے۔ حلول کرتا ہے اور قول نصاریٰ کے معنی لاہوت (عالم ذات الہی) اورناسوت(انسانی جسم) میں ان کے فہموں کی طرف بڑھتے ہیں اور ان میں سے بعض وہ لوگ ہیں جو اس وہم کے باعث محسنات یعنی خوبصورت چیزوں کی طرف نظر کرنا مباح جانتے ہیں اور خیال کرتے ہیں کہ جن لوگوں نے اپنے بعض غلبوں کے وقت کلمات کہے ہیں۔ ان کلمات میں کچھ نہ کچھ وہی امر مضمر اور پوشیدہ ہے جو انہوں نے گمان کیا ہے جیسے کہ حلاج کا ‌أَنَا ‌الْحَقُّ    (میں خدا ہوں)   کہنا اور حضرت بایزید کا سُبْحَانِي(میں پاک ہوں )وغیرہ فرمانا۔حاشا وکلا کہ حضرت بایزید کے حق میں یہ اعتقاد کریں کہ اس نے اللہ تعالیٰ کی طرف سےحکایت کے معنی کے سوا کچھ اور کہا ہے حلاج کے قول میں بھی یہی اعتقاد ہونا چاہیئے اگر ہم جانتے کہ اس قسم کے قول میں کچھ نہ کچھ حلول مضمر اور پوشیدہ ہے تو ہم ان کو بھی ردکرتے۔ جیسے کہ ان کو رد کرتے ہیں۔ فقط نہیں معلوم ۔ اللہ تعالیٰ کی طرف سے حکایت کے کیا معنی ہیں اور ارباب سکر(مستی) کو معنی حکایت کے طور پر اس قسم کے قول کے ساتھ مخصوص کرنے کی کیا وجہ ہے۔ سوائے اس کے کہ کہا جائے کہ شیخ قدس سرہ کی مراد یہ ہے کہ اس قسم کے قول کا کہنے والا اگر بندہ ہے جیسے کہ اکثر کے نزدیک ظاہر ہے تو بیشک یہ قول الله تعالیٰ کی طرف سے حکایت ہے کیونکہ بندہ رب نہیں بن جاتا لیکن اس قول کا کہنے والا درحقیقت اللہ تعالیٰ ہے اور بندہ کی زبان درخت موسوی کی طرح ہے اس صورت میں حلاج اور بایزید قدس سرہما پرکوئی طعن و اعتراض نہیں مگرشیخ قدس سرہ کی عبارت سے ظاہر ہوتا ہے کہ اگر وہ اس قول کو حکایت کے معنی پرمحمول نہ کرتا تو اس سے حلول کے معنی سمجھے جاتے۔ حالانکہ ایسا نہیں کیونکہ توحید کے غلبے اور اور واحد مشہود(مشاہدہ) کے ماسوا کے پوشیدہ ہو جانے اور نور شہود کے چمکنے کے وقت حلول و اتحاد کی آمیزش کے بغیر اس قسم کی باتوں کا کہنا جائز ہے۔ قول ‌أَنَا ‌الْحَقُّ  کے معنی یہ ہیں کہ میں کچھ نہیں ہوں اور موجودحق تعالیٰ ہی ہے۔ نہ یہ کہ میں حق تعالیٰ کے ساتھ متحد ہوں یا حق تعالیٰ میں حلول کئے ہوئے ہوں کہ یہ کفر ہے اور توحید شہود ی کے منافی ہے۔ کیونکہ اس میں واحد واحد کے سوا کچھ مشہودہیں اور حلول و اتحاد کی صورت میں مشہود متعدد ہو جاتے ہیں۔ گواتحاد و حالیت(اس کا کسی میں سرائیت کرنا ) کے طور پر ہوں اور شیخ قدس سرہ کا قول کہ ان میں سے بعض وہ لوگ ہیں جو اسی وہم یعنی حلول کے باعث خوبصورت چیزوں کا دیکھنا مباح جانتے ہیں ۔ تعجب کی بات ہے کہ شیخ اجل قدس سرہ اس قسم کی عبارتوں سےحلول و اتحادسمجھتا ہے حالانکہ ان اقوال سے ظہور ثابت ہوتا ہے جوحلول کے ماوراء ہے کیونکہ حلول کے یہ معنی ہیں کہ ایک شے بنفسہ دوسری شے میں موجود ہے جیسے کہ زید کابنفسہ گھر میں موجود ہونا اور ظہور کے یہ معنی ہیں کہ ایک شے کا کسی دوسری شے میں موجود ہو جیسے کہ زید کا عکس آئینے میں۔ امر اول مرتبہ وجوب میں محال ہے اور اس مرتبہ مقدسہ کیلے نقص کا موجب ہے اور امر دوم اپنے ثبوت کے باعث ممکن و جائز ہے اور اس کے حصول میں کوئی نقص نہیں کیونکہ امر اول سے تغیر لازم آتا ہے جو قدم کے منافی ہے اور امر دوم میں یہ بات نہیں جیسے کہ ظاہر ہے۔ پس اگر وجوبی کمالات امکانی عدموں کے آئینوں میں ظاہر ہوں تو اس سے ان کمالات کا ان آئینوں میں حلول وتغیر و انتقال جوقدم کے منافی ہے لازم نہیں آتا کیونکہ حق تعالیٰ کے کمال کا ظہور اور اراءت یعنی دکھاوا یا نمود ہے جیسے کہ آئینہ میں ہوتا ہے پس امکانی آئینوں میں حق تعالیٰ کے کمالات کا شہود(مشاہدہ) تجویز کرنا ان میں ان کمالات کے حصول کا تجویز کرنا نہیں ہے۔ بلکہ آ ئینہ میں کمالات کے ظہور کا تجویز کرنا ہے اور اس میں کوئی نقص نہیں اگر چہ اس قسم کے شہود کو جائز رکھنے والا صاحب نقص اور راستہ پر غیرمستقیم ہے لیکن مقصود یہ ہے کہ اس سے حلول کی تہمت رفع ہو جائے نہ کہ اس کا کمال ثابت ہو کہ وہ کچھ ہے۔ وَاللَّهُ ‌سُبْحَانَهُ وَتَعَالَى بِحَقَائِقِ ‌الْأُمُورِ كُلِھَا( تمام امور کی حقیقت کو الله تعالیٰ ہی جانتا ہے)۔ 

مکتوبات حضرت مجدد الف ثانی دفتر سوم صفحہ362ناشر ادارہ مجددیہ کراچی

شیخ(شہاب الدین سہروردی) رضی اللہ تعالیٰ عنہ نے اپنی کتاب عوارف کے دوسرے باب میں اس حدیث کے بیان میں جو رسول الله ﷺکی طرف مرفوع ہے ‌مَا ‌نَزَلَ ‌مِنَ ‌الْقُرْآنِ آيَةٌ إِلا لَهَا ظَهْرٌ وَبَطْنٌ، وَلِكُلِّ حَرْفٍ حَدٌّ، وَلِكُلِّ حَدٍّ مَطْلَعٌ( قرآن مجید کی ہر ایک آیت کیلئے ایک ظاہر ہے اور ایک باطن اور ہر ایک حرف کیلئے ایک حد اور ہر ایک حد تک کیلئے ایک مطلع ہے) کے بیان میں کہا ہے کہ میرے دل میں کھٹکتا ہے کہ مُطَّلَعٌ سے یہ مرادنہیں کہ صفاء فہم سے آیت کے پوشیده ستر اور بار یک معنی پر واقف ہوں بلکہ مُطَّلِعٌ سے یہ مراد ہے کہ ہر ایک آیت کے نزدیک متکلم کے شہود(مشاہدہ) پر اطلاع ہو کیونکہ ہر ایک آیت متکلم کے اوصاف میں سے کسی وصف اور اس کی لغوت میں سے کسی لغت کی امانت گاہ ہے۔ پس آیات کی تلاوت اور ان کے سننے سے نئی نئی تجلیات ظاہر ہوتی ہیں اور آئینے بن کر عظیم جلال کی خبر دیتیں ہیں۔ الى اخر ما قال في تائيد هذا التوجيه وشرحه (آخر كلام تک جواس توجیہ اور اس کی شرح میں کہی ہے) الله تعالیٰ کے کرم سے جو کچھ میرے دل میں گزرتا ہے وہ یہ ہے کہ ظہر سے مرا نظم قرآن ہے جو حداعجاز تک پہنچنے والی ہے اوربطن صفاءفہم کے اختلاف کے بموجب بار یک معنی اور پوشیده سر پر اس کی تفسیر و تاویل سے مراد ہے اور حد سے مراد مراتب کلام کی نہایت ہے جو متکلم کا شہودہے اور وہ تجلی نعتی ہے جوعظیم جلال کی خبر دیتی ہے اور مطلع وہ ہے جو ت تجلی نعتی سے برتر ہے اور وہ تجلی ذاتی ہے جو تمام نسبتوں اور اعتباروں سے خالی ہے نبی ﷺنے کلام کی حد اور اس کے نہایت کے لیے مطلع ثابت کیا۔ گویا مطلع کلام اور نہایت کلام کے ماوراء ہے اور کلام حق تعالیٰ کی صفت ہے اورمتکلم کا شہوداس صفت کے آئینے میں اس صفت کی تجلی  ہے اور اس کے مراتب کمال کی نہایت ہے۔ اس تجلی کے ماوراء پر اطلاع تب ہوتی ہے جب اس تجلی سے تجلے ذاتی کی طرف ترقی کریں پس اس جگہ ذات تک پہنچنا صفت کلام کے ذریعے اورنظم قرآنی کی تلاوت کے وسیلے سے ہے جو اس صفت پر دلالت کرتا ہے۔ پس دو قدموں کا ہونا ضروری ہے ایک قدم نظم قرآنی کا جومدلول یعنی صفت کی طرف دلالت کرنے والا ہے۔ دوسرا قدم صفت کا اپنے موصوف کی طرف عارف قدس سرہ نے فرمایا ہے۔ مَشَیْتُ خُطْوَتَانِ وَقَدْ وَصَلْتَ میں دو قدم چلا اور واصل ہو گیا لیکن شیخ قدس سرہ نے صرف پہلا قدم ذکر کیا ہے اور اس سیر کو اس کے ساتھ تمام کیا ہے اور تلاوت کے فائدہ کو اسی سے مقید کیا ہے اور کچھ بیان نہیں کیا۔ 

‌سُبْحَانَكَ لَا عِلْمَ لَنَا إِلَّا مَا عَلَّمْتَنَا إِنَّكَ أَنْتَ الْعَلِيمُ الْحَكِيمُ (یااللہ تو پاک ہے ہم کو کوئی علم نہیں مگر جس قدر کہ تو نے ہم کو سکھایا بے شک تو جاننے والا حکمت والا ہے )اس کے بعدشیخ قدس سرہ نے کہا ہے کہ امام جعفر صادق رضی اللہ تعالیٰ عنہ کی نسبت منقول ہے کہ ایک دفعہ آپ نماز میں بے ہوش ہو کر گر پڑے جب اس کا باعث پوچھا گیا تو آپ نے فرمایا کہ میں ایک آیت کا تکرار کرتا رہا حتی کہ میں نے اس کو اس کے متکلم سے سناپس جب صوفی کے لیے توحید کا نور چمکتا ہے اور وعدہ وعید کے سننے کے وقت اپنے کانوں کو اس طرف لگاتا ہے اور اس کا دل ماسوی اللہ سے آزاد ہو کر اللہ تعالیٰ کے سامنے حاضر اور شہید ہو جاتا ہے تو اس وقت تلاوت میں اپنی اور غیر کی زبان کو حضرت موسی کے درخت کی طرح دیکھتا ہے جہاں سے اللہ تعالیٰ نے إِنِّي ‌أَنَا ‌اللَّهُ کا خطاب سنایا تھا جب اس کا سننا اللہ تعالیٰ کی طرف سے اور اس کا سنانا بھی الله تعالیٰ ہی طرف ہو جاتا ہے تو اس کے کان آنکھ ہو جاتے ہیں اور آنکھیں کان بن جاتی ہیں اور اس کا علم سراسرعمل اور اس کاعمل بالکل علم ہو جاتا ہے اور اس کا آخر اول سے اور اول آخر سے بدل جاتا ہے پس جب صوفی اس وصف کے ساتھ متحقق ہو جاتا ہے تو اس کا وقت سرمدی اور اس کا شہود  دائمی اور اس کا سماع ہردم نیا ہوتا ہے (ختم ہوا کلام شیخ کا )

(جب صوفی کے لیے توحید کا نور چمکتا ہے) یہ جملہ حضرت امام کے قول کا بیان ہے (متکلم سے سننے کے یہ معنی ہیں کہ جب صوفی پر توحید کا حال غالب ہو جاتا ہے اور غیر کا شہود اس کی نظر سے دور ہو جاتا ہے تو الله تعالیٰ کے سامنے اس طرح حاضر اور شہید رہتا ہے کہ جب اپنے آپ سے یا غیر سے کلام سنتا ہے تو اس کو گویا اللہ تعالیٰ ہی کی طرف سے سنتا ہے اور اپنی اور غیر کی زبان کو حضرت موسی کے درخت کی طرح دیکھتا ہے۔ یعنی پہلے حضرت امام جوں جوں آیت کا تکرار کرتے رہے تو اس کو اپنے نفس اور زبان سے سنتے رہے جب تکرار کرتے کرتے توحید کا حال ظاہر ہوا تو اس کومتکلم سے سنا۔ اگر چہ حضرت امام کی زبان سے صادر ہوئی تھی کیونکہ اس وقت انہوں نے اپنی زبان کو حضرت موسی کے درخت کی طرح معلوم کیا تھا گویا وہ کلام جو اس وقت زبان سے ظاہر ہوا تھا اس کلام کی طرح تھا جو اس درخت سے ظاہر ہوا تھا کہ یہ اللہ تعالیٰ کا کلام ہے۔ اَقُوْلُ وَبِاللهِ الْعِصْمَۃِ وَالتَّوْفِيْقِ میں کہتا ہوں اور اللہ تعالیٰ ہی سے عصمت وتوفيق ہے ) کہ جو کلام حضرت موسی کے درخت سے سنا گیا تھا وہ بیشک الله تعالیٰ کا کلام تھا۔ اگر کوئی اس کا انکار کرے تو کافر ہو جاتا ہے اور یہ کلام جو زبانوں سے سنا جاتا ہے۔ یہ درحقیقت اللہ تعالیٰ کا کلام نہیں ہے ۔ اگر صوفی غلبہ توحید میں اس کو اللہ تعالیٰ کا کلام خیال کرے۔ اگر کوئی اس کا انکار کر دے تو کافرنہیں ہوگا ۔ بلکہ محقق صادق ہوگا کیونکہ یہ کلام زبان کی حرکت اور مخارج کے اعتماد سے حاصل ہوا ہے اور درخت کا حال ایسا نہیں تھا۔ ان دونوں کلاموں میں بہت فرق ہے کیونکہ اول تحقیقی ہے اور دوسراتخییلی ۔ بڑے تعجب کی بات ہے کہ شیخ قدس سرہ نے اس جگہ توحید میں اس قدر مبالغہ کیا ہےکہ تخییلی کو تحقیقی بنادیا ہے اور غلبہ حال میں بندہ سے صادر ہونے والے کلام کو الله تعالیٰ سے صادر شده کلام کی طرح سمجھا ہے۔ حالانکہ اپنی اسی کتاب میں ایک جگہ شیخ قدس سرہ نے ان اقوال سے جو غلبہ حال کے وقت توحید والوں سے توحید کے بارہ میں صادر ہوتے ہیں۔ انکار کیا ہے اور حلول و اتحاد کی آمیزش سے ڈر کر ان کو الله تعالیٰ کی طرف سے حکایت پرمحمول کیا ہے لیکن اس جگہ حلول کی آمیزش سے نہیں ڈرا بلکہ اتحاد و عینیت کا حکم کیا ہے۔ اس مقام میں حق بات یہ ہے کہ غلبہ حال میں اتحاد وعینیت کا حکم کرنا تخییلی ہےتحقیقی نہیں۔ خواہ اتحاد ذات میں ہو۔ خواہ صفات و افعال میں۔ فَسُبْحَانَ مَنْ لَّا يَتَغَيَّرُ بِذَاتِهٖ وَلاَ بِصِفَاتِهٖ وَلَا فِيْ اَفْعَالِهٖ بِحُدُوْث ِالْأَکْوَانِ ( پاک ہے وہ اللہ تعالیٰ جو موجودات کے پیدا کرنے سے ذات و صفات و افعال میں تغیر نہیں ہوتا اس کی ذات و صفات و افعال کے ساتھ کسی کی ذات و صفات و افعال متحد نہیں ہو سکتے۔ وہ مالک پاک ہے۔ جیسے کہ ہے اور ممکن ممکن ہے اور ذات وصفات و افعال میں حادث ہے۔ پس قدیم و حادث کے درمیان اتحاد کاحکم کرنا عشق کی تلوينات اور محبت وسکر(مستی) کے غلبات کے باعث ہے اور حلول کی آمیزش اور اتحاد کے گمان کے باعث کہ جس سے کفر و الحاد لازم آتا ہے۔ ان کا کوئی مواخذہ نہیں ۔ کیونکہ یہ ان کی مرادنہیں ہے اور وہ امر جوحق تعالیٰ کی پاک جناب کے لائق نہیں۔ ہرگز ہرگز ان کی مراد نہیں ہوسکتا۔ کیونکہ یہ لوگ اللہ تعالیٰ کے دوست اور محب ہیں اور اس قسم کی نامناسب باتوں کے تجویز کرنے سے جو اللہ تعالیٰ کی شان کے لائق نہیں محفوظ ہیں ۔ لیکن جن لوگوں نے حال و صدق کے بغیر ان کی مشابہت کی اور ان کے کلام کی طرح کلام کیا اور اس سے ان کی مراد کے بر خلاف سمجھا۔ وہ الحاد و زندقہ میں پڑ گئے ۔ حتی کہ ان لوگوں نے اللہ تعالیٰ اورممکن کے درمیان حلول و اتحاد ثابت کیا اور ممکن کے واجب ہو جانے کا حکم کیا۔ یہی لوگ زندیق (بے دین) ہیں ۔ جو اس بحث سے خارج ہیں۔ قَاتَلَهُمُ اللَّهُ أَنَّى ‌يُؤْفَكُونَ الله تعالیٰ ان کو ہلاک کرے یہ کدھر بھٹکتے پھرتے ہیں) پوشیدہ نہ رہے کہ شیخ قدس سرہ نے جو کچھ امام رضی اللہ تعالیٰ عنہ کے قول کے بیان میں فرمایا ہے۔ اگر چہ اہل تلوین میں سے ان لوگوں کے حق میں صادق ہے۔ جن پرسکر اور توحيد غالب ہے۔ لیکن چونکہ امام کی شان میں میرا حسن ظن ہے۔ اس لئے میں ان کے حق میں اس امر کا صدق تجویز نہیں کرتا۔ کیونکہ وہ میرے نزدیک ارباب تمکین وصحو میں سے ہیں۔ ان کے نزدیک متخیل اور متحقق ظاہر ہے اور غیر سے سننا اور حق تعالیٰ سے سننا پوشیدہ نہیں۔ امام کے کلام کیلئے اس وجہ کے سوا کوئی اور اچھا محمل(کسی معنی کے سچا ہونے کی جگہ) تلاش کرنا چاہیئے۔ جو ان کے حال کے مناسب ہو اور وہ یہ ہے کہ ہوسکتا ہے کہ بندہ اللہ تعالیٰ کے کلام کو بلا کیف سنے۔ جس طرح کہ حضرت موسی نے کوہ طور پر سنا۔ اگر تو پوچھے کہ اللہ تعالیٰ سے کلام کے سننے کے کیا معنی ہیں کیونکہ یہ جو سنا جاتا ہے۔ صرف حرف ہیں یا آواز ۔ تو میں کہتا ہوں کہ ممنوع ہے۔ کیا نہیں دیکھتے کہ اللہ تعالیٰ اپنے كلام کوحرف وصوت کے بغیر کلام کوسنتا ہے۔ بندہ جب اللہ تعالیٰ کے اخلاق سے متخلق ہو جاتا ہے تو حرف وصوت کے بغیر کلام کو سنتا ہے۔ لیکن ظاہر وہم میں جو با وجود فارق کے حاضر پر غائب کے قیاس کرنے سے پیدا ہوتا ہے، محال نظر آتا ہے۔ بھلا حاضر پر غائب کا قیاس کسی طرح کیا جائے جبکہ حاضر زمانہ کی تنگی میں ہے جو مترتب وتقدم و تاخر کو چاہتا ہے اور غائب پر زمانہ اور تقدم وتاخر وترتب کے احکام جاری نہیں ہوتے۔غائب میں ان اشیاء کا ثبوت جائز ہے۔ جن کا ثبوت حاضر میں جائز نہیں۔ فَلْيَفْھَمْ وَاللهُ سُبْحَانَهٗ أَعْلَمُ بِالصَّوَابِ تحقیق یہ ہے کہ اگر سماع سمع کی حس کے ساتھ ہو تو ضروری ہے کہ مسموع حرف وصوت ہو لیکن جب سماع سامع کے اجزاء میں سے ہر ایک جزو کے ساتھ ہو تو حس کے ساتھ مخصوص نہیں۔ اس وقت جائز ہے که مسموع حرف وصوت کے بغیر حاصل ہو کیونکہ ہم اپنی کلیت اور اپنے اجزا میں سے ہر ایک جزو کے ساتھ ایسے کلام کو سنتے ہیں جو حروف و اصوات کی جنس سے نہیں ہیں۔ اگر چہ خیالی حروف و اصوات کے ساتھ خیال میں متخیل ہوتا ہے لیکن ہم جانتے ہیں کہ یہ کلام ماخوذ مسموع یعنی ہماری کلیت سےسنا ہوا کلام پہلے حروف و اصوات سے مجرد تھا۔ پھر خیال میں خیالی حرف و صوت کے ساتھ متلبس ہوا۔ تاک فہم و افہام کے قریب ہو۔ اس کے علاوہ ہم زیادہ عجیب بات یہ کہتے ہیں کہ اللہ تعالیٰ ہمارے کلام کو جو مترتبہ ومتقدمہ ومتاخره حروف و کلمات سے مرکب ہےسنتا ہے لیکن اللہ تعالیٰ کا سننا حرف وکلمہ اور ترتب وتقدم وتاخر کے وسیلہ کے بغیر ہے کیونکہ مرکب ومترتب متقدم ومتاخر كلام زمانہ کو چاہتا ہے اور حق تعالیٰ پر زمانہ جاری نہیں ہوتا۔ زمانہ کو اللہ تعالیٰ نے پیدا کیا ہے جب حرف وكلمہ کے وسیلہ کے بغیر حروف و کلمات سے مرکب کلام کا سننا جائز ہے تو اس کلام کا سننا جو حروف و اصوات کی جنس سے نہیں ہے۔ بطریق اولی جائز ہوگا۔ فَاَفْھَمْ وَلَا تَكُنْ مِّنَ الْقَاصِرِيْنَ وَلَا مِنَ الْغُفَلَاءِ الْجَاھِلِيْنَ وَاللهُ سُبْحَانَهٗ الْمُلْهِمُ لِلصَّوَابِ (سمجھ اور کوتاہ فہم اور جاہل و غافل نہ ہو اور اللہ تعالیٰ بہتری کی طرف الہام کرنے والا  ہے) اس کلام کی تحقیق میں ان سطروں کے لکھنے کے بعد دوبارہ جو کچھ مجھے الہام ہوا ہے وہ یہ ہے کہ مستعد بندہ کا حق تعالیٰ کے خطاب کو سمجھنا اور حق تعالیٰ سے اس کا اخذ کرنا پہلے حروف و کلمہ کے واسطے اور صوت وندا کے وسیلہ کے بغیر تلقی روحانی سے ہوتا ہے۔ پھریہ معنی متلقی سلطان خیال میں جہاں تمام اشیاء کی صورتیں منقش ہیں۔ حرف وصوت کی صورت پر متمثل(کسی چیز کی مثل ہونا) ہوتے ہیں کیونکہ عالم شہادت میں افاده و استفادہ الفاظ و حروف ہی کے ذریعے سے ہے۔ اس تلقی پرسماع بلا کیف کا اطلاق کرنا بھی جائز ہے کیونکہ کلام بے کیف ہے اور ضرور ہے کہ اس کا سماع بھی بلا کیف ہو کیونکہ کیف کو مَالَا كَيْفَ فِيْهِ (جس میں کوئی کیفیت نہیں) کی طرف کوئی راستہ نہیں۔ پس ثابت ہوا کہ حروف و اصوات سے مجرد كلام کا بلا کیف سننا جائز ہے۔ پھر اس کے بعد کلام خیال میں حرف کلمہ کی صورت پرمتمثل ہوتا ہے تا کہ عالم اجسام میں بھی افاده و استفاده حاصل ہو اور جن لوگوں نے اس دقیقہ پر اطلاع نہیں پائی۔ ان حروف و کلمات کے ذریعے سے جو حادث ہیں اور اس پر دلالت کرنے والے ہیں۔ ان لوگوں کا حال اچھا ہے اور بعض نے یوں کہا ہے کہ ہم اللہ تعالیٰ کے کلام کو سنتے ہیں اور انہوں نے کچھ فرق نہیں کیا کہ یہ بات اللہ تعالیٰ کی شان کے لائق ہے اور یہ لائق نہیں یہ لوگ جاہل اور جھوٹے ہیں۔ جو الله تعالیٰ کے حق میں جائز و ناجائز کو نہیں جانتے اورحق وہی ہے جو اللہ تعالیٰ کے فضل سے میں نے تحقیق کی اورشیخ قدس سرہ نے جو یہ کہا ہے کہ اس کے کان اس کی آنکھیں ہو جاتے ہیں اور اس کی آنکھیں اس کے کان بن جاتی ہیں اور اس کا اول آخر سے اور آخر اول سے بدل جاتا ہے۔ اس کے یہ معنی ہیں کہ اس کے کان اس کی آنکھوں کا حکم اور اس کی آنکھیں اس کے کانوں کا حکم پکڑ لیتی ہیں۔ یعنی اپنی کلیت سے سنتا ہے اور اپنی کلیت سے جانتا ہے۔ کیونکہ اگر اپنے بعض سے سنے اور بعض سے دیکھے تو اس صورت میں سمع عین بصر نہ ہوگا۔ اسی پوشیدگی کے لئے آگے بیان کیا ہے کہ اس کا آخر اول اور اس کا اول آخر ہو جاتا ہے۔ جس کا حاصل یہ ہے کہ الله تعالیٰ نے جب ذرات کو مخاطب کر کے ‌أَلَسْتُ بِرَبِّكُمْ فرمایا تو ذرات نے نہایت صفائی کے باعث بلا واسطہ اس ندا کو سن لیا۔ پھر وہ ذرات مختلف پشتوں میں بدلتے اور مختلف رحموں میں منتقل ہوتے رہے۔ حتی کہ اپنے بدنوں میں ظاہر ہو گئے۔ پس قدرت پرحکمت کا حجاب آ گیا اور مختلف اطوار و حالات میں بدلنے کے باعث ان پر بہت سی علامتیں چھا گئیں۔ جب اللہ تعالیٰ اپنے بندہ سے حسن استماع کا ارادہ کرتا ہے تا کہ اس کو صوفی صافی بنائے ۔ تو اس کو ہمیشہ تزکیہ (رذائل سے پاک) اور تجلیہ کے رتبہ میں ترقی دیتا رہتا ہے۔ یہاں تک کہ عالم حکمت سے میدان قدرت کی طرف آزاد ہو جاتا ہے اور اس کی گم شده بصیرت سے حکمت کا حجاب دور ہو جاتا ہے ۔ اس وقت اس کا ‌أَلَسْتُ بِرَبِّكُمْ کو سننا کشف وعیان ہوتا ہے اور اس کی توحید وعر فان سراسر بتیان و بر ہان ہوتی ہے۔ 

حتی کہ اس کی اپنی زبان اور غیر کی زبان بھی اس کے حق میں حضرت موسی کے درخت کا حکم پکڑ لیتی ہے۔ جس سے وہ اللہ تعالیٰ کے کلام کو سنتا ہے جیسے کہ حضرت موسی نے اس درخت سے اللہ تعالیٰ کے کلام کرسنا تھا پس ثابت ہوا کہ اس کا اول آخر اور اس کا آخر اول ہو جاتا ہے کیونکہ وہ آخر میں اللہ تعالیٰ کے کلام کو اس طرح سنتا ہے جس طرح اس نے اول سنا تھا۔ اس پرمحمول ہے کسی کا قول جو اس نے کہا ہے کہ میں ‌أَلَسْتُ بِرَبِّكُمْ کا خطاب یاد رکھتا ہوں یعنی اس خطاب کو گویا اب زبانوں پر سنتا ہوں ۔ پوشیدہ نہ رہے کہ اللہ تعالیٰ کا پہلا خطاب حقیقی تھا اور اللہ تعالیٰ سےذرات کا سننا حقیقت کے طور پر تھا لیکن یہ خطاب جو زبانوں سے ماخوذ ومسموع ہے۔ صرف تخیل و تو ہم کے طور پر الله تعالیٰ کا خطاب ہے جیسے کہ گزر چکا پھر کس طرح ایک دوسرے کا عین ہوسکتا ہے بڑے تعجب کی بات ہے کہ شیخ قدس سرہ نے باوجود اس قدر بلندقدر کے ایک کو دوسرے کا عین بنادیا ہے اورمتحقق ومتخیل کے درمیان کچھ فرق نہیں کیا۔ حالانکہ متخیل عین سکر اور صرف توحید ہے اس کی مثال بعینہ قول ‌أَنَا ‌الْحَقُّ(میں خدا ہوں)  اور سُبْحَانِي(میں پاک ہوں ) اور لَيْسَ ‌فِي ْ‌جُبَّتِيْ سَوِى اللهِ (میرے جبہ میں اللہ کے سوا کچھ نہیں)وغیرہ کی طرح ہے اور اس سے بھی بڑھ کر تعجب کی بات یہ ہے کہ شیخ نے اس کے بعد کہا ہے کہ جب صوفی اس وصف سے متحقق ہو جاتا ہے تو اس کا وقت سرمدی اور اس کا شہود(مشاہدہ) دائمی اور اس کا سماع ہر دم نیا ہوتا ہے حالانکہ صاف ظاہر ہے کہ کوئی اس مقام میں صرف تجلی معنوی صفاتی سے متحقق ہے جیسے کہ گزر چکا اور یہ مقام جوتلوین(ایک حال یا صفت سے دوسرے حال یا صفت میں تبدیل ہوتے رہنا)  کا مقام ہے۔ پھر کس طرح اس کا وقت سرمدی اور شہود دائمی ہوگا کیونکہ دائمی وقت ذات تعالیٰ تک پہنچنے اور تجلی ذات میں ہوتا ہے ایسےہی شہود و مشاہدہ بھی ذات تعالیٰ تک پہنچنے والے کیلئے ہوتا ہے۔ جیسے کہ مشائخ نے فرمایا ہے اور جو کچھ مرتبہ صفات میں حاصل ہوتا ہے اس کا نام مکاشفہ ہے اور شہود اور اس کا دوام آن ارباب تمکین کا نصیب ہے جو ذات تک واصل نہ کہ اہل تکوین کا حصہ جو صفات کے ساتھ مقید ہیں کیونکہ یہ لوگ ارباب قلوب وتقلب ہیں۔ ‌سُبْحَانَكَ لَا عِلْمَ لَنَا إِلَّا مَا عَلَّمْتَنَا إِنَّكَ أَنْتَ الْعَلِيمُ الْحَكِيمُ ( يا الله تو پاک ہے میں کوئی علم نہیں مگر جس قدر کہ تو نے ہمیں سکھایا۔ بیشک تو جاننے والا حکمت والا ہے۔ 

مکتوبات حضرت مجدد الف ثانی دفتر سوم صفحہ355ناشر ادارہ مجددیہ کراچی

بِسْمِ اللَّهِ الرَّحْمَنِ الرَّحِيمِ اَلْحَمْدُ لِلّٰهِ وَسَلَامٌ عَلٰی عِبَادِہِ الَّذِیْنَ اصْطَفٰی اللہ تعالیٰ کیلئے ہے اور اس کے برگزیدہ بندوں پر سلام ہو) شیخ اجل قدس سرہ نے اپنی کتاب عوارف کے دوسرے باب میں آیت کریمہ إِنَّ فِي ذَلِكَ لَذِكْرَى لِمَنْ كَانَ لَهُ قَلْبٌ أَوْ أَلْقَى السَّمْعَ وَهُوَ ‌شَهِيدٌ (اس میں نصیحت ہے اس شخص کے لیے جس کا دل حاضر ہے اور جس نے توبہ کے ساتھ کانوں کو اس طرف لگایا) کے معنی میں فرمایا ہے کہ واسطی نے کہا ہے کہ قوم مخصوص کے لیے نصیحت ہے سب لوگوں کیلئے نہیں اور یہ وہ لوگ ہیں جن کے حق میں الله تعالیٰ فرماتا ہے أَوَمَنْ كَانَ ‌مَيْتًا فَأَحْيَيْنَاهُ کیا جو مردہ تھا پھر ہم نے اس کو زندہ کیا اور واسطی نے یہ بھی کہا ہے کہ مشاہدے سے فراموشی پیدا ہوتی ہے اور حجابوں سے فہم حاصل ہوتا ہے کیونکہ جب اللہ تعالیٰ کی شے کے لیےتجلی کرتا ہے تو وہ اس کے لیے جھک جاتی ہے اور پست ہو جاتی ہے۔ شیخ قدس سرہ نے فرمایا ہے کہ یہ قول جوو اسطی نے کہا ہے بعض اقوام کے حق میں صحیح ہے حالانکہ یہ آیت ان امر کے برخلاف دوسری قوم کے لیے حکم کرتی ہے اور وہ لوگ ارباب تمکین (سالک کا مطلوب حقیقی سے واصل ہونا) ہیں جن کے لیے مشاہدہ اورفہم جمع ہوتے ہیں پوشیدہ نہ ر ہے کہ جو کچھ واسطی نے اول کہا ہے وہ اس بات پر دلالت کرتا ہے کہ خاص اہل تمکین کے لیے نصیحت ہے کیونکہ یہ وہ لوگ ہیں جن کو الله تعالیٰ نے موت کے بعد زندہ کیا ہے یعنی فنا کے بعد ان کو بقا بخشی ہے اور اہل تلوین کے لیےنہ فنا ہے نہ بقاء اور نہ حیات جو دوبارہ ان کو دی گئی ہو کیونکہ وہ وسط راہ میں ہوتے ہیں اور فنابقاء منتہیوں کے احوال ہیں اور اس کا دوسرا قول جو آیت کے بیان میں ذکر کیا ہے اگر تو اس بات پر دلالت کرتا ہے کہ احتجاب اور استار (یعنی پردہ اورحجاب میں آنے) کے وقت اہل تلوین کے لیے نصیحت ہے نہ کہ مشاہدہ اور مکاشفہ کے وقت کیونکہ یہ ذہول وفراموشی کے وقت ہیں ۔ پس یہقول پہلے قول کے منافی ہے اور اگر اس نے دوسری جگہ توسط حال میں اس معرفت کا ذکر کیا ہے اور آیت کے بیان میں ذکر نہیں کیا تو پھر کوئی منافات نہیں اور نہ ہی شیخ قدس سرہ کا یہ اعتراض کہ واسطی نے کہا ہے کہ بعض اقوام یعنی اہل تلوین کے حق میں صحیح ہے ۔

حالانکہ یہ آیت اس امر کے برخلاف دوسرے لوگوں کے لیے حکم کرتی ہے اور وہ ارباب تمکین ہیں درست نہیں کیونکہ واسطی نے آیت کے معنی میں بیان کیا ہے کہ نصیحت ارباب تمکین کے ساتھ مخصوص ہے اس لیے کہ یہ لوگ ہیں جو موت کے بعد زندہ ہیں نہ کہ اہل تلوین۔ حاصل کلام یہ ہے کہ اہل تلوین کے بیان میں اس کا دوباره ذکر کرنا ایک مستقل معرفت ہے جس کا آیت کے بیان سے تعلق نہیں ۔ اس صورت میں یہ اعتراض عائد نہیں ہوتا کہ یہ امر آیت کے حکم کے برخلاف ہے کیونکہ آیت ایک قوم کے حق میں وارد ہے اور یہ معرفت دوسری قوم کے احوال کا بیان ہے۔ اگر واسطی پہلے فعل کو اہل تمکین کے ساتھ مخصوص نہ کرتا اور پھر دوبارہ اہل تلوين کے لیے بھی ان کے احتجاب کی حالت میں نصیحت کو ثابت کرتا تو اس کے دونوں قولوں میں منافات حاصل نہ ہوتی اور شیخ کا اعتراض اس پر وارد نہ ہوتا اور جو کچھ میرے نزدیک ظاہر ہے وہ یہ ہے کہ اس آیت کریمہ میں دونوں فریقوں کےحال کا بیان ہے۔ یعنی لِمَنْ كَانَ لَهُ قَلْبٌ میں ارباب قلوب کا حال ہے جن کے احوال بدلتے رہتے ہیں انہی کو اصحاب تلوین بھی کہتے ہیں اور أَوْ أَلْقَى السَّمْعَ وَهُوَ ‌شَهِيدٌ میں اہل تمکین کے حال کا بیان ہے کیونکہ یہ وہ لوگ ہیں جنہوں نےعین شہود(مشاہدہ) کی حالت میں فہم کے لیے اپنے کانوں کو لگا رکھا ہے فرق صرف اسی قدر ہے کہ قوم اول کے لیے بعض بعض وقتوں میں نصیحت ہے اور دوسری قوم کے لیے تمام احوال میں نصیحت ہے جیسے کہ خود واضح ہے اگرشیخ قدس سرہ اس طرح کہتا کہ یہ آیت اس امر کے برخلاف اور قوم کے لیے بھی حکم کرتی ہے تو بہت ہی مناسب ہوتا اور کلمہ اومنع خلو(ایک منطقی اصطلاح) کے لیے ہے ۔ پس فریقین کیفیت میں جمع کرنے کے منافی نہیں اس کے بعد شیخ نے فرمایا ہے کہ فہم کا مقام محادثہ اور مکالمہ یعنی گفتگو اور کلام کامحل ہے اور وہ دل کی سمع ہے اور مشاہد ہ کا مقام قلب کی بصر ہے۔ پس جو سکر(مستی) کی حالت میں ہے اس کی سمع اس کی بصر میں غائب ہوتی ہے اور جو شخص خود تمکین کی حالت میں ہے اس کی سمع اس کی بصر میں غائب نہیں ہوتی کیونکہ وہ اپنے حال کا مالک ہے اور ظرف وجودی سے جو کلام کے سمجھنے کے لیے مستعد ہے۔ سمجھتا ہے کیونکہ فہم الہام وسماع کامحل ہے اور سماع و الہام ظرف وجودی کو چاہتے ہیں اور یہ وجود و موہوب یعنی بخشا ہوا اس شخص کو جو فنا کے راستے سے گزر کر بقا کے عمل تک پہنچا ہو مقام صحو میں متمکن ہونے کے لیے دوباره بخشا جاتا ہے اور یہ دجود اس وجود کے سوا ہے جو نور مشاہدہ کے چمکنے کے وقت نیست ونابود ہو جاتا ہے۔ انتھی (یہاں تک شیخ کا کلام ہے)

 پس محادثہ اور مکالمہ سے مراد اللہ تعالیٰ کے ساتھ کلام و گفتگو کرنا ہے اورسمع كا بصر میں غائب ہونے کے یہ معنی ہیں کہ مشاہدہ کے وقت نہیں سمجھتا اور یہ اہل تلوین کا حال ہے جو مشاہدہ کے وقت اپنے آپ کو فراموش کر دیتے ہیں جیسے کہ واسطی نے کہا ہے اورسمع کے بصر میں غائب نہ ہونے سے یہ مراد ہے کہ عین مشاہدہ میں سمجھتا ہے اور یہ حال اہل تمکین کا ہے جو مشاہدہ اور فہم کے درمیان جمع کرتے ہیں جیسے گزر چکا پوشیده نہ رہے کہ اہل تکوین میں مشاہدہ کے کچھ معنی نہیں ہیں کیونکہ مشاہدہ ذات میں ہوتا ہے اور وہ ابھی ذات تک نہیں پہنچا۔ اس کے حق میں صفات متخیلہ متلونہ کا مکاشفہ بہتر ہے اور جو کچھ ذات میں ہے اس کیلئےتلوین نہیں اور نہ ہی اس بارگاه مقدس میں تغیر ہے کہ کبھی ذہول و فراموشی ہو اور کبھی شعور بلکہ وہاں عین ذہول میں شعور ہے اورنفس شہود(مشاہدہ) میں فہم ہے نیز شیخ قدس سرہ کے کلام سے ظاہر ہوتا ہے کہ دنیا میں دل کی آنکھ سے مشاہدہ کا واقع ہو نا جائز ہے اور صاحب تعارف قدس سرہ نے جو امام طائفہ ہے، کہا ہے کہ دنیا میں دل اور آنکھ دونوں سے حق تعالیٰ کونہیں دیکھ سکتے اور اس پر اجماع ثابت کیا ہے اور کہا ہے کہ مشا ئخ نے اس بات پر اجماع کیا ہے کہ حق تعالیٰ دنیا میں ایقان کی جہت کے بغیر دلوں اور آنکھوں سے دیکھا نہیں جاتا ۔ میرے نزدیک جو کچھ صاحب تعرف نے کہا ہے بہت ہی بہتر ہے کیونکہ جس کو حق تعالیٰ کی رؤیت خیال کرتے ہیں وہ خیال رؤیت ہے یعنی خیال میں اس ایقان کی صورت کا کشف ہے جو دل کو حاصل ہوتا ہے اورمُوْقَنْ بِہٖ کی بھی ایک صورت ہے جو دل کیلئے کشف کی جاتی ہے کیونکہ مشائخ نے اللہ تعالیٰ کیلئے مثال کو جائز رکھا ہے اگر چہ الله تعالیٰ کیلئے کوئی مثل نہیں۔ وَلِلَّهِ ‌الْمَثَلُ الْأَعْلَى مثال اعلى الله تعالیٰ کے لیے ہے ) یعنی خیال میں ایقان کی صورت اورمُوْقَنْ بِہٖ کی صورت نقش ہو جاتی ہے۔ اگر چہ واقع میں حق تعالیٰ کی کوئی صورت نہیں کیونکہ قلب اور دوسرے لطائف کے معانی حاصلہ کیلئے بلکہ ہر ایک موجود شے کیلئے خیال میں ایک صورت ہے جواس عالم مثال کی تمثال(مماثلت) ہے جو تمام عالموں سے زیادہ وسیع ہے پس قلب کو ایقان کے سوا کچھ حاصل نہیں بلکہ ایقان کی صورت اورمُوْقَنْ بِہٖ کی صورت رؤیت ومرئی کی صورت میں متمثل(کسی چیز کی مثل ہونا) ہوتی ہے اور کوئی رؤیت حقیقی نہیں پس جب قلب کو رؤیت حاصل نہ ہو تو پھر بصریعنی آنکھ کو کب حاصل ہوگی وہ ایک مثالی صورت ہے یعنی قلب کا ایقان رؤیت کی صورت میں اورمُوْقَنْ بِہٖ مرئی کی صورت میں متمثل ہوتا ہے جس سے گمان ہوتا ہے کہ اس نے حقیقتا حق تعالیٰ کو دیکھا ہے حالانکہ وہ خیالی رؤیت ہے بلکہ ہم کہتے ہیں کہمُوْقَنْ بِہٖ کی صورت حق تعالیٰ کی صورت مثالیہ نہیں ہے بلکہ ایک کشفی صورت ہے جس کے ساتھ ایقان کا تعلق ہے جو خیال میں ظاہر ہوتی ہے اور ہرگز ہرگز حق تعالیٰ کی کوئی صورت نہیں۔ اگر چہ خیال ہی میں ہو۔ یہ صورت قلب سالک کے بعض مکشوفات یعنی ان وجوہ و اعتبارات کی صورت ہے جن کاتعلق ذات تعالیٰ کے ساتھ ہے یہی وجہ ہے کہ جب عارف ذات تعالیٰ سے واصل ہو جاتا ہے تو اس قسم کی خیالی مثالیں متخیل نہیں ہوتیں کیونکہ حق تعالیٰ کی ذات کی کوئی صورت نہیں نہ خیال میں اور نہ مثال میں اور میرے نزدیک جس طرح اس کی مثل نہیں مثال بھی نہیں کیونکہ صورت خواہ کسی مرتبہ میں ہوحدونہایت کو مستلزم ہے اور حق تعالیٰ تحدید(حد مقرر کرنا) و تقیید(پابند کرنا) سے منزہ ہے کہ تمام مراتب اس کے پیدا کئے ہوئے ہیں۔ فَاَفْھَمْ اللہ تعالیٰ کیلئے حمد ہے کہ اس نے ہم کو سلطان خیال عطا فرمایا اور اس کو معانی کمال کی صورتوں کے حصول کا آئینہ بنایا اگر خیال نہ ہوتا تو ہم انفصال کے درکات سے اتصال کے درجات کونہ پاسکتے اور احوال کی واردات کو نہ جان سکتے کیونکہ اس میں ہر ایک معنی اور حال ایک صورت ہے کہ اگر وہ صورت مکشوف ہوجائے تو اس کے ساتھ وہ معنی اورحال ادراک میں آجاتے ہیں پس ساتوں لطائف کا شان سیر و سلوک اور ایک حال سے دوسرے حال کی طرف انتقال کرنا ہے اور خیال کا شان سالک کو اپنی منقوش(نقش کردہ) صورتوں میں سیروسلوک و انتقال کے درجات کا دکھانا ہے اور اس کا دکھانا فوق کی طرف رغبت بڑھاتا ہے نیز اس کے دکھانے سےسیر (حقیقی)بصیرت پر حاصل ہوتا ہے اور سلوک معرفت پرآسان ہوتا ہے اور اس کے غلبہ سے سالک جہل سے نکل کر اہل علم میں سے ہوجاتا ہے۔ فَلِلّٰهِ سُبْحَانَهٗ دَرَّهٗ ( الله تعالیٰ ہی کیلئے ہے اس کی خوبی ) وَالسَّلَامُ عَلَى مَنِ اتَّبَعَ الْهُدَى (سلام ہو اس شخص پر جس نے ہدایت اختیار کی )

مکتوبات حضرت مجدد الف ثانی دفتر سوم صفحہ350ناشر ادارہ مجددیہ کراچی

حق تعالیٰ آپ کو حد اعتدال اور مرکز عدالت پر استقامت عطا فرمائے ۔ یہ کس قدر اعلی دولت ہے کہ عطیات کا بخشنے والا حضرت حق جل شانہ اپنے کسی بندہ کو بعض بزرگوں اور فضیلتوں کے ساتھ مخصوص کر کے اپنے بندوں کی حاجتوں کی کنجی اس کے دست تصرف کے حوالہ کر دے اور اس کو ان لوگوں کا جائے پناہ بنائے اور یہ کس قدر اعلی نعمت ہے کہ بہت سی مخلوقات کو جن کو اللہ تعالیٰ نے کمال کرم سے اپنے عیال فرمایا ہے اس کے متعلق کرے اور ان کی تربیت اس کے سپرد فرمائے۔ وہ شخص بہت ہی سعادت مند ہے جو اس دولت حمد میں قیام کرے اور وہ شخص بہت ہی ہوشمند ہے جو اس نعمت کا شکر ادا کرے اور اپنے مالک کے عیال کی خدمت گزاری کو اپنی سعادت جانے اور اپنے مولی کے غلاموں اور لونڈیوں کی تربیت کو اپنا شرف سمجھے۔ اللہ تعالیٰ کیلئے حمدہے کہ وہاں کے لوگ آپ کے ذکر خیر سے تر زبان ہیں اور آپ کے کرم و احسان کا ذکر ان کی زبان پر ہے۔ والسلام 

مکتوبات حضرت مجدد الف ثانی دفتر سوم صفحہ350ناشر ادارہ مجددیہ کراچی

اَلْحَمْدُ لِلّٰهِ وَسَلَامٌ عَلٰی عِبَادِہِ الَّذِیْنَ اصْطَفٰی ( الله تعالیٰ کیلئے حمد ہے اور اس کے برگزیدہ بندوں پر سلام ہو ) اس طرف کے فقراء کے احوال و اوضاع حمد کے لائق ہیں اور آپ کی صحت و عافیت اللہ تعالیٰ سے مطلوب ہے۔ صحیفہ شریفہ جو شفقت و مہربانی سے اس فقیر کے نام ارسال کیا تھا اس کے مطالعہ سے مشرف ہوا۔ آپ نے اشتیاق ظاہر فرمایا تھا کہ حرمیں شریفین میں سے کسی ایک میں مع متعلقین وطن اختیار کریں اور وہیں دفن ہوں۔ 

میرے مخدوم مکرم متعلقین کا جانا نظر نہیں آتا بلکہ نزدیک ہے کہ منع مفہوم ہو اگر آپ تنہا چلے جائیں تو پسند یدہ نظر آتا ہے اور امید ہے کہ سلامتی سے بچ جائینگے والْأَمْرُ اِلَى اللهِ سُبْحَانَہ (سب کام اللہ تعالیٰ کے اختیار ہے ) اور سیادت مآب کے بارہ میں جو آپ نے لکھا ہے کہ طبیبوں نے ان کے ضرر کا حکم دیا ہے۔ میرے مشفق مخدوم فقیر نے بڑے غور سے دیکھا ہے لیکن ان کے حق میں کوئی مضر نظر نہیں آتا۔ البتہ ایک ظلمت محسوس ہوتی ہے جو اس ضرر کی ظلمت سے الگ ہے۔ دیکھیں اس کی کیا وجہ ہے ۔ غرض طبیبوں کا ضرر مفقود ہے اور یہ ظلمت جو نظر آتی ہے کسی اور طرف سے ہے۔ والْأَمْرُ اِلَى اللهِ سُبْحَانَہ ۔ دوسرے یہ کہ فرزندی محمدسعید بہت ہی کمزور ہوگیا تھا۔ اللہ تعالیٰ کی حمد اور اس کا احسان ہے کہ اب اس کو صحت و عافیت ہوتی جاتی ہے۔ فقیر دعا کرتا ہے کہ قرۃ العین خواجہ جمال الدین حسین مع بھائی بہنوں کے اخیر زمانہ کے حادثوں سے محفوظ رہے اور بزرگ مخدوم زادے ظاہر باطنی جمعیت سے آراستہ رہیں۔ 

مکتوبات حضرت مجدد الف ثانی دفتر سوم صفحہ349ناشر ادارہ مجددیہ کراچی